Д.Гантулга: Шалгах бүх боломж нь нээлттэй шүү дээ

УИХ-ын гишүүн Д.Гантулга
өнгөрсөн зургадугаар сард Н гэх бүсгүйг хүчирхийлсэн гэх хэрэгт холбогдсон.
Гэвч Баянзүрх дүүргийн Прокурорын газрын хяналтын прокурор Батбаяр
\”Хүчирхийлсэн нь тогтоогдохгүй байна” хэмээн хэргийг хэрэгсэхгүй болгосон.
Улмаар өнгөрсөн наймдугаар сарын 25-нд уг хэргийн материалыг Улсын ерөнхий
прокурорын газар хянаад эрүүгийн хэрэг үүсгэхээс татгалзах тухай прокурорын
шийдвэрийг цуцлан, сэргээн шалгуулахаар болсон юм. Дахин шалгаж үзэх ёстой гэж
үзсэн энэхүү хэргийн мөрдөн байцаалт дуусах шатандаа орсон гэх мэдээлэл бий. Үүнтэй
холбогдуулан УИХ-ын гишүүн Д.Гантулгын байр суурийг сонирхлоо.

-Таныг яллагдагчаар
татах гэж байгаа тухай мэдээлэл гарсан. Энэ
талаар тодруулахгүй юу?

-Надаас байцаалт aвъя гэхээр нь тайлбар өгсөн ш дээ. Түүнээс
хойш ямар нэгэн тайлбар авсангүй. Хэрвээ дахин тайлбар авах шаардлагатай байна
гэвэл өгнө.

-Таныг хууль хяналтын байгууллага шалгавал
өөрийнхөө хүсэлтээр бүрэн
эрхээсээ татгалзах уу?

– Шалгуулсан. Шалгах бүх боломж нь нээлттэй шүү дээ. Шийдвэр нь гаргаагүй байна. Их олон удаа хойшилсон. Энэ асуудалд улс
төр явж байгаа гэж бодож байна. Гурван шатны прокурорын дүгнэлт хэрэгсэхгүй гэж
гарсан. Харин Улсын ерөнхий прокурор дахин шалгах хэрэгтэй гэж үзсэн юм. Яагаад
гэхээр \”Нийгэмд маргаантай олон асуудал байна. Тиймээс дахин нягталж үзэх
хэрэгтэй байна” гэсэн.

Н.Алт