Г.Гантөмөр: Намайг АТГ-с шалгаж байгаа гэдэг нь ор үндэслэлгүй худал мэдээлэл

    Стандарт хэмжил зүйн газрын удирдлагууд өнөөдөр тус байгууллагын удирдах албан тушаалтнууд хууль зөрчиж байна гэсэн гомдол мэдээлэл сошиал ертөнцөөр гарсны дагуу мэдээлэл хийлээ. Тус байгууллагын дарга Г.Гантөмөр ”Сүүлийн үед хэвлэл мэдээллийн хэрэгсэлүүд, тэр дундаа сошиал ертөнцөөр манай байгууллагын талаар илт гүтгэлэгийн шинж чанартай мэдээлэл нэлээд гарлаа. Тэр үүднээс  өнөөдөр бид энэ асуудлын талаар тайлбар мэдээлэл хийхээр ирлээ. Манай байгууллагын талаар нэр бүхий сайтууд тухайлбал Zaluu.com, News.mn, Dorgio.mn зэрэг сайтууд дээр илт  гүтгэлэгийн чанартай худал мэдээллийг түгээж байна. Энэхүү үйлдэл нь Монгол улсын Иргэний хуулийн 21-р зүйлийн 21.2 дах хэсэгт Иргэний нэр төр, алдар хүнд, ажил хэргийн нэр хүндийг гутаасан мэдээ тараасан этгээд түүнийхээ үнэн зөвийг нотолж чадахгүй бол эрх нь зөрчигдсөн этгээдийн шаардлагаар уг мэдээг тараасан хэлбэр, хэрэгслээр няцаах үүрэг хүлээнэ гэж заасан байдаг тул бид энэхүү мэдээллийн няцаахыг шаардаж байна. Zaluu.com сайтын 2017 оны 12-р сарын 07 ны өдрийн мэдээнд \”Стандартчилал хэмжил зүйн газрын удирдлагууд хууль зөрчсөн үү”, News.mn  сайтын \”СХЗГ-ын дарга Г.Гантөмрийг шалгаж байна” гэсэн гарчиг бүхий мэдээлэлд  дурьдагдаад байгаа мэдээ материалууд нь ор үндэслэлгүй гүтгэлэгийн шинжтэй байгааг энд баримт тайлбартайгаар хэлэхийг хүсч байна.  

 

   Тухайлбал: Стандарт хэмжил зүйн газрын Хэмжих хэрэгсэлийн шалгалт баталгаажуулалтын газрын дарга Б.Ариунааг хууль бусаар гэнэт ажлаас нь халсан гэж эдгээр сайтуудад гарсан байна. Энд нэр нь дурдагдаад байгаа Б.Ариунаа гэгч эмэгтэй нь манай байгууллагад ажиллаж байсан нь үнэн.  Энэ хүн ёс зүйн ноцтой зөрчил гаргасан учраас энэ оны 12-р сарын 1-нд ажлаасаа халагдсан гэдгийг хариуцлагтайгаар мэдэгдэе. Өмнө нь энэ эмэгтэй манай байгууллагын дүрэм журмыг удаа дараа зөрчиж байсан учраас бид сахилгын арга хэмжээ авч байсан. Гэхдээ энд нэг зүйлийг тодруулж хэлэхэд Б.Ариунаа гэгч энэ эмэгтэй  намайг ээлжийн амралтаа авсан, мөн автомашины аваарт орж Хятадын Бээжин хотод эмнэлэгт хэвтэж байх хойгуур эдгээр гүтгэлэгийн шинж чанартай мэдээллүүдийг ийнхүү тараасан нь тогтоогдсон. Иймээс бид энэхүү асуудлыг шалгуулхаар саяхан хууль хяналтын байгууллагад хандаад байгаа.

 

   Мөн дээр нэр дурдсан сайтуудад Стандарт хэмжил зүйн газрын дарга Г.Гантөмөр тэргүүтэй хэсэг нөхөд сүүлийн жилүүдэд албан тушаалаа урвуулан ашиглаж, ажлын байрны сул орон тоог нөхөх сонгон шалгаруулалтыг шударга бусаар зохион байгуулсан мөн манай байгууллагын удирдах албан тушаалтнуудыг  ар өврийн хаалгаар албан тушаалд томилогдсон мэтээр бичсэн байсан талаар тайлбар хийе.  Г.Гантөмөр миний бие эдгээр хүмүүсийг албан тушаалд томилох ямар ч эрх зүйн үндэслэл байхгүй. Засгийн газрын харьяа агентлагын ажилтан, албан хаагчдыг би биш, Төрийн албаны зөвлөл томилдог гэдгийн та бүхэн мэднэ. Би зөвхөн нэр дэвшүүлэх эрхтэй. Төрийн албаны зөвлөл эдгээр албан тушаалд өрсөлдсөн хүмүүсээс шалгалт аваад АТГ ашиг сонирхлын зөрчилтэй эсэхийг нь шалгаад томилдог. Би өөрөө энэ албан тушаалд хууль ёсны дагуу томилогдсон хүн. Бас намайг Хэмжил зүйн хүрээлэнгийн захирлыг хууль бусаар томилсон гэж гүтгэсэн.  Би юу боллоо гэж тэр хүнийг өөрөө дур мэдэж томилох вэ. Тус хүрээлэнгийн захирлыг Төрийн албаны зөвлөлөөс уг албан тушаалд томилсон.

 

   Мөн манай байгууллагыг Европын холбооны төслийн шугамаар хэвлэгдэн гарсан \”Чанарын Менежментийн Тогтолцоо Шаардлага”, \”Менежментийн тогтолцоонд Аудит Явуулах Заавар Стандарт”-ын товхимолыг борлуулж, орлогыг бэлэн мөнгөөр авдаг, хувьдаа завшдаг гэсэн байсан. Тийм юм ерөөсөө байхгүй.  Мэдээллийг албан ёсны дагуу шалгаагүй байж ингэж хамаагүй мэдээ материал тарааж байгаад үнэхээр харамсаж байна. Эцэст нь СХЗГ-ын нэр бүхий 6 албан хаагч бид эдгээр худал гүтгэлэг тараасан хэвлэл мэдээллийн байгууллага болон уг мэдээллийг тэдэнд дамжуулсан Б.Ариунаа гэгч хүнийг  хууль хяналтын байгууллагад нь шалгуулхаар өгч,  зохих журмынх нь  дагуу хариуцлага тооцуулж, нэр төрөө сэргээлгэхээр хууль хяналтын байгууллагад хандана гэдгээ албан ёсоор мэдэгдэж байна” гэлээ.    

 

 

Ж.Батдорж