Өнөө шөнө тэнгэрт оддын шоу болно

 

2017 оны 12 дугаар сарын 13-14-нд шилжих
шөнө Геминидийн солирын бороо орж, дэлхийн өнцөг булан бүрт харагдана. Энэ гайхамшигт гэрлийн
үзэгдлийг үзэж буй тантай адил сая сая хүмүүс тэнгэр өөд харан зогсож байна гээд та бод доо.

 

Цагт дундажаар 120 орчим солирын
хөдөлгөөнийг олж харах боломжтой. Энэ бол жилд ганц тохиодог үзэгдэл аж. Өдөр
бүр нэгээс, хоёр солирын хөдөлгөөнийг ажиглаж болох хэдий ч энэ үдэш бидний
хэлдгээр сүүлт оддын шоу тоглолт болох гэнэ. 

Тэнгэрт аргамжсан хавирган сар түүний зүг
харвасан мэт сүүлт одод тэнгэрт гайхамшиг бүтээнэ. Геминидийн солирын шүүрлийг 12 дугаар
сарын 4-нөөс, 12 дугаар сарын 16-ны хооронд жил бүр харах боломжтой юм.
Энэ жилийн хамгийн олон солирын шүүрэл болох өдөр нь энэ шөнө тохиож байна. Жил бүрийн хамгийн романтик шөнө ч гэж
нэрлэдэг.

 

Зуны улиралд олон төрлийн солирын бороо орох нь бий. Гэвч үүнийг
зарим улсад харах боломжгүй байдаг. Жишээ нь Персейдийн солирын бороо дэлхийн
хойд өргөрөгт харагддаг учраас Хойд америкчууд, Европын зарим орон, Орос,
Монгол зэрэг улсад амьдарч байгаа хүмүүс л харах боломжтой байдаг байна.

Харин Геминидийн солирын бороо та, таны найз хаана ч
байсан хамаагүй харж болох юм. Гэхдээ солирын бороог гайхамшигтайгаар нь
мэдэрмээр байвал хотоос гарахыг зөвлөж байна. Хотын их гэрэлд зарим гайхалтай
үзэгдлийг анзаарахгүй өнгөрүүлж магадгүй. Мөн хүний нүд харанхуйд дасахын тулд
30-40 минутын хугацааг зарцуулдаг. Тиймээс шууд тэнгэр рүү харахад од харваж
байгаа нь харахгүй. Тэгэхээр нүдээ дасгах хэрэгтэй болж байна. Мөн зориулалтын
дурантай бол бүр л гайхалтай. Зун дулаан боловч, шөнө богино үргэлжилдэг. Харин
өвлийн шөнө урт учраас танд хүсэл л байвал гайхалтай гэрлийн үзэгдэл, тэнгэр
харвах мянга мянган оддыг харах боломжтой юм.