Долоон хохирогчтой ослын хэргийн бичлэг устсан байж болзошгүй

 

Төв аймгийн Аргалант сумын нутаг, Хөшөөтийн
хоёрдугаар баг орчимд 2017 оны наймдугаар сарын 5-ны өдөр гэр бүлийн долоон хүн
осолдож, амь насаа алдсан харамсалтай хэрэг гарчээ.

Гэвч хуулийн байгууллага уг хэргийг гурван ч удаа
хааж, хэрэгсэхгүй болгосон учраас хохирогчдын ар гэрийнхэн гомдолтой байгаагаа
хэлж, АТГ-т энэ хэргийг шалгуулахаар өгсөн тухайгаа мэдээллээ.

 

Тухайн үед хохирогчдын автомашиныг шаргал өнгийн
Тоёота Ланд-200 маркын автомашин шахаж, замын хажуу руу унагаж, осолдуулсан гэж
гэрчүүд мэдээлсэн байна. Осол болсны дараа автомашинд байсан долоон иргэнийг
гаргахыг оролдсон ч тэр дороо гал гарч, бүгд амь насаа алдсан байна. Машинд
дөрвөн том хүн, гурван хүүхэд явсан байна.

 

Талийгаачийн /жолооч бүсгүй/эгч Х.Алгирмаа \”Дүүг
маань шаргал өнгөтэй машин шахсаны улмаас осолдсон гэж гэрчүүд мэдээлсэн. Гэвч
прокурор эзэн холбогдогч нь нас барсан, хариуцлага хүлээх хүн байхгүй гэж
хэлээд хэргийг гурван ч удаа хаасан. Ослын шалтгаан юу болохыг тогтоогоогүй. Хэргийн
газар ажилласан шинжээч, байцаагч нарт гомдолтой байна” гэв.

 

Харин Ж.Бат-Өлзий/
жолооч бүсгүйн ээж/ \”бид ажил явдлын дараа Төв аймгийн Лүн суманд очиж, камерын
бичлэг үзэхийг хүссэн. Гэвч тухайн үед ажиллаж байсан байцаагч бичлэг
хойшлуулсан. Дараа нь бид өөрсдөө очиж үзэхийг хүсэхэд хэд хоногийн өмнө хүмүүс
ирж үзээд, кодлосон үзүүлэх боломжгүй гэсэн. Эндээс бид камерын бичлэг устсан
байх вий гэж айж байна. Тиймээс л энд ямар нэгэн гадны нөлөө байна гэж үзсэн
учир АТГ-т хандаад байна” гэлээ.