Бидний газрыг хурааж аваад улсын төсвөөр нойл барих гэж байгааг ойлгохгүй байна

 

Монгол Үндэсний Их сургууль /МҮИС/-ийн багш, сурагчдын төлөөлөл өнөөдөр цаг үеийн асуудлаар мэдээлэл хийлээ. Тус сургуулийн оюутан, багш нарын төлөөлөл өчигдөр БОАЯЖ-ны гадаа жагсаал хийж Д.Оюунхорол сайдтай уулзах хүсэлт хүргүүлсэн байна.

МҮИС нь Монголд анх удаа 16 давхар Эко кампус оюутны хотхоныг Хан-Уул дүүргийн нутаг дэвсгэр буюу Богд Хан уулын бэлд байгуулах зөвшөөрөл авч зураг төслөө өнгөрсөн онд батлуулж байжээ. Гэтэл энэ сарын 13-нд Д.Оюунхорол сайд шийдвэр гарч, МҮИС-д олгосон 15.5 га газраас 3 га газрын зөвшөөрлийг олгох шийдвэрээ цуцалсан аж. Мөн тус сургуулийн удирдлагуудтай ямар нэгэн санал солилцоогүй учир жагсаал хийхэд хүргэсэн гэж удирдлагууд тайлбарлаж байна.

Түүнчлэн бүх нийтээр мод тарих өдөр буюу энэ сарын 11-нд МҮИС-ийн багш сурагчид 14 сая орчмын өртөгтэй модыг бүтээн байгуулалт олгогдсон газартаа тарьжээ. Харин тэдний энэхүү үйлдлийг БОАЖЯ эсэргүүцэн тарьсан модыг үндэстэй нь суулгацтай нь ховхолж авсан гэж хэллээ.

Энэ үеэр тус сургуулийн удирдлагууд хэлэхдээ \”Ийм үйлдэл хийж байхад янз бүрийн өнцгөөс харж сэрдэхээс өөр арга байхгүй. Боловсролд ийм халган ханддаг Засгийн газрыг анх удаа харж байна. Өнөөдөр бидний мэдээлэл дамжуулах сувгийг хааж байна. Монгол Ньюс мэдээллийн төвд хоёр цагаас хурал хийхээр цаг авсан ч Чингэлтэй дүүргийн Засаг даргын Тамгын газраас цуцалж, цагдаа нар хамгаалалтад авсан нөхцөл байдал биднийг угтсан” гэв.  

П.Алимаа  \”Өчигдөр манай сургуулийн оюутнуудын төлөөлөл БОАЖЯ-ны гадаа эсэргүүцлийн жагсаал зохион байгуулсан. Д.Оюунхорол сайдтай уулзах хүсэлт тавьсан. Хоёр цагийн дараа багш оюутнуудын төлөөллийг дотогш оруулсан юм. Гэвч үүнээс хойш манай сургуулийн нэг багш ор сураггүй алга боллоо. Тухайн багшийг ганц худагт 14 хоног саатуулах тушаал гарсан. Зарим хэвлэл мэдээллийн хэрэгслүүдээр өчигдөр жагссан оюутнуудыг мөнгөөр хөлсөлж, хүчээр аваачсан гэсэн худал мэдээлэл таржээ. Үүнийг эсэргүүцээд тайлбарлах гэтэл хаана очиж хэнд хандах, хүмүүст түгээе гэхээр хаашаа хандах ёстой юм бэ? Бид нийгэмд тэнцвэртэй мэдээлэл хүргэхийг хүсч байна” гэв.

С.Мөнхнасан \”Газрын маргаантай асуудал дээр анхаарал татаж байгаа нэг зүйл байна. Богд-Хан ууланд аялж, салхинд гарч байгаа маш олон хүн бий. Энэ хүмүүст зориулсан нийтийн нойл, зогсоолыг шийдэхийг хүсээд байна. Манай сургуулийн төлөвлөлтөд авто зогсоол нойлын асуудал тусгагдсан. Үүнийг бид өөрсдийн хөрөнгөөр хийнэ. Зураг төсөл гарсан явж байгаа. Гэтэл төрөөс манай 15 га газраас 3 га газрыг газрыг тасдаж аваад нийтийн нойл, зогсоол байгуулж пост байгуулаад хураасан мөнгөөрөө байгаль орчноо цэвэрлэнэ гэж тайлбарлаж байна. Үүнийг хийхийн тулд улсын төсвөөс гурван тэрбумын төгрөг зарцуулна гэсэн мэдээлэл бидэнд ирүүлсэн. Энэ асуудлын цаана улсын мөнгөөр хийнэ гэж зүтгээд байгаа нь маш сонирхолтой байна. Манай байгууллагын ажил хэвээр явж байх ёстой. Бүтээн байгуулалтаа хиймээр байна. Үүний хариуцлагыг хэн хүлээх вэ? Бид цаашдаа дахин дахин тэмцэнэ. Мөн дээрээс нь сургуулиа ч байгуулна\” гэв.