Үндэсний шигшээ багийн тамирчид 2017 онд медалийн чанар, тоогоор дээд амжилт тогтоов

Улиран одож буй 2017 он
спортын салбарын хамт олны хувьд түүхэнд анхдагч болж бичигдэх олон, олон
амжилт, ялалт авчирсан онцгой жил гэдгээрээ онцлогтой байв.



Биеийн тамир спортын газар /БТСГ/ 19 спортын
төрөлд шигшээ багийн бүрэлдэхүүнтэй бэлтгэл сургуулилтаа тогтмол хийж, дэлхий,
тив, олон улсын тэмцээнүүдэд амжилттай оролцжээ. Үүний үр дүнд энэ жил шигшээ
багийн тамирчид зөвхөн насанд хүрэгчдийн ДАШТ-ээс дөрвөн алт, хоёр мөнгө,
долоон хүрэл нийт 14 медаль хүртсэн хосгүй амжилт үзүүллээ. Харин өмнө нь жилдээ
ДАШТ-ээс найман медаль хүртэж байсан нь дээд амжилтад тооцогдож байсан юм.



Мөн дэлхийн залуучуудын АШТ-ээс хоёр алт, таван
мөнгөн медаль хүртсэн бол Дэлхийн цомын аварга шалгаруулах тэмцээнээс гурван
алт, нэг мөнгө, нэг хүрэл медаль хүртсэн сайхан амжилтыг үзүүлсэн байна. Үүний
зэрэгцээ Оюутны универсиад наадмаас нэг алт, нэг хүрэл медаль хүртэж, Азийн
танхимын наадмаас нэг алт, нэг хүрэл медаль, Ази тивийн АШТ-ээс найман алт, 10
мөнгө, 14 хүрэл медаль хүртсэн байна. Их дуулгаас алт, мөнгө, хүрэл медалийг
тус бүр дөрвийг хүртэж, Гран при тэмцээнээс зургаан алт, таван мөнгө, 11 хүрэл
медаль эх орондоо авчирсан амжилтаар 2017 оныг үдэж байна.



БТСГ-ын Үндэсний шигшээ 2017 онд олон улс, тив
дэлхийн чанартай тэмцээн уралдаан бэлтгэл цугларалт, сургалт дасгалжуулалт,
эмнэлэг хяналтын төлөвлөгөөний дагуу тогтмол оролцож, өвөл зуны спортод нийт
358 дасгалжуулагч, тамирчин хамрагдаж байна.



Үндэсний шигшээ багийн тамирчид олон улсын
чанартай 66 тэмцээн уралдаанд оролцож, дотоодын 43 бэлтгэл цугларалт, гурван
удаагийн хамтарсан бэлтгэлд хамрагдаж 35 алт, 29 мөнгө, 57 хүрэл медаль
хүртжээ. Тухайлбал, жүдо бөх 12 алт, 12 мөнгө, 27 хүрэл, чөлөөт бөх таван алт,
таван мөнгө, 16 хүрэл, хүндийн өргөлт зургаан алт, таван мөнгө, хоёр хүрэл,
пара пауэрлифтинг хоёр алт, нэг мөнгө, бокс нэг алт, хоёр мөнгө, зургаан хүрэл,
таеквондо хоёр мөнгө, гурван хүрэл, хөнгөн атлетик гурван алт, нэг мөнгө, хоёр
хүрэл, пара таеквондо дөрвөн алт, нэг мөнгө, нэг хүрэл медаль хүртсэн байна.
Энэ гаргасан амжилтууд нь ирэх жилүүдэд ч дурсагдаж, энэ цаг үеийн шилдэг
тамирчдаар бахархах нь тодорхой.



Монголын спортын төрлүүдээс 2017 онд жүдочид
түүхэндээ байгаагүй олон медалийг ДАШТ-ээс нэг дор хүртсэн юм. Мөн ОУХМ
М.Анхцэцэг хүндийг өргөлтийн спортын төрөлд ДАШТ-ий анхны медалийг эх орондоо
авчирлаа. Мөн 3х3 сагсан бөмбөгийн баг тамирчид Ази тивийн АШТ-д түрүүлсэн,
Б.Ачбадрах цанын \”Б\” зэрэглэлийн ДАШТ-ээс хүрэл, пара таеквондогийн
тамирчин Х.Энхтуяа ДАШТ-ээс алтан медаль эзэн /Монголын пара спортын түүхэнд
анхны эмэгтэй дэлхийн аварга/ болсон зэрэг бахдам амжилтууд нь Монголдоо
анхдагч болж байна.