Гурван хүн тутмын нэг нь сүрьеэгийн халдвартай

 

 

Монгол Улсын гурван хүн тутмын нэг нь сүрьеэгийн халдвартай гэсэн
судалгааны дүнг Халдварт өвчин судлалын үндэсний төв /ХӨСҮТ/-өөс танилцууллаа.
Энэ бол маш аюултай үзүүлэлт юм. Сүрьеэгийн нян нь хүний биед идэвхгүй нууц
байдалтай байж байгаад хүний дархлаа сулрах үед өвчин болж илэрдэг байна.
Манайд жил бүр 4000 гаруй хүн сүрьеэтэй гэж шинээр бүртгэгдсээр байгаа аж.
Эдгээр хүмүүсийн арав гаруй хувийг хүүхэд багачууд эзэлж байгаа. Мөн жил 260
гаруй хүн зөвхөн энэ өвчний улмаас нас барж байгаа нь сүрьеэтэй тэмцэх ажилд
онцгой анхаарал хандуулах шаардлагатай болжээ гэдгийг хэлж байна.

 

Сүрьеэгийн талаар иргэдийн мэдлэг, мэдээлэл дутмаг байгаа. Уг нь өвчнийг
эрт илрүүлж чадвал эрсдлийг бууруулах боломж бий. Гэвч хүндэрсэн, эцсийн
шатандаа орсон үед нь эмнэлэгт хандах тохиолдлууд байсаар л байна. Сүрьеэгийн
нян маш хурдацтай тархаж, гүнзгийрэх шалтгаануудын нэг бол иргэдийн мэдлэг,
мэдээлэл дутмаг байгаа явдал гэж ХӨСҮТ-өөс мэдээлж байна.

Тэгэхээр сүрьеэг эрт оношлох, цаг алдалгүй эмчлэхийн тулд сүрьеэтэй хүнд
илэрдэг шинж тэмдгийг нийтээр мэддэг болох нь манай улсад тулгамдаж буй асуудал
болоод байна. Сүрьеэгийн үйл явц бусад цочмог халдварт өвчнийг бодвол удаан,
нуугдмал байдлаар явагддаг. Тиймээс ч иргэд тоохгүй, анзаарахгүй өнгөрүүлдэг
тохиолдол бий. Энэ нь л гурван хүн
тутмын нэг нь сүрьеэтэй гэдэг тоо судалгаа гаргахад хүргэж байна.

Сүрьеэ өвчин нь дотроо халдвартай, халдваргүй гэсэн хоёр төрөл байна. Илрэх
шинж тэмдгийн хувьд адилхан боловч уушгины халдвартай сүрьеэ нь ханиалгах
замаар агаар дуслын замаар дамжиж тархдаг аж. Сүрьеэгийн савханцар нян нь
тухайн хүний биеийн хамгийн сул дорой ямар ч эрхтнийг барьж өвчлүүлдэг тул ясны
сүрьеэ, нүдний сүрьеэ, өвдөгний сүрьеэ, бөөрний сүрьеэ, гар, сарвууны сүрьеэ
гэх мэтээр ямар ч өвчний сүрьеэ байж болдог байна. Гэвч эдгээрээс уушгины
сүрьеэ нь хамгийн хүнд буюу агаарт цацагддаг учраас халдварлах боломж өндөртэй
байдаг байна.

Уушгины сүрьеэтэй хүн нэг удаа ханиалгахад 500 гаруй жижиг дусал агаарт
цацагдаж, халдвар тараагч болдог байна. Тиймээс л амны хаалт зүүж хэвшихийг
эрүүл мэндийн байгууллагаас зөвлөсөөр байгаа. Хэрвээ 14 хоногоос дээш хугацаагаар ханиалгаж,
цустай цэр гаргаж, цээжээр хөндүүрлэж, хөлөрч, халуурч, хоолонд дургүй болж,
турж, эцэх шинж тэмдгүүд илэрч байгаа бол яаралтай эмнэлгийн байгууллагад
хандах хэрэгтэй. Сүрьеэгийн нян нарны гэрэлд нэг цагийн дотор устдаг байна.
Тиймээс өрөөний салхивчийг нээж, агаарын солилцоогоор өвчний халдвараас
сэргийлж байхыг зөвлөж байна.

Ерөнхийдөө амьдралын нөхцөл байдлаас шалтгаалж хүмүүсийн сүрьеэгээр өвчлөх
магадлал нэмэгдэж байгаа. Тухайлбал, ядуурал, ажилгүйдэл, архидалт, агаарын
бохирдол, стресс зэрэг нь нийгмийн асуудлууд сүрьеэгээр өвчлөх шалтгаан болсоор байгаа юм.