“Жолоочийн түр зөвшөөрөл” нэртэй бизнесийг төр дэмжээд байна уу

 

Жолоочийн үнэмлэх хэвлүүлэх ажлыг тендер зарлаж, шалгарсан компани нь хийж
гүйцэтгэдэг болсноос хойш \”түр зөвшөөрөл”-тэй жолооч нарын тоо нэмэгдсээр
байна. Түр зөвшөөрөл бол жолоочийн үнэмлэх хэвлэгдэн гартал түр хугацаагаар
ашиглах бичиг баримт юм. Гэвч түр хугацаа нь бүр хугацаа болчих гээд
байх шиг.

 

Уг нь Төрийн өмчийн бодлого зохицуулалтын газраас өнгөрөгч тавдугаар
сарын 3-ны өдөр тендер зарлаж, \”benqtech” компани шалгарчээ. Тэд жолооны үнэмлэхний бэлдэц нийлүүлэх үүрэгтэй. Гэвч түр зөвшөөрөлтэй жолооч нар хотыг хэрсээр…

Уг нь \”benqtech” компани гэрээнд заасны дагуу үнэмлэхний бэлдэц,
материалыг нийлүүлж, хэвлэх ажлыг яаравчилж, жолооч нар 11 дүгээр сарын 1 гэхэд үнэмлэхээ гардан авна
гэсэн мэдээлэл аль есдүгээр сард гарч байжээ. Гэвч холбогдох газар нь \”Бэлдэц байхгүй. Энэ сарын
сүүлээр үнэмлэх хэвлэж эхлэх төлөвлөгөөтэй байгаа” гэж мэдээлсэн байх юм. Өөрөөр
хэлбэл тендерт ялагч өдийг хүртэл гэрээнд заагдсан үүргээ биелүүлж, ажиллаж
чадахгүй байна гэж ойлгогдохоор. Ингээд л нэг компанийн хариуцлага алдсан
үйлдлээс болоод үнэмлэхгүй жолооч нар олширч байна.

Ганцхан компанийн асуудлаас болоод шүү дээ. Гэтэл бүхэл бүтэн улс жолооч нарынхаа үнэмлэхийг хэвлүүлж чадахгүй
гацчихаад байна гэж боддоо. Сонин байгаа биз. Ямар эрин үед амьдарч байгаа билээ. Нэг пластик үнэмлэх
хэвлүүлчихэж чадахгүй тусгаар улс байна гэж хэлвэл ичмээр биз дээ. Бараг л
гэртээ хэвлэчихсэн ч болохоор цаас барьчихаад л \”хэзээ хэвлэгдэх нь
мэдэгдэхгүй” үнэмлэхээ хүлээж сууна, Монгол Улсын жолооч нар.

Жилийн жилд л жолоочийн үнэмлэх хэвлэхтэй холбоотой гацсан, ээрсэн асуудал
гарсаар л байх юм. Уг нь нэг алдсан бол алдаагаа засч, сайжруулаад явдаг биз
дээ. Гэтэл бэлдэцгүй гэдэг шалтгааныг жил бүр ярьсаар л сууна. Тендер хэн ялах нь нэг их чухал биш. Угаасаа л хэн ч ялсан бэлдэц нийлүүлэхдээ хойрго хандах учиртай юм шиг. Ер нь
манайхаас өөр жолооч нартаа цаас тараадаг улс байдаг болов уу. Тэгснээ
энэ цаас нь бас хугацаатай. Хугацаа нь дуусвал тодорхой төлбөр төлж дахин авдаг. Юу ч гэсэн үг юм. \”Жолоочийн түр зөвшөөрөл”
нэртэй цаасаар зарим нэг нь бизнес хийгээд байна уу гэж хардахад
хүргэж байна шүү дээ. Өнөөдөр 70 мянга гаруй жолооч хэзээ бэлдэцтэй болж, хэзээ
үнэмлэх нь хэвлэгдэх бол оо гээд хүлээж сууна. Эдгээрийн хэд нь \”түр зөвшөөрөл”
ашиглаж, хэдийнх нь түр зөвшөөрлийн хугацаа дуусч, хэчнээн төгрөг нэр, зураг хэвлэгдсэн цаас
захиалах явцад эргэлдэж байна вэ?