Японы баруун хэсгийн Тоттори, Шиманэ орчимд өнөө өглөө /2026.01.06/ 10:18 цагийн орчимд 6.2 магнитудын хүчтэй газар хөдлөлт болжээ. Газар хөдлөлтийн голомт Шиманэгээс зүүн хэсэгт 10 км гүнд байв. Бүс нутагт цунамийн сэрэмжлүүлэг идэвхжээгүй боловч газар хөдлөлтийн дараах чичирхийллүүдээс сэрэмжтэй байхыг албаныхан сануулж байна.
Японд газар хөдлөлтийн эрчмийг 0-7 хүртэл хэмжүүрээр хэмждэг. Энэ удаагийн газар хөдлөлтийнхийг 5+ гэж хэмжжээ.
Ийм тохиолдолд иргэд ойрын 2-3 хоногийн дотор онцгой анхаарал сэрэмжтэй байх шаардлагатай аж. Ялангуяа өмнө нь хүчтэй газар хөдлөлт болж байсан бүс нутагт илүү хүчтэй чичирхийллүүд мэдрэгдэх магадлалтай. Тоттори, Шиманэ мужуудын аль алинд нь өмнө нь урт хугацааны чичирхийлэл бүртгэгдэж байжээ. Японы Цаг уурын агентлаг үүнийг “урт хугацааны газрын хөдөлгөөн” гэж нэрлэдэг. Ийм хөдөлгөөн нь өндөр барилгуудыг найгахад хүргэдэг бөгөөд дээд давхруудад илүү хүчтэй нөлөөлдөг аж.
Газар хөдлөлтийн дараа цахилгаан тасарснаас болж Окаяамагаас Хирошима хүрдэг хурдан галт тэрэгний шугам түр зогсчээ.
Харин Шиманэгийн цөмийн цахилгаан станцад ямар нэгэн хэвийн бус байдал илрээгүй гэдгийг Чүгокү цахилгаан эрчим хүчний компани мэдэгдлээ. Шиманэгийн Ясүги Дайичи эмнэлэгт ч бас тог тасрах гэх мэт сөрөг нөлөөлөл байгаагүйг мэдээлж байна.
