Өнгөрсөн сарын инфляцыг Үндэсний статистикийн хороо баасан гарагт танилцуулав. Улаанбаатар хотын болон улсын дөрөвдүгээр сарын инфляц хоёр оронтой тоо руу шилжиж, 10.1 хувьд хүрчээ.
Өмнөх сард инфляц 7.4 хувь байсан гэхээр даруй 3 нэгж хувиар өссөн байна. Өсөлтөд юу нөлөөлөв?
Махны үнэ 40 хувиар өсжээ. Улс даяараа үнэтэй мах идэж байна. Махны экспорт өмнөх оныхоос 10 хувиар өсжээ. Мал тооллогын хамгийн сүүлийн буюу 2025 оны дүнгээр манай улс 57 сая малтай байна. Хоёр жилийн өмнөх зудаас өмнө 70 сая малтай байв.
Инфляцыг өдөөсөн дараагийн хүчин зүйл нь шатахууны үнийн өсөлт. Ираны дайн 70 дахь хоногтоо үргэлжилж байна. Шатахууны үнэ бүх бараа үйлчилгээнд нөлөөлдөг онцлогтой. Ираны дайны нөлөөгөөр дэлхийн олон оронд үйлдвэрлэлийн зардал өсөж, Төвбанкууд ижил сорилттой тулгарав.
Засгийн газар АИ-92 шатахуунд татаас өгдөг. Тэгвэл өнөөгийн нөхцөлд дизель түлшний үнийн өсөлтийг сааруулахын тулд энэ төрлийн түлшинд татаасаа зарцуулах нь зөв гэж эдийн засагчид үзэж байна. Ингэснээр тээвэр, хөдөө аж ахуйн үйлдвэрлэлийн зардлын өсөлтийг сааруулах боломжтой.
Монголбанкны Ерөнхийлөгчийн зөвлөх Н.Батсайхан “Газрын тосны хямралын үед Төвбанкууд бодлогын хүүг өсгөх, эсэх сонголтын өмнө ирдэг. Монголбанкны Мөнгөний бодлогын хороо хамгийн сүүлийн ээлжит хурлаараа бодлогын хүүг 12 хувьд хэвээр хадгалах шийдвэр гаргасан. Энэ нь зөв байсныг инфляцын өсөлт харууллаа.
Инфляц буурсан үед л бид бодлогын хүүг бууруулна. АНУ бодлогын хүүгээ хэвээрээ хадгалж байгаа бол Австралид энэ онд гурван удаа өсгөв. Засгийн газар үнэ тогтоох нь буруу ч үнийн өсөлтөд анхаарч, махны нийлүүлэлтээ эргэж харах нь зөв. Үр дагавар биш шалтгаантай тэмцэх ёстой. Хэрэв бид бодлогын хүүг өсгөвөл зээлийн хүү өсөж, улмаар эдийн засгийн өсөлт саарна. Махны үнэ ирэх сард буурах хүлээлттэй байна” гэв.
Махны үнэ 40 хувиар өссөнөөр нийтийн хоолны үнэд ч нөлөөлсөн юм.
