“Туул-1” коллекторын бохир усны шугам угсралтын ажлыг 2024 оноос бондын хөрөнгөөр үргэлжлүүлэн гүйцэтгэж эхэлжээ. Коллектор ашиглалтад орсноор Төв цэвэрлэх байгууламж хүртэлх бохир усны гол магистрал шугамын ачааллыг 50% хуваалцана гэж тооцоолжээ.
Өчигдөр болсон НИТХ-ын хуралдааны үеэр бохир усны шугамыг угсрах ажлын явцын талаар Ус Сувгийн Удирдах Газрын дарга, төлөөлөгч Ц.Төрхүү “Өвлийн улиралд Туул-1 коллекторын бохир усны хоёр километр шугамыг угсарсан. Одоо гуравдугаар сараас бохир усны шугамыг үргэлжлүүлэн угсарна.
Туул-1 коллекторын бохир усны шугамыг өнгөрсөн оны аравдугаар сарын 15-наас угсарч эхэлсэн. Гэтэл бохир усны шугам угсрах трасс дээр Нийслэлийн ерөнхий төлөвлөгөөний газраас барилга барих зөвшөөрөл өгчихсөн байх юм. Зөвшөөрөл авсан газар нь барилгаа бариад эхэлсэн. Ингээд ажлыг гацааж байна. Ямар учраас зөвшөөрөл өгснийг хотын ерөнхий архитектороос асуумаар байна. Ажил эхэлсэн байхад А даалгаврыг баталж өгөөд байшин бариулна гэдэг чинь ариун явдал мөн үү биш үү.
Мөн Буянт-Ухаа цэвэрлэх байгууламжаас Яармаг руу 400 метр хос шугамыг угсрах трасс дээр нэг айл байшингаа сунгасан байгаа. Трассын зураг, төсөв нь 3 жилийн өмнө хийгдсэн, 6.7 тэрбум төгрөгийн төсөвтэй. Санхүүжилтийг төсөвт эрэмбэлж, тусгахгүй байна. Сар шинийн баярын үеэр Яармаг орчимд бохирын шугам олон удаа хальсан. Бохир ус хальж хүүхдүүд өвдөх, бохирыг цэвэрлэхээр ажиллаж байгаа хүмүүсийн амь нас эрствэл хэн хариуцлага хүлээх вэ” хэмээв.
Нийслэлийн хот төлөвлөлт, ерөнхий төлөвлөгөөний газрын дарга Х.Баярсайхан “УБЗАА-тай Туул-1 коллекторын бохир усны шугамын трассыг тохирч 2024 оны аравдугаар сард эцэслэсэн ч 2025 оны зургаадугаар сард уг трассыг дахиж өөрчилсөн.
Трассыг эцсийн байдлаар шийдээгүй байхад манай байгууллагаас нэг компанид архитектор төлөвлөлтийн даалгавар өгсөн. Гэхдээ ажил эхлэх зөвшөөрлийг олгоогүй, загвар зургийг батлаагүй байгаа” гэж тайлбарлалаа.
Харин хотын ерөнхий архитектор Ч.Төгсдэлгэр өвдсөний улмаас НИТХ-ын хуралдаанд ирээгүй байв.
Буянт-Ухаа цэвэрлэх байгууламжаас татах хос шугамын санхүүжилтийн тухайд нийслэлийн Засаг даргын орлогч Т.Даваадалай “Яаралтай дуусгах шаардлагатай барилгын ажил, санхүүжилт нь үлдсэн ажлуудыг эрэмбэлж нийслэлийн төсөвт тусгасан. Төрхүү төлөөлөгчийн хэлж байгаа шугам хоолойн ажил эрэмбийн хувьд орох шаардлагатай.
Өвлийн улиралд инженер хангамжийн шугамд доголдол үүссэн тохиолдолд нийслэлийн Засаг дарга болон хотын ерөнхий менежерийн нөөц хөрөнгөөс зардлыг гаргах боломжтой. Бүлгийн хурлаар ярилцаж, төлөөлөгчийн яриад буй асуудлыг шийдвэрлэе” гэв.
“Туул-1” коллекторыг барих шийдвэрийг гаргаж, Гачуурт тосгоноос Төв цэвэрлэх байгууламж хүртэл 32 километр бохир усны шугам татахаар болсон байна.
