Б.Хурцыг яриулж болохгүй, тэр бүгдийг мэднэ

Б.Хурцыг Элчин сайдаар томилох нь буруу
гэсэн байр суурьтай гишүүд цөөнгүй бий. Тэдний нэг болох УИХ-ын гишүүн
Ж.Батзандан өнөөдөр сэтгүүлчдэд хандан хэлсэн мэдээлэлдээ \”Б.Хурцыг Элчин
сайдаар томилохоос өмнө нийтийн сонсгол хийх ёстой. 21 гишүүн гарын үсэг зурсан
байгаа. Нийтийн сонсгол хийтэл Б.Хурцыг Элчин сайдаар томилох асуудлыг
хойшлуулах учиртай. 14 хоногийн дараа С.Зоригийн хэргийг ил тод болгох асуудлыг
Засгийн газарт танилцуулах гэж байна. Мөн Эрдэнэтийн 49 хувийн маргаан Цэц дээр
яваа. Тагнуулын байгууллагын тусгай ажиллагаа нэрээр хоёр ч хүний амь насанд
хүрсэн. Энэ бүх учир шалтгааныг тайлтал Б.Хурцыг Элчин сайдаар томилох асуудлыг
түр хугацаанд хойшлуулах шаардлагатай байна” гэж мэдэгдсэн билээ.

Үнэхээр ч Б.Хурцыг Тагнуулын Ерөнхий газрын
даргын албан тушаалаас яаран буулгасан шигээ яаран Элчин сайдаар томилох болсон нь олон нийтэд хардлага төрүүлж байгаа юм. Тэгээд ч тагнуулын
байгууллагаас чөлөөлөгдсөн албан хаагч 2-3 жилийн хугацаанд гадны улс оронд
зорчих, гадаадын иргэдтэй харилцаа тогтоохыг хориглосон дүрэм журам байдаг. Гэвч
Б.Хурцыг гэнэт элчин сайдаар томилж байгаа нь цаанаа ямар нэгэн тохиролцоо байв
уу гэж хардахаас аргагүйд хүргэж байна. Гэвч Б.Хурцыг хориглож, түүнээс ам асуучих
зоригтон энэ парламентэд алга. Шалтгаан нь өнөөдөр болсон УИХ-ын Аюулгүй байдал, Гадаад бодлогын Байнгын
хорооны хуралдаанаар яригдсан асуудалтай холбоотой юм.

УИХ дахь АН-ын хоёр гишүүн болох Б.Болд,
Ж.Батзандан нар Б.Хурцын томилгоог эсэргүүцэх байр суурьтайгаар үг хэлсэн бол
тэдний хариуд Элчин сайдад горилогч тун \”баавартай” хариулт хэлсэн тухай эх
сурвалжууд мэдээлж эхэллээ.

Тухайлбал, УИХ-ын гишүүн Л.Болдод хандаж \”Батлан
хамгаалахын сайдаар ажиллаж байхдаа Хойд Солонгост 300 мянган ам.долларын
зэвсэг худалдсан. Нэхэмжлэл нь ирчихсэн байна. Танаас болж хоёр хүн Хойд Солонгост
цаазлуулсан” гэж хэлээд амыг нь таглав. Харин Ж.Батзандангийн асуултанд хариулахын
оронд Байнгын хорооны нийт гишүүдэд хандаж \”Би асуултанд хариулчих юм уу. Яах
юм бэ, гишүүд ээ, айн, Хариулчих уу?” гэх мэтээр \”бааварласан” байна.

Б.Хурц гишүүдийн асуусан асуулт бүр хариулж
эхэлбэл гишүүд өөрсдөө л буруудаж мэдэхээр байна. Тиймээс Б.Хурцыг аль болох
бага яриулж, хурдан томилох учиртай ч юм шиг. Үгүй бол гишүүд үнэхээр \”муурын
сахлаар оролдов” гэдэг шиг эвгүй зүйлтэй
хутгалдаж мэдэхээр байна. Б.Хурц яг юу мэддэг болоод Монголын төрийг ингэтлээ \”чичрүүлж”,
УИХ-ын гишүүдийн өмнө \”Би харуилчих уу, айн, гишүүд ээ” гэх мэтчилэнгээр
бааварлаж суудаг юм бол доо.