Б.Баатарсүх: Бага насны хүүхдэд амин дэмээр баялаг хоол хүнс өгөх хэрэгтэй

$\"\"$

Жилийн энэ үед бага
насны хүүхдүүдийн дунд томуу, томуу төст өвчний тархалт дэгддэг. Томуу үүсгэдэг
вирус жил бүр өөрчлөгддөг бөгөөд гадуур тархаад
буй томуугийн вирусийн тархалт болон
хэрхэн урьдчилан сэргийлэх талаар Нийслэлийн эрүүл мэндийг
газар Албаны дарга Б.Баатарсүхтэй ярилцлаа.

-Ойрын өдрүүдэд хүйтний эрч нэлээд чангарч
байна. Ханиад томууны дэгдэлт хэр байна вэ?

-Хүйтэн сэрүүнтэй холбоотойгоор томуу
өвчлөл үргэлжилдэг. Томуугийн өвчлөл 10, 11
дүгээр сард идэвхждэг. Тэр дундаа бага насны
хүүхдийн өвчлөл нэмэгдэж, эрүүл мэндийн байгууллагын ачаалал
нэмэгддэг. Өнөөдрийн байдлаар
нийслэлийн амбулаторийн үйлчлүүлэгчдийн 4.4 хувь томуугаар
өвдсөн эмчлүүлэгсэд эзлэж байна гэсэн статик мэдээлэл байна. Ерөнхий дөө томуугийн өвчлөл
нэмэгдэж байгаа гэсэн үг. Томуугийн А
болон В вирус 12, 1 дүгээр
сард эргэлтэд ордог. Иймээс эцэг
эхчүүд томуугийн өвчлөлөөс урьдчилан сэргийлж, бага насны хүүхдээ
анхаарал тавих хэрэгтэй.

Ханиад томуу амьсгалын замын өвчин учраас амны хаалтыг тогтмол хэрэглэж байх хэрэгтэй

-Иргэд томуугийн өвчлөлөөс яаж
урьдчилан сэргийлэх вэ?

-Эцэг эхчүүд зайлшгүй мэдэж байх ёстой хэд
хэдэн зүйл байгаа. Үүнийг өөрсдийнхөө амьдралд хэрэгжүүлэх
хэрэгтэй. Томууг дархлаа сул, архаг суурь өвчтэй хүүхэд илүү тусаж
хүндэрдэг. Иймээс эцэг эхчүүд хүүхдийнхээ дархлааг дэмжиж, амин дэмээр баялаг
хоол ундаар тогтмол хооллож байх хэрэгтэй. Тэр дундаа А болон С
амин дэмээр баялаг хоол ундаар тогтмол хооллож байх шаардлагатай.
Мөн нэрс, аньсны ханд, чацаргана, аарц гэх мэт халуун
зүйлийг хүйтний улиралд хэрэглэж байх хэрэгтэй
байна. Эдгээрээс гадна хамгийн чухал зүйл бол идэвхтэй хөдөлгөөнийг
тогтмол хийж байх хэрэгтэй. Идэвхтэй хөдөлгөөн хүний дархлааг
сэргээдэг ач тустай. Мөн сайн унтаж амарч
байх хэрэгтэй. Ажил, амралтаа зөв зохицуулж байх шаардлагатай
байна.

Ханиад томуу амьсгалын замын өвчин учраас амны хаалтыг тогтмол хэрэглэж байх хэрэгтэй. Олон нийтийн
газар болон эмнэлгийн орчинд явахдаа амны хаалтыг
тогтмол зүүж байвал халдвараас өөрийгөө бүрэн хамгаална. Ханиад, томуу ихтэй үед онцын шаардлагагүй бол бага насны хүүхдийг олон нийтийг газраар дагуулж
явахгүй байх хэрэгтэй. Мөн эрүүл ахуйн талаас гарын ариун цэвэр сайн
сахиж, гараа тогтмол савантай бүлээн усаар угаах, гэр орныхоо дотоод
орчныг цэвэрхэн байлгаж, өдөрт 2-3 удаа нойтон цэвэрлэгээ
хийж байх хэрэгтэй.

-Эмнэлгүүдээр томуугийн вакцин хийх боллоо. Энэ вакцин хэр үр дүнтэй вэ?

-Иргэд томуугийн эсрэг
вакцин болон дархлаажуулалт хамрагдах хэрэгтэй. Өндөр настай, бага
насны хүүхдүүд , жирэмсэн эмэгтэйчүүд,
гадаа ажиллаж байгаа хүмүүс
дархлаажуулалт заавал хамрагдах
шаардлагатай. Томуугийн вакцин хийлгэснээр бүтэн жилийн
хугацаанд томуугаас өөрийгөө бүрэн хамгаалах боломжтой. Халдварт
өвчин судлалын үндэсний төвийн сайн дурын
дархлаажуулалтын кабинет томуугийн вакцин хийгдэж
байгаа. Иймээс иргэд ханиаднаас өөрийгөө хамгаалахын тулд сайн дурын
дархлаажуулалт хамрагдах хэрэгтэй.

-Танайхаас ханиад томуунаас урьдчилан
сэргийлэх чиглэлээр ямар ажил хийж байна вэ?

-Ханиад хүрлээ гээд манай иргэд өөрсдийн дураар эмийг ихээр хэрэглэдэг. Тэр
дундаа антибиотик их хэрэглэдэг. Энэ нь олон сөрөг талууд дагуулах эрсдэлтэй. Тиймээс
иргэд аливаа эмийг эмчийн заавраар хэрэглэх хэрэгтэй гэдгийг хэлмээр байна. Эрүүл мэндийн яам,
нийслэлийн Эрүүл мэндийн газраас урьдчилан
сэргийлэх ажлууд хийгдээд явж байгаа.

Баянзүрх дүүргийн Нэгдсэн эмнэлэгт 100 хүүхдийн ортой тасаг нээхээр ажиллаж байна

-Арванхоёр болон нэгдүгээр сард ханиад томуу нэмэгддэг.
Мөн үүнийг дагаад эмнэлгүүдийн орны ачаалал нэмэгдэж, хүрэлцэхгүй байдлаас
болж зарим иргэд кордорт хэвтэн эмчлүүлэх шаардлага гардаг. Танайхаас эмнэлгийн ор
нэмэгдүүлэх асуудал дээр ямар арга хэмжээ авч байна вэ?

-Өнгөрсөн жилүүдэд эмнэлгийн
ор хүрэлцээ муу оочир дараалал их байна гэдэг
шүүмжил иргэдээс нэлээдгүй ирсэн. Энэ жилээс нарийвчилсан төлөвлөгөөгөөр
зохион байгуулаад ажиллаж байна. Мөн нийслэлийн Засаг
даргын А 575 захирамжаар нийслэлийн хэмжээнд урьдчилан сэргийлэх
чиглэлээр арга хэмжээ авч байгаа. Нэгдсэн
эмнэлгийн орыг хэрхэн нэмэгдүүлэх вэ гэсэн ажлыг орон
нутгийн захиргаа, дүүрэг, хороотой хамтарсан төлөвлөгөөгөөр зохион байгуулж ажиллаж байна. Нийслэлийн хэмжээнд ор нэмэгдүүлэх асуудлыг шийдвэрлээд явж байгаа. Тухайлбал,
Баянгол дүүргийн Эрүүл мэндийн төвд 60 ортой
хүүхдийн тасаг шинээр нээсэн. Мөн Налайх дүүрэгт хүүхдийн
50 ортой тасаг нээсэн байгаа. Одоо Баянзүрх дүүргийн Нэгдсэн
эмнэлэгт 100 хүүхдийн ортой тасаг нээхээр ажиллаж байна. Оноос өмнө ашиглалт
оруулахаар ажиллаж байна. Нийслэлийн Засаг даргын Тамгын газар
болон нийслэлийн Эрүүл мэндийн газраас дүүргийн эмнэлгүүдийн Хүүхдийн тасагт 200 ширхэг агаарыг цэвэршүүлэх
төхөөрөмжийг хуваарилж олгосон.

-Ханиад
томуугийн дэгдэлт нэмэгдэхээр Өрхийн эмнэлгүүд уртасгасан цагаар ажилладаг.
Энэ жилийн хувьд өрхийн эмнэлгүүд уртасгасан цагаар ажиллах уу?

-Төвийн зургаан дүүргийн Эрүүл
мэндийн төвүүд зөвлөгөө өгөх цэг ажиллаж байгаа.
Энэ цэг 09:00-22:00 цаг хүртэл ажиллаж байгаа
бөгөөд амралтын өдрүүдэд 10:00-16:00 хүртэл ажиллаж байна.
Мөн дүүргүүдийн хүүхдийн кабинет уртасгасан цагаар
орой 22:00 цаг хүртэл ажиллаж байгаа. Мөн эмч нар нэмэлтээр ажиллаж
байна. Оройн цагаар нэгдсэн эмнэлгийн ачаалал нэмэгдэг учраас хүүхдийн кабинетыг уртасгасан цагаар ажиллаж байна.