Д.Цогтбаатар Б.Хурцыг нэр төрд халдаж, онц хүнд хэрэгт гүтгэсэн хэмээн хуулийн байгууллагад хандахаар болжээ

ТЕГ-ын Сөрөг тагнуулын газрын дарга асан хурандаа Д.Цогтбаатар Б.Хурцыг нэр төрд халдаж, онц хүнд хэрэгт гүтгэсэн хэмээн хуулийн байгууллагад хандахаар болжээ. Учир нь Б.Хурц өнгөрсөн даваа гарагт \”Цензургүй яриа” нэвтрүүлэгт орох үеэрээ Д.Цогтбаатарыг германы иргэн М.Клойбер гэгчийн хэрэгт холбоотой, тэр хүний автомашин, гар утсыг хувьдаа авсан хэмээн ярьсан юм.

Энэ талаар түүний өмгөөлөгч Г.Баянбилэг \”Миний үйлчлүүлэгч Д.Цогтбаатар нь бусдын өс хонзонгийн золиос болж 2014 оны аравдугаар сарын 24-ний өдөр Монгол Улсын Эрүүгийн хуулийн 87.1 /Төрийн нууц задруулах/, 149.2 /бусдыг далайлган сүрдүүлэх/ гэмт хэрэгт хилсээр ял шийтгүүлсэн. Энэ хүнд ямар нэг байдлаар ял шийтгэл оноохын төлөө АТГ, ЭЦГ, ТЕГ гэх мэт байгууллагуудын бүхий л хүчийг ашиглан нэг жил гаруй мөрдөн шалгасан. Түүгээр ч барахгүй хамаатан садан найз нөхдийг нь ч нэг бүрчлэн шалгаж, хамаатуулж буруутгаж болох бүх л асуудлаар шалгасны эцэст огт нотлогдоогүй дээрх хоёр хэрэгт хуулиас гадуур ял оноосон юм.  Гэтэл ТЕГ-ын дарга асан Б.Хурц гэдэг хүн 2017 оны арваннэгдүгээр сарын 20-ны өдөр \”С1” телевизийн \”Цензургүй яриа” гэдэг нэвтрүүлэгт орохдоо, манай үйлчлүүлэгч Д.Цогтбаатарыг германы иргэн М.Клойбер гэгчийн хэрэгт холбоотой, тэр хүний автомашин, гар утсыг хувьдаа авсан, мөн энэ хэргийг ЭЦГ-тай хамтран шалгах ажлыг гүйцэтгэж байсан хэмээн гүтгэлээ. Германы иргэний гэгдэх энэ хэргийг урьд нь эрх бүхий байгууллагуудаас 2013-2014 онд бүтэн жил дамнуулан шалгаж, Д.Цогтбаатар холбогдолгүй гэдгийг нь нотолчихсон асуудал.

Б.Хурц нь олон хүн үздэг телевизийн нэвтрүүлэгт оролцохдоо Д.Цогтбаатарын талаар дараахь илт худал гүтгэлгийг нийтэд тараасан. Үүнийг бүр тодорхой тайлбарлая.

Нэгдүгээрт, ТЕГ ба ЭЦГ хамтран Германы иргэний талаар шалгасан, энэ ажлыг Д.Цогтбаатарт даалгаж байсан гэж хэлсэн. Гэтэл ТЕГ-аас Германы иргэн М.Клойберыг дангаараа болон ЭЦГ-тай хамтран шалгах чиглэ-лээр ямар ч ажлын хэсэг байгуулж ажиллаж байгаагүй, Д.Цогтбаатар энэ чиглэлээр ажил үүрэг гүйцэтгэж байгаагүй болохыг нотолсон ТЕГ-ын албан бичгүүд болон бусад нотлох баримтууд байгаа.   Д.Цогтбаатар Германы иргэний автомашиныг унаад, гар утсыг нь бариад явж байсан гэж хэлсэн.

Хэрэв үнэхээр ийм илт нотолгоо байсан юм бол яагаад энэ хүний гэм буруутайг нь тогтоож, хариуцлага тооцоогүй юм бэ. Б.Хурц ийм гэнэн, тэнэг гэмээр зүйл ярьж бусдыг гүтгэж байгаад маш их гайхаж байна. Анх Д.Цогтбаатарыг 2013 онд энэ хэрэгт холбогдуулан зөвхөн автомашин, гар утас биш нэг сая еврог залилан авсан талаар иргэний мэдээлэл байгаа гээд л жил гаран шалгасан боловч худал болох нь нотлогдож хэрэгсэхгүй болгосон. Хэрэгсэхгүй болгосон НПГ-ын прокурор Т.Оргил-Очирын 2014 оны наймдугаар сарын 13-ны 80 тоот тогтоол энэ байна. Хэрэг болсон гэх цаг хугацаанд Д.Цогтбаатар ОХУ-д Академид суралцаж, гэр бүлийн хамт Москвад амьдарч байсан, энэ хэрэгт ямар ч холбогдолгүй болох нь бүх талын баримтаар нотлогдсон.

Харин Б.Хурцын ярианаас үзвэл, 2013 онд Д.Цогтбаатарыг гүтгэж олон сараар хориулж, эцэст нь худлаа болох нь тогтоогдсон энэ хэргийн талаар анх худал мэдээлэл өгч цагдаагийн байгууллагаар тоглосон хүн нь Б.Хурц болох нь одоо л ил болж байх шиг байна. Б.Хурц миний үйлчлүүлэгч Д.Цогтбаатарыг олон нийтийн мэдээллийн хэрэгслээр дахин ноцтой гүтгэлээ” хэмээн ярьсан байна.