Ж.Пунцаг нь “УБТЗ” хувь нийлүүлсэн нийгэмлэгийн Дотоод аудитын албаны даргаар ажиллаж байхдаа Зүүнхараагийн вагон засварын депод инженерээр ажиллаж байсан З.Үнэнбатаас удаа дараагийн гүйлгээгээр 7.9 сая төгрөгийн хахууль авсан, өөрт хамаарал бүхий 13.1 сая төгрөгийн өр төлбөрийг 2021.09-2022.01 дүгээр сар хүртэлх хугацаанд түүгээр төлүүлж, өөртөө эдийн засгийн давуу байдал бий болгосон гэж буруутгасан.
Харин З.Үнэнбат нь албан тушаалаа урвуулж деподоо бараа, материал нийлүүлж өөртөө давуу байдал бий болгосон үйлдлээ нуун дарагдуулахын тулд Ж.Пунцагт хахууль өгсөн гэж үзсэн юм.
Улмаар Прокурорын байгууллагаас Ж.Пунцагийг эрх мэдэл, албан тушаалын байдлаа урвуулан ашиглаж, бусдад давуу байдал бий болгосон гэх хэрэгт Эрүүгийн хуулийн 22.1 дүгээр зүйлийн 1 /Эрх мэдэл, албан тушаалын байдлаа урвуулан ашиглах/-т зааснаар яллах дүгнэлт үйлдэн шүүхэд шилжүүлж байлаа.
Шүүх хурал 2024.10.28-нд болж, Ж.Пунцагт нийтийн албанд ажиллах эрхийг 5 жилээр хасч, 12 сая төгрөгийн торгуул, З.Үнэнбат нийтийн албанд ажиллах эрхийг 3 жилээр хасч, 4 сая төгрөгийн торгууль оногдуулсан юм. Харин тэрээр шүүхийн шийдвэрийг эсэргүүцэж давж заалдаж байв.
Тэгвэл өнгөрсөн долоо хоногт Баянзүрх, Чингэлтэй, Сүхбаатар дүүргийн эрүүгийн хэргийн анхан шатны шүүхээс Ж.Пунцаг нарын үйдлийг “гэмт хэргийн шинжгүй” хэмээн хэрэгсэхгүй болгожээ.
