УИХ-ын дарга Н.Учрал тэргүүтэй парламент, Засгийн газрын гишүүд Хангайн бүсийн иргэдтэй уулзаж, эрх зүйн шинэчлэл болон “Чөлөөлье” санаачилгын хүрээнд хэрэгжүүлэх ажлуудаа танилцуулжээ.
УИХ-ын дарга Н.Учрал хэлэхдээ, Монгол Улсад хүчин төгөлдөр мөрдөгдөж буй 378 хуульд хиймэл оюун ухаанд суурилсан дүн шинжилгээ хийхэд 228 хууль нь иргэдийн эдийн засгийн эрх, эрх чөлөөг зөрчсөн буюу бизнесийн үйл ажиллагаанд хүндрэл учруулж байгааг тогтоосон.
Энэ мэтчилэн хуулийн төслүүдэд хүний үндсэн эрх, эрх чөлөөг зөрчсөн заалт байгаа эсэхийг хиймэл оюун ухаанд суурилсан дүн шинжилгээгээр шалгаж, зөрчлийг арилгадаг жишиг рүү шилжсэнийг тодотгов.
Түүнчлэн хаврын чуулган эхэлмэгц Гэрч, хохирогчийг хамгаалах тухай хууль, Гэр бүлийн тухай хууль болон дагалдах процессын хуулиудын төслийг хэлэлцэн баталж, энэ удаагийн парламент хүүхэд хамгааллын эрх зүйн орчныг боловсронгуй болгоход нэн түрүүнд анхаарна хэмээлээ.
Эдийн засгийн эрх чөлөөг баталгаажуулах хүрээнд дараах шинэчлэлүүдийг хийх аж. Үүнд хувийн өмчийг хамгаалж, төрийн өмчит компаниудад давуу эрх олгохыг зогсооно. Ахуйн шинжтэй үйл ажиллагааг зөвхөн “мэдэгдэл” илгээснээр эрхлэх боломж бүрдүүлж, зарим зөвшөөрлийг мэргэжлийн холбоодод шилжүүлнэ.
Зөвшөөрөл нэртэй боловч бизнест саад болдог төрийн байгууллагын олон төрлийн баримт бичгийг цэгцэлж цөөлөх аж.
Мөн Эрчим хүчний импортын хараат байдлыг бууруулах зорилгоор айл өрх бүр бага оврын сэргээгдэх эрчим хүчний эх үүсвэртэй болохыг дэмжинэ. Хэрэглээнээс илүү гарсан цахилгаанаа төвийн сүлжээнд нийлүүлж, сар бүр орлого олох эрх зүйн орчныг бүрдүүлсэн. “Нарлаг Монголын малчин” хөтөлбөрөөр дамжуулан малчдын орлогыг төрөлжүүлэхэд анхаарна гэлээ.
Уулзалтын үеэр Баянхонгор аймаг энэ онд урсгал зардлынхаа 59 хувийг орон нутгийн орлогоор бүрдүүлэхээр төлөвлөснийг онцлов. Төсвийн шинэ бодлогоор төр, хувийн хэвшлийн түншлэлийн төслүүдийг орон нутаг өөрөө бие даан хэрэгжүүлэх боломж нээгдэж байна.
Эх сурвалж: Монгол Улсын Их Хурал
