![\"\"](http://undesten.mn/uploads/posts/2017-11/1510529353_musnii.png "\\"\\"")
2017 оны арваннэгдүгээр сарын нэгдүгээр арав хоног
1.Хойт
мөсөн далайн ай савын гол, мөрөн
2017 оны
арваннэгдүгээр сарын нэгдүгээр арав хоногийн байдлаар Хөвсгөлийн уулсаас эх
авсан Дэлгэрмөрөн, Эг, Бүгсий, Үүр, Шишхэд зэрэг голуудад мөсөн зах өргөсөн
зузаарч дунд зэргийн болон өтгөн зайр гүйх үзэгдэл голлон ажиглагдаж байгаа бол
Бэлтэс голд 15 см зузаан мөсөн бүрхүүл тогтсон байна.
Хангай нурууны араас усжих Хануй, Суман, Хойттамир болон
Идэр голын адгаар мөсөн зах , бижрүү, шингэн болон өтгөн зайр гүйх үзэгдэл
ажиглагдаж байгаа бол Урдтамир гол чөлөөтэй урсаж байна. Харин Идэр голын эх болон Чулуут голын дагууд
15-50 см зузаан мөсөн бүрхүүл тогтсон байна.
Хэнтэй нурууны
баруун хажуугаас эхтэй Хүдэр, Хараа, Сөгнөгөр, Шарын гол, Туул зэрэг голууд
2016 оны мөн үед 10-25 см зузаан мөсөн бүрхүүлтэй байсан бол энэ жилийн хувьд
эдгээр голуудад одоогийн байдлаар тогтвортой мөсөн бүрхүүл тогтож амжаагүй ба
мөсөн зах үүсч өтгөн зайр гүйх үзэгдэл зонхилон ажиглагдаж байна. Харин жижиг
голууд болох Улиастай, Сэлбэ голын дагууд битүү мөсөн бүрхүүлтэй мөсний зузаан
5-25 см болсон байна.
Гол, мөрний мөсний үзэгдэл ба зузааны тойм 2017-11-11
Сэлэнгэ мөрөн Орхон голын дагууд мөсөн зах үүсч, дунд
зэргийн болон өтгөн зайр гүйх үзэгдэл зонхилон ажиглагдаж байна.
2.Номхон далайн ай савын гол, мөрөн
Хэнтэй нурууны ар, зүүн хажуугаас эхтэй Хурх, Барх, Эг,
Онон, Хэрлэн, Улз болон Их Хянганы нуруунаас усжих Халх голын дагууд 15-20 см
зузаан мөсөн бүрхүүлтэй байгаа бол Хэрлэн голын эх, Онон голын адгаар мөсний
үзэгдэл эрчимшиж, мөсөн зах, дунд зэргийн болон өтгөн зайр гүйх үзэгдэл
ажиглагдаж байна.
3. Төв Азийн
гадагш урсацгүй ай сав
Алтай
нуруу, түүний салбар уулсаас усжих Ховд голын эх болон Турган, Харбут,
Чигэртэй, Хангай нурууны өврийн Завхан голын эх, Заг, Байдраг, Шаргалжуут,
Цагаантуруут, Онги, Таац, Зэгстэй зэрэг голууд 10-35 см зузаан мөсөн бүрхүүлтэй
байгаа бол бусад голуудын хувьд тогтвортой мөсөн бүрхүүл тогтож амжаагүй ба
мөсөн зах, шингэн, өтгөн зайр гүйх үзэгдэл голлож байна.
Увс
нуурын савын Хархираа, Баруунтуруун, Түргэн, Тэс, Хангилцаг, Хариг зэрэг
голуудад мөн мөсөн зах, дунд зэргийн зайр гүйх үзэгдэл идэвхижиж байна.
Арваннэгдүгээр сарын эхний арав хоногийн байдлыг ерөнхийд нь дүгнэвэл
дунд болон жижиг голуудад битүү мөсөн бүрхүүл тогтсон бол томоохон голуудад
мөсөн зах өргөсөн зузаарч, өтгөн зайр гүйх үзэгдэл ажиглагдаж байна. Цаашид цаг
агаар хүйтрэхтэй зэрэгцэн гол мөрний мөс улам зузаарах хэдий ч мөсний даац хүн,
мал, машин тэрэг явахад аюулгүй хэмжээнд хүрч бэхжээгүй тул мөсөн дээгүүр явах
болон авто тээвэр хийхгүй байхыг онцгойлон анхааруулж байна.
Гадаргын усны судалгааны хэлтэс
