Б.Уянга: Ажлын байран дээр зураг авах, дүрс бичлэг хийх хориотой байдаг

Дэлхийн томоохон компаниудад ажилладаг Монгол залуусынхаа тухай мэдээллийг уншиж, сонсохоор өөрийн эрхгүй бахархах сэтгэл төрдөг. Тэд олон ч хүнтэй өрсөлдөж, сонгон шалгаруулалтад орж, шигшигдэж байж тэдгээр компаниудад ажилд ордог учраас бахархахгүй гээд ч яах билээ. Бид эх орныхоо нэрийг гаргаж, дэлхийн хэмжээний компанид ажиллаж, оюуныхаа хөдөлмөрийг үнэлүүлж яваа чадварлаг залуусын нэг Баасанхүүгийн Уянгатай ярилцлаа. Б.Уянга нь Аpple-ийн гол өрсөлдөгч Samsung компанийн Энэтхэг дахь Samsung Engineering компанид программ хангамжийн дизайнер мэргэжлээр ажиллаж байна.

$\"\"$

$\"\"$

– Сайн байна уу. Сайхан өвөлжиж байна уу. Дэлхийд өрсөлдөгч Самсунг компанид ажилладаг Монгол бүсгүйтэй танилцаж байгаа даа баяртай байна. Та бидэнд өөрийгөө танилцуулахгүй юу?

– Намайг Баасанхүүгийн Уянга гэдэг. Дархан хотод төрсөн. Гэхдээ дунд сургуулиа Эрдэнэтэд төгсөж, мэдээлэл технологийн \”Хүрээ” Дээд сургуульд бакалврын боловсрол эзэмшсэн.

– Бидний барьж хэрэглэж байгаа гар утасны үйлдвэрлэлд Монгол хүний ур ухаан шингэж байгаа гэж бодохоор сайхан байна шүү. Дэлхийд танигдсан Самсунг компанид хэрхэн ажилд орж байсан бэ?

– Хүрээг төгсөх үед Энэтхэг улсын Засгийн газрын тэтгэлгээр хоёрын жилийн хугацаатай мастерын зэрэг хамгаалах боломж олдсон юм. Ингээд сургуулиудаа судалж байгаа Энэтхэгийн Технологийн Их сургууль /Indian Institute of Technology/ таалагдаад материалаа бүрдүүлж өгсөн. Тэгээд тэнцсэн хариулт авч, Энэтхэгт суралцах болсон. Энэ сургуульд л жинхэнэ дизайн гэж юу байдаг вэ гэдгийг ойлгож, олон мундаг профессоруудаас их зүйлс сурч авсан юм. Энэтхэгийн томоохон сургуулиудын нэг давуу тал бий. Тэр нь оюутнуудыг төгсөхөөс өмнө компаниуд ирж ажилд шалгаруулж авдаг арга хэмжээ юм. Тэр журмаар Самсунг компаниас сонгон шалгаруулалтын баг ирж манай төгсөлтөөс гурван хүн шалгаруулж авч байлаа.

-Дэлхийн компанид мэргэжлээрээ ажилд ороход хамгийн том шалгуур үзүүлэлт юу байсан бэ. Таны ямар давуу тал Самсунгийн босгыг давахад хүргэсэн бэ?

-Самсунг Энэтхэг улсдаа эхний тавд ордог сургуулиудаас ажилтан шалгаруулж авдаг юм билээ. Би тэдгээр топ сургуулиудын нэгэнд нь суралцаж байж таарлаа. Шалгаруулалтанд орж, тэнцлээ гэсэн хариу сонссоны дараа шүүгчийн бүрэлдэхүүнд байсан самсунгийн ажилтнаас \”Яагаад намайг ажил авахаар болсон бэ” гэж асуусан. Тэгэхэд ахлах дизайнер \”Чиний хийсэн бүтээлүүд чамайг бидэнтэй ажиллах чадвартай гэдгийг харуулсан” гэж хариулж байлаа. Мөн сүүлийн үед технологийн компаниуд creative чиглэлийн салбартаа аль болох өөр, өөр /diverse/хүмүүс авч ажиллуулах сонирхолтой болсон. Дан Энэтхэгчүүд бус тэдэн дунд нэг Монгол байвал олон янзын бүтээлч санаа гарна гэж үзсэн байх л даа. Надтай маш олон чадварлаг энэтхэгчүүд, дизайнерууд өрсөлдсөн. Гэвч надад нэг давуу тал байсан нь Солонгос хэл байсан. Тэнцлээ гэдэг хариу сонсоод маш их баярлаж байсан.

$\"\"$

-Одоо та самсунг компанид ямар чиглэлээр ажиллаж байна вэ. Хийж буй ажил, төслийнхөө талаар танилцуулахгүй юу?

-Манай салбар гар утсан дээр голчлон ажилладаг. Харин миний хувьд смарт утасны программ хангамжийн дизайнераар /software solution design/ ажилладаг. Манай баг самсунгаас гаргаж буй бүтээгдэхүүнүүдийн software талаас нь хэрхэн ажиллах болон харагдах байдал, хэрэглэгч ямар зүйлс хүсч байна вэ гэдэг тал дээр илүү их анхаарч ажилладаг.

-Самсунг ажилчдаа ямар арга барилаар удирддаг вэ. Танай компанид тогтсон соёл, дэг жаяг гэж байх уу?

-Манай салбар бусад IT компаниуд шиг сүүлийн үед их чөлөөтэй, ямар нэгэн тогтсон дүрэм журамд баригдахгүй ажиллахыг эрхэмлэж байгаа. Энэ нь бүтээлч хандлагыг хандлагыг бий болгодог давуу талтай л даа. Гэвч Солонгос улс руу томилолтоор очиход төв оффис дээр арай өөр дүрэм үйлчилдэг юм билээ. Дэг жаягтай, дүрмээ ягштал биелүүлдэг талууд ажиглагдсан.

Мөн нийт Самсунгийн оффисууд мэдээллийн нууцлалд дээд зэргээр анхаарч, ач холбогдол өгдөг. Ажил руу орж, гарахдаа металл илрүүлэгчтэй хаалгаар гарна. Яг л гааль дээр байгаа юм шиг цүнхээ шалгуулна шүү дээ. Ажлын байран дээр ямар нэгэн зураг авах, дүрс бичлэг хийх хориотой байдаг. Анх эвгүй л байдаг байлаа. Одоо бол энгийн зүйл шиг л санагдах болсон.

-Гүүглийн төв оффисийн талаарх зураг цахим хуудаснаа тавигдсан байдаг. Ажилчид нь гэртээ байгаа юм шиг, эсвэл аялж байгаа ч юм шиг, заримдаа найз нөхөдтэйгөө цэнгээний газар сууж байгаа мэтээр оффисоо тохижуулсан байдаг. Танай оффис гүүглийнхээс хэр ялгаатай вэ. Ажлын байраа танилцуулаач?

-Анх ажилд ороход хамгийн их таалагдсан зүйлсийн нэг бол оффисын тохижилт байсан. Чөлөөт цагаа өнгөрүүлэх төрөл бүрийн сонирхолтой зүйлс манай оффист бий л дээ. Тархиа амрааж байх хэрэгтэй. Ингэж байж л бүтээлч санаанууд гарна. Манайд фитнесс, иогийн өрөөнүүд бий. Мөн төрөл бүрийн тоглоомууд, өөр өөрийн хэв маягаар тохижуулсан кафе, лоанжууд ч бий. Түүнээс гадна хөгжим сурч, бусдад тоглож өгч болох тайз, хөгжмийн зэмсгүүд ч байдаг. Юу хүссэнэээ хийж, сурч болно.

$\"\"$

-Монголд ажлын найман цаг гэж байдаг шиг самсунгад ч бас ажлын цаг байдаг байх. Эсвэл фейсбүүкийнхэн шиг өдөржин, шөнөжин ажил дээрээ өнжих үү?

-Самсунгийн дэлхий дахины аль ч салбар өдрийн найман цагаар ажиллах дүрэмтэй. Гэхдээ олон янзын уян хатан нөхцлүүд бас байдаг. Жишээ нь өдрийн хүссэн цагтаа ажилдаа ирж, хүссэн үедээ явах боломжтой. Ажлын таван өдөр 40 цагаа яаж хуваарилах нь өөрийн мэдэх хэрэг л дээ. Мөн эмэгтэй ажилчдад зориулсан тусгай амралтын өдрүүд бий. Түүнээс гадна амралтын өдөр ажилласан бол дараа нь хэзээ ч хамаагүй нөхөж амрах боломж бий.

-Сонирхолтой юм аа?

-Тэгэлгүй яах вэ. Ингэж байж л үр бүтээлтэй ажиллах боломж бүрдэж байгаа юм. Түүнээс нэг хэвэнд цутгачихсан мэт өглөө ирээд л орой явдаг бидний бүтээмж буурна шүү дээ.

-Таны ажлаасаа авдаг урам зориг юу вэ?

– Хүний амьдралд ямар нэг байдлаар хүрэх шийдэл гаргаад, тэр нь хүрэх хүмүүстээ хүрэхэд их урам зориг авдаг.

-Үндэстэн дамнасан компанид ажилладаг олон залуусын нэг нь та. Өөрөөрөө бахархдаг уу?

-Үгүй ээ. Харин ч голж байгаа. Цаашид туулах зам урт байна. Би хаана ч хүрээгүй байна шүү дээ.

-Олон орны хүмүүстэй хамтарч ажиллаж байгаа байх. Тэр болгонд зохицож ажиллах хүндрэлтэй байдаг болов уу. Хэрхэн ажиллаж байна вэ?

-Харилцааны ур дүй, тэвчээр, сонсох болон өөрийгөө товч, тодорхой ойлгуулах чадвар гээд нэлээд их зүйлс шаарддаг шүү. Харилцах гэж байгаа хүн рүүгээ бичихээсээ өмнө ядаж тэр хүний ажиллаж буй хэсэгт цаг хэд болж байгаа билээ гэдгийг харахаас эхлээд л харилцаагаа үр дүнтэй болгох алхамуудыг хийж байна.

$\"\"$

-Таны ажлын эерэг тал юу вэ?

-Зөндөө л эерэг талууд байгаа. Жишээ нь технологийн тусламжтайгаар оргүй хоосноос хүн бүрийн хэрэглэж, амьдралаа илүү хялбарчлах боломж олгож буй шийдэл гаргаж байна. Хүмүүст баяр хөөр авчрах бүтээгдэхүүн гаргаж байна гээд л нэрлээд байвал дуусахгүй байх. /инээв/ Мэргэжлээрээ тэр үед л бахархдаг даа.

-Залуу хүний хувьд сурч, судлах зүйлс олон байдаг байх. Гэвч том компани танд өөрийгөө хөгжүүлэх цаг зав өгч байна уу?

-Ер нь цаг зав муутай л байдаг. Гэхдээ байнга л уншиж, сурж байхгүй бол хурдан хоцрогдоно. Тиймээс цаг үетэйгээ хөл нийлүүлж, арай урд нь алхаж байхын тулд өөртөө шаардлага тавиад, өдөрт заавал өөрийгөө хөгжүүлэх цаг гаргадаг.

-Таны зорилго юу вэ?

-Мөрөөдөл, хүсэл бол хязгааргүй. Цаашид хийхээр төлөвлөсөн зүйлс маш их байна. Хүнд хэрэгтэй, амьдрал хөнгөвчилсөн дизайны шийдлүүдийг олон хүнд хүргэхийг зорьж, хүсч байгаа.

-Монголдоо ирж ажиллах хүсэл, сонирхол бий юу?

-Одоогоор Монголд очоод тэгнэ, ингэнэ гэсэн нарийн төлөвлөсөн зүйл алга. Самсунгад ажиллаад дөрөв дэх жилдээ орж байгаа болохоор өөрийгөө хангалттай боловсорсон гэж хараахан хэлж чадахгүй байна.

-Олон Монгол залуучууд дэлхийн компаниудын хөгжилд хувь нэмрээ оруулаад явж байна.Гэвч эх орон руугаа чиглэсэн зүйл ховор байх шиг. Таны хувьд эх орныхоо хөгжилд ийм зүйлээр хувь нэмэр оруулчих юмсан гэж бодож явдаг зүйл байдаг уу?

-Мэдээж хэрэг байлгүй яах вэ. Бүхий л хэрэгцээний бараа бүтээгдэхүүнээ гаднаас авдаг, хүн ам цөөтэй, эдийн засгийн бололцоо тааруу улсын хувьд аж үйлдвэрлэл, боловсролтой иргэд маш их шаардлагатай байгаа. Дизайнер хүний оролцоо олон салбарт хэрэгцээтэй болно. Хувь нэмрээ оруулах цаг ирж байгаа гэдэгт итгэдэг. Гэвч одоогоор миний мэргэжлээр хийх ажил Монголд ховор байх шиг байна.

-Ярилцсанд баярлалаа. Удахгүй эх орондоо ирж, Монголоо дэлхийд таниулах ажилд өөрийн хувь нэмрээ оруулна гэдэгт итгэж байна.

-Үндэстэн.мн сайтын хамт олонд маш их баярлаж байна. Гэрээсээ хол хүний нутагт ажиллаж байгаа бидэнд элэг нэгтэнтэйгээ ярилцаад суух сайхан байдаг. Та бүхний ажилд өндөр амжилт хүсье.

$\"\"$