Засгийн газрын ээлжит хуралдаанаас гаргасан зарим шийдвэрийг Хүнс, хөдөө аж ахуй, хөнгөн үйлдвэрийн сайд Ц.Идэрбат танилцууллаа.
Тодруулбал хүнсний ногооны үнийн өсөлтөөс сэргийлэх тухайд дараах мэдээллийг хүргэсэн юм.
Энэ талаар “Өнөөдрийн хуралдаанаар Засгийн газрын тогтоол, албан даалгавар гарсан. Энэ хоёр эрх зүйн актад хөдөө аж ахуйн салбартай холбоотой ямар зүйл заалт орсон талаарх товч мэдээллийг өгье.
-
Хүнсний ногоо тариалагчдад Газрын тухай хуулиар олгогдсон эрхүүдийг нь олгох ажил. Энэ чиглэлд эрчимтэй ажиллах үүргийг нийслэлийн аймгийн Засаг дарга нарт олгож байгаа.
-
Нөгөө талаар хүнсний ногооны хүртээмж, чанарыг сайжруулах хүрээнд үрийн нэг тэрбум төгрөгийн асуудлыг шийдвэрлээд энэ мөнгөөр дөрвөн төрлийн ногооны үрийг авч, хөнгөлөлттэй үнээр буюу зээлээр олгох шийдвэрийг гаргаж байгаа.
Хэдийгээр нэг тэрбум төгрөгийн үр гэж хэлж байгаа боловч энэ нь тариаланчдын гар дээр очоод газрын хөрсөнд шингэснээр 18 орчим тонн ногоо ургах боломжтой шийдвэрийг гаргалаа.
Нөгөө талдаа хүлэмжийн аж ахуй, зуны болон өвлийн хүлэмжийн асуудал дээр Засгийн газар онцгой анхааръя.
Зуны хүлэмжид 2.1 тэрбум төгрөгийн худалдан авалт хийлгэх, хувиараа хүлэмжийн аж ахуй эрхлэгчдэд зориулж хүүгүй урт хугацаатай зээл олгох шийдвэрийг гаргалаа.
Нөгөө талдаа өвлийн хүлэмжийн асуудал манай улсад хурцаар тавигддаг. Тэр утгаараа хөгжлийн хувьд нэлээд өсөлттэй яваа салбар.
Өвлийн хүлэмжийг ажиллуулахад манай улсын цаг агаарын нөхцөл байдалд халаалтын асуудал мөн хүндрэл учруулдаг. Үүнийгээ цахилгаанаар шийддэг. Тиймээс цахилгааны үнэд хөнгөлөлт үзүүлэхээр болж байгаа.
Өнгөрсөн хугацаанд жилд 330 орчим сая төгрөгийн цахилгааны хөнгөлөлтийг өвлийн хүлэмж ажиллуулж байгаа ААН, иргэдэд олгодог байсан бол дээр дурдсан тогтоол хэрэгжсэнээр 400 гаруй сая төгрөгийн хөнгөлөлт үзүүлэх бололцоо бүрдэх юм” гэлээ.
