Цахилгааны шөнийн тарифыг маргаашнаас эхлэн 50-100 хувь хөнгөлнө

  Агаарын бохирдлыг бууруулах чиглэлээр хэрэгжүүлж буй Засгийн
газрын бодлогын хүрээнд нийслэлийн бүх дүүрэг болон аймгийн төвүүд, 10 мянгаас
дээш хүн амтай сум, суурин газрын гэр хорооллын айл өрхүүдийн хэрэглэсэн
цахилгааны шөнийн тарифыг маргаашнаас эхлэн 50-100 хувь хөнгөлнө.Энэхүү
хөнгөлөлтийг маргааш буюу арваннэгдүгээр сарын 1-нээс эхлүүлж ирэх оны
гуравдугаар сарын 31-ний өдрийг дуустал мөрдөх юм
байна.

Гэр хорооллын айл өрх хэрэглэгчдэд шөнийн тарифын хөнгөлөлт
тооцох ажлыг Засгийн газрын 2017 оны 199 дүгээр тогтоолоор батлагдсан \”Гэр
хорооллын айл өрхөд цахилгаан эрчим хүчний тарифын хөнгөлөлт үзүүлэх журам”,
Эрчим хүчний зохицуулах хорооны 2017 оны 203, 204 дүгээр тогтоолыг баримталж
хэрэгжүүлэх юм байна. Энэхүү журам, тогтоолд заасны дагуу нийслэлийн гэр хорооллын бүсэд
орших хоёр тарифт тоолууртай өрхийн 21.00-06.00 цагийн хооронд хэрэглэсэн
цахилгааны тарифыг 100 хувь хөнгөлнө. Ингэхдээ 100 хувийн хөнгөлөлт тооцох нэг
сарын хэрэглээний дээд хязгаар 220 В-ын хүчдэлийн төвшинтэй хэрэглэгч 700
кВт/цаг, 380 В-ын хүчдэлийн төвшинтэй хэрэглэгч 1500 кВт/цаг байх аж.
Үүнээс илүү гарсан хэрэглээг нь 50 хувийн хөнгөлөлттэй үнээр тооцохоор
журамд заажээ. энэ өвөл 21 аймгийн төв болон 10 мянгаас дээш хүн амтай сум,
суурин газрын гэр хорооллын бүс дэх хоёр тарифт тоолууртай өрхийн 21.00-06.00
цагийн хооронд хэрэглэсэн цахилгааны тарифыг 50 хувиар хөнгөлөхөөр болсон юм.