АНУ-д амьдран суугаа манай залуус, монгол шатарчид Филадельфия хотод болсон олон улсын тэмцээнд аваргалсан тухай баяртай мэдээлэл бэлтгээд удаагүй байхад дахин нэг гайхшруулсан үйл явдал шуугиан тарилаа. Энэ бол монгол залуу \”American got talent” шоунд 12 дахь дугаарт оролцсон явдал. Циркийн жүжигчин СТА Баттогтохын Баттулга Америк гүрнээ эх орныхоо нэрийг дуулгаж, түүний үзүүлсэн хүнд жингийн үзүүлбэр шүүгчдийг мэл гайхуулж буй ганцхан минутын бичлэг цахим сүлжээгээр тархлаа.
Америк дахь монголчууд нэгэн үе хэн нэгний хараан дор хүнд хэцүү ажлыг нугалж байсан бол өнөөдөр өөрсдийн гэсэн том жижиг бизнес эрхэлдэг болтолоо амжилтанд хүрсэн байна. Бизнесийн үр ашиг нь өсч санхүүгийн эрх чөлөөнд хүрээд нутаг нэг монголчуудаа ажлын байраар хангаж энэ чинээнд хүртлээ тэд амжилттай хөдөлмөрлөсөн байна. Гадаадад газрын хол Америк гэдэг энэ их гүрэнд өглөөнөөс үдэш болтол цаг наргүй ажиллана, давхар суралцана, үр хүүхдээ өсгөж хүмүүжүүлнэ, гэр бүлээ халамжилна. Дээрээс нь харь нутгийн хөрс нь хатуу, хууль нь чанга. Энэ их хариуцлага их ажлын хажуугаар тэд ӨӨРӨӨ ӨӨРСДИЙГӨӨ ХӨГЖҮҮЛЖ ТАСРАЛТГҮЙ УРАГШИЛЖ БАЙНА.
Харц дээгүүр харь нутгийхан хүний нутгийн уул түшсэн тэдний тухай мэдээ мэдээллээр тасралгүй хоёр жилийг ардаа орхилоо. Эх нутагтаа цөөнгүй мэдээ бэлтгэж илгээлээ. Энэ удаад ч бас мэргэжлийн өвчин хөдөлж Америкийн шоунд оролцож олныг гайхшруулсан үзүүлбэрийн эзэн Б.Баттулгын эрэлд гарлаа. Түүнийг олоход хэцүү байсангүй. Дотны найз бүсгүйнхээ тусламжтайгаар төвөггүйхэн олж ярилцлага хийх боломж надад олдсон юм. Ярилцлага хийх хүсэлтийг тун ч уриалгахан хүлээн авч бид цаг гаран хөөрөлдлөө.
Америкчууд \”American got talent” шоуг зохиогоод 12 жил болж байна. Энэ жил энэ шоунд манай улсаас 4 үзүүлбэр оролцсон. Б.Батулгаас гадна \”Mongolian got talent” шоуны шилдэг оролцогч Б.Шижирбат, мөн уран нугаралтын төрлөөр 3 охин оролцсоны нэг нь наймхан настай оролцогч Марал охин байсан юм.
Тун ч шаардлага шалгуур өндөртэй энэ шоунд оролцохоор Б.Баттулга 3 жил дарааллан оролцох хүсэлтээ илгээсний хүчинд нааштай хариу сонсчээ. Ингээд эхний шатанд 10 гаруй мянган үзүүлбэр шалгагдсанаас 200 оролцогч тунаж үлдсэний нэгт зүй ёсоор Б.Баттулга орж байна. Түүний хувьд энэ шоунд оролцохдоо 4 м урттай, 40 кг жинтэй гуалин мод, тус бүр нь 5.5 кг жинтэй гурван боулинг бөмбөг үзүүлбэртээ ашигласан.
Баттогтохын Баттулга 1984 онд Дорноговь аймгийн Сайншанд суманд төрсөн. Эхнэр гурван хүүхдийн хамт амьдардаг. 2005 онд МУИС-ийг Түүх судлаач мэргэжлээр төгссөн. Циркийн урлагаар 12 жил хичээллэсэн. Гимнастик болоод хүнд жингийн хүч тамирын үзүүлбэрээр голчилж хичээллэдэг.
2004-2008 онуудад Монголын Гимнастикийн холбоонд дасгалжуулагч, Усан спортын сургалтын төвд багш, Нийслэлийн хоёдугаар сургуульд биеийн тамирын багшаар ажиллаж байсан.
Тэрээр АНУ-ын Чигаго хотын дэлхийд алдартай 146 жилийн түүхт \”Ringling Bros and Barnum & Bailey\” циркид ажиллаж байсан төдийгүй тус хотын \”Lakeshore\” академид багшилж байсан туршлагатай. Сүүлийн 7 жилийн турш Америкт мэргэжлээрээ ажиллаж байна. Ажиллаж байх хугацаандаа 40 мужийн 120 гаруй хотоор аялан тоглолт хийж 5 сая үзэгчид циркийн урлагийг сурталчилсан.
2013 онд төр засгаас түүнийг үнэлж Соёлын Тэргүүний Ажилтан цол тэмдгээр шагнажээ. Түүнтэй хийсэн ярилцлагаа тун удахгүй нийтлэх болно.
Б.Ариунсэтгэл, Лос Анжелес хотын залуучуудын групп
