Баянзүрх дүүргийн 43 дугаар хорооны иргэдийн гомдлын дагуу газрын маргааны асуудлыг шийдвэрлэхээр Натур орчимд өнөөдөр Нийслэлийн Засаг дарга бөгөөд Улаанбаатар хотын Захирагч Б.Пүрэвдагва ажиллажээ.
Энэ үеэр тэрбээр “НЗД-ын даргын дэргэд өнөөдөр Шуурхай ажлын алба байгуулагдсан. Энэхүү Шуурхай алба дүрэм, журам, стандарт зөрчигдөж олгогдсон газруудын эрхийг цуцалж, оронд нь ногоон байгууламж, хүүхдийн тоглоомын талбай, нийтийн эзэмшлийн талбай болгох юм.
Бизнес эрхлэгчдийг дэмжинэ. Бүтээн байгуулалтууд стандартын дагуу зөвшөөрөгдсөн газар, барилга хэрэгтэй байгаа газарт явагдах ёстой. Натур орчимд барилгажилт хангалттай байна. Гэвч галын болон түргэний машин явах боломжгүй болгож барилга барьж байгааг зогсоолоо. Натур орчимд орон сууц, үйлчилгээний барилга бариулахгүй. Гэхдээ хувийн компаниудыг хохироож болохгүй. Цаашид судалж, шаардлагатай арга хэмжээг хэрэгжүүлэн ажиллана.
Харин Натур орчимд хашаалсан байгаа газрыг судална.
Хотын төвд олгосон газруудад шалгалт оруулж байгаа” гэв.
Иргэн: Барилгын фасад автомашин дээр унах тохиолдол гарч байна.
Хоёрдугаарт Нарны замаас Натур хүртэлх замын гараашнууд руу үерийн ус ордог. Зөвшөөрлийг өгчихвөл үерийн усны хаялга, хамгаалалтыг бид өөрсдөө хийх хүсэлтэй байгаагаа хоёр жил ярилаа. Үер болно гэхээр айж, эмзэглэж байна.
Амжилт кибер сургууль оффисийн барилга барьж, оршин суугчдын зогсоолыг эзэмшчихсэн, хүүхэд тоглох талбай ч байхгүй. Оршин суугчдын талбай дээр биеийн тамирын хичээлээ явуулж байгаа асуудал байна.
Сэлбэ голын тохижилтыг хийж байгаа компани маш удаан ажиллаж байна. Өдөрт хоёр хятад хүн юм хийгээд бусад нь өдөржин шахуу зүгээр байгаа харагдах юм. Үер болоход орон сууцны суурь руу ус орохоор онгорхой орхиж байна. Үүнийг шалгаж өгөх хүсэлтийг албан ёсоор гаргаж байна.
Хотын дарга Б.Пүрэвдагва: Барилгын фасадны аюулгүй байдлыг хангах гэхээр иргэдийн татварын мөнгөfj засах болдог. Анх барилгын зөвшөөрөл өгөхдөө стандарт хангадаг, улсын комисс сайн шалгаж хүлээж авах бодлогыг баримтална.
Иргэд ухсан нүх, ил гарсан цахилгааны утас, таггүй траншейны нүхний зургийг авч E-mongolia системээр илгээхэд УБЗАА-наас шуурхай засварлах ажлыг эхлүүлээд байна.
