МАН-ын 31-р Их хурлын шийдвэр болон цаг үеийн асуудлаар МАН-ын дарга, Тэргүүн Шадар сайд, ЭЗХ-ийн сайд Н.Учрал, Ерөнхий нарийн бичгийн дарга Я.Содбаатар нар мэдээлэл хийлээ.
Н.Учрал, Улс төрийн намын тухай хууль батлагдсантай холбогдуулан МАН-ын 31-р их хурлаар МАН-ын Үндсэн дүрэм, хөтөлбөр, зорилго, зорилтуудаа хуульд нийцүүлэн шинэчлэх үүрэг хүлээсэн. Энэ хүрээнд МАН-ын Их хурлаар намын үндсэн дүрэмдээ 112 зүйлийн нэмэлт, өөрчлөлтийг орууллаа. Үүнтэй холбоотойгоор жендерийн тэгш байдлыг хангах зорилгоор намын бүх түвшинд удирдлагын 40 хувь нь хүйсийн аль нэг төлөөлөл байхыг тусгасан. Энэ хүрээнд намын Удирдах зөвлөл, Бага хурлын гишүүдийн 40 хувийг эмэгтэйчүүд бүрдүүлж байна.
Мөн намын үйл ажиллагааг ил тод, нээлттэй болгох хүрээнд санхүүжилтийг ил тод болгох, олон нийтэд мэдээлэх шинэ зохицуулалтыг тусгалаа. Намын бүхий л үйл ажиллагаанд ёс зүй, сахилга хариуцлагыг нэмэгдүүлэх зохицуулалтыг тусгасан.
Улс төрийн намын тухай хуулийн дагуу намууд хөтөлбөртөө өөрчлөлт оруулах шаардлага үүссэн. Тиймээс намын хөтөлбөр буюу хичээн эрмэлзэх зүйлийг хуулийн шаардлагад нийцүүллээ. Намын хичээн эрмэлзэх зүйлийн эрхэм зорилго бүлэгт:
Тусгаар тогтнол, эх оронч үзэл санааг тусгай бүлэг болгон авч үзсэн. Тэгэхээр эрх чөлөө, шударга ёс, эв нэгдэл гэсэн үндсэн үнэт зүйл бол намын үндсэн дүрэм, хичээн эрмэлзэх зүйлд тодорхой туссан байдаг бол Тусгаар тогтнол, эх оронч үзэл санааг тусгай бүлэг болгон авч үзсэнээрээ онцлог.
Монгол Ардын намын 31 дүгээр Их хурлаас байгуулсан Бага хурлын анхдугаар хуралдаан өчигдөр /2025.11.18/ Тусгаар тогтнолын ордонд болж, МАН-ын Ерөнхий нарийн бичгийн даргаар ажиллаж буй Я.Содбаатарыг улираан сонголоо.
Мөн энэ хурлаар 39 гишүүний төлөөлөл бүхий МАН-ын Удирдах зөвлөлийг байгууллаа. Удирдах зөвлөлд тодорхой албан тушаалтнууд, аймаг, нийслэл, дүүргийн болон намын анхан шатны байгууллагуудын төлөөллүүд, намын дэргэдэх ТББ-уудын төлөөллийг багтаасан.
Мөн 5 орон тооны, гурван орон тооны бус нарийн бичгийн даргыг Бага хурлаар томиллоо.
