Орхон аймгийн Эрдэнэт хотын зэсийн овоолго ашигладаг “Зэс-Эрдэнийн хувь” ХХК-ийн хувьцаа эзэмшигчид Авлигатай тэмцэх газарт хандаж буй талаараа өнөөдөр мэдээлэл өглөө.
Тус компанийн санхүү эрхэлсэн захирлаар ажиллаж байсан Э.Батбаяр болон түүний найз Дэлгэржаргал, түүний ах Барилга хот байгуулалтын сайд Э.Бат-Амгалан нарт холбогдуулан гомдол гаргаж, Авлигатай тэмцэх газарт хандаж байгаа юм байна.
Энэ талаар “Зэс-Эрдэнийн хувь” ХХК-ийн гүйцэтгэх захирал Б.Мөнхбаатар “Энэ компанийг хувьцаа эзэмшигчид 2010 онд үүсгэн байгуулсан, 2019 онд би гүйцэтгэх захирлаар ирсэн. Цар тахлын үед үйлдвэрээ барьж байгуулсан. Манай компанийн санхүү эрхэлсэн захирлаар ажиллаж байсан Э.Батбаяр нь тухайн үед жирийн нэг төрийн албан хаагч байсан. Бид хамтран хөрөнгө босгох яриаг Э.Бат-Амгалан сайдын дүү Э.Батбаяртай хийсэн. Э.Батбаяр нь Төлөөлөн удирдах зөвлөлийг хууран мэхэлж, 2022 оны аравдугаар сарын 10-нд энэ бүх ажиллагааг эхлүүлсэн.
Өнөөдрийн байдлаар манай компани 30 тэрбум төгрөгөө НӨАТ хэлбэрээр Э.Батбаярын компанид алдсан. Гадаад руу экспорт хийж буй компани НӨАТ-ын ямар нэгэн татваргүй байдаг. Харин Э.Батбаяр бидэнд “Ямар нэгэн НӨАТ-ын дарамт үүсэхгүй” гэж хэлээд гэрээ байгуулж өөрийнхөө компаниар худалдаа дамжуулсан. Ийнхүү 2023 оноос эхлээд манай компани 10 мянган тонн зэс гаргахад 30 тэрбум төгрөгийг шамшигдуулж, сайд ахынхаа УИХ-ын сонгуульд нь оролцсон байх магадлалтай байна.
Хувьцаа эзэмшигчид надад шаардлага тавьсны дагуу ногдол ашгаа тарааж чадахгүй байдалд хүрч, гомдол гаргахаар болсон. 24,000 хувьцаа эзэмшигчид хохироод ногдол ашгаа авч чадахгүй болсон нөхцөл байдлыг Хууль зүйн сайдад танилцуулахаар ирсэн. Б.Энхбаяр сайд биднийг хүлээн авч уулзаж, тулгарсан асуудлыг шийдэж өгнө гэж бодож байгаа.
Манай компани дээр санхүүгийн схем ашиглахдаа Сангийн яаманд ажилладаг хүмүүсээр багаа бүрдүүлсэн. Энэ гэрээнүүдийг цуцлуулахаар Сүхбаатар дүүргийн шүүхэд хандсан. Нийт алданги 30 тэрбум төгрөгөөс хол давчихсан байгаа. Энэ асуудлаар цагдаагийн байгууллагад хандаад зургаан сар болж байгаа, ямар ч нөлөө байхгүй.
Хуулийн байгууллага манай гомдлоор ажиллагаа хийсэн зүйл байхгүй. Манай компанийг үйл ажиллагаа явуулахгүй байгаа. Нөлөөнд авсан байх магадлалтай хэмээн хардаж байна. Манайхыг ямар нэгэн байдлаар хулгай хийсэн мэтээр хэвлэл мэдээллийн байгууллагаар гаргадаг” гэв.
