Төв цэвэрлэх байгууламжтай танилцсан түшээдийн төрх бодит байдал хэрхэн байгааг ойлгуулав

 

 

 

Дэлгэцээр нэг л
сайхан инээмсэглэж, бүх зүйл болж байгаа мэтээр ард түмэнд харагддаг Монголын
улстөрийн өнөөгийн томчууд олны шаардлага, бухимдлын улмаас Төв цэвэрлэх
байгууламжийг бүрэн шинэчлэхээр болж энэ дагуу үйл ажиллагаатай нь өөрийн биеэр
очиж танилцав. Угаас ус сувагт 32 жил тасралтгүй зүтгэж, одоо мэргэжлээс
шалтгаалах астма, гамрит өвчинтэйгөө тэмцэж буй ээжийнхээ ажлын үнэн байдал,
бодит төрх, одоо ч санаанаас гардаггүй тэр сонин үнэрийг үнэртсэн гаднын хэн ч
болов хамраа дарж ярвайдгийг мэддэг учир өчигдөр нийслэлийн удирдлагууд тэр сонин
үнэртэй анх удаа биеэрээ танилцаж, Монголын олон мянган хүн хичнээн олон жил
эрүүл, аюулгүй амьдрах эрхээ зөрчүүлж буйг мэдэрснийг сайшаалтайгаар хүлээн
авсан юм. Нийслэлээс холгүй орших Төв цэвэрлэх байгууламжид ЗХУ барьж,
хүлээлгэн өгснөөс хойш техник, технологийн шинэчлэл, дэвшил хийгдэх нь битгий
хэл энэ талаар яриад ч хэрэггүй бөгөөд өнгөрсөн хугацаанд элдэв шинэчлэл,
засвар нэрийн дор өчнөөн мөнгө төгрөг төсөвлөж ирсэн бодит уг хагас зууны өмнөх
шигээ байгааг бодит байдалтай нь танилцсан Ерөнхий сайд Ч.Сайханбилэг,
Нийслэлийн засаг дарга бөгөөд Улаанбаатар хотын захирагч Э.Бат-Үүл, Барилга хот
байгуулалтын сайд, УИХ-ын гишүүн З.Баянсэлэнгэ өөрийн биеэр мэдэрсэн байх. Уг
нь дэлхийн жишигт Төв цэвэрлэх байгууламж гэдэг газар манайх шиг захын гэр
хорооллын айлын задгай жорлонгоос илүү бохир, муухай үнэртэй байдаггүй бөгөөд
хамгийн сүүлийн үеийн дэвшилтэт техник, технологийг хэрэглэж, байнга
шинэчлэгдэж байдаг юм. Харин манайд хагас зуун жилийн өмнөх технологитойгоо
өдийг хүртэл ажиллаж, хотын хорооллуудаас ирсэн бохир усыг шүүж, өтгөнийг нь
шууд ил задгай асган хатааж, шингэнийг нь дахин шүүж, хоргүйжүүлсэн болоод Туул
голд сааралтсан бохир ус шахдаг. Ингэж дэлхийн жишгээс хоцрогдсон аргаар хагас
зуун жил бохир шахуулсан Туул голыг саяхан нэгэнтээ нэгэн эрхэм \”Туул гол
дэлхийн хамгийн том задгай жорлон болж
мэдэхээр байна” хэмээн хэлсэн. Үнэндээ Хатан Туул хүн малыг хордуулах болоод
өчнөөн жил өнгөрсөн бөгөөд гаднынхнаас үхтлээ ичдэг манай томчуудын буянаар
одоо л нэг аврагдах бололтой. Нөгөө талаас Төв цэвэрлэх байгууламжийг тойрсон тус бүрдээ хөл
бөмбөгийн талбай шиг хэмжээтэй өтгөн ил хатаадаг олон газраас үнэртэх үнэр нь
хэрээс хэтэрч зундаа нийслэл хотыг бүрхдэг болсон юм. Ямартай ч, жил жилийн
өдийгөөс өмнө хотын удирдлагууд энэ үнэрийг дарахаар төлөвлөсөн бөгөөд сонгууль,
АСЕМ угтсан ч гэлээ сайхан ажил болох бололтой.