БНСУ-ын Сөүл хот, Ёжү хотын Боловсролын газар, Улаанбаатар хотын Боловсролын газрын хамтын ажиллагааны хүрээнд нийслэлийн Засаг даргын Нийгмийн хөгжлийн асуудал хариуцсан орлогч Ш.Анхмаагаар ахлуулсан баг Сөүл хотын Боловсролын Монгол, Солонгосын хамтын ажиллагааны хүрээнд хоёр хотын боловсролын салбарын бүтээлч санал, санаачилга, үйл ажиллагааг дэмжин, түгээн дэлгэрүүлэх, харилцан туршлага солилцох, харилцаа, хамтын ажиллагааг хөгжүүлэх зорилгоор хийсэн уг айлчлал боловсролын салбарын тэгш бус хүртээмжийг арилгах, тус улсын туршлагаас суралцаж, илүү үры дүнтэй ажиллах шинэ боломжуудыг судалсан, үр ашигтай айлчлал боллоо.
![\"\"](http://undesten.mn/wp-content/uploads/2017/12/1513736936_bd4c18f5827d1ca7efec8fd247f8a12a.jpg "\\"\\"")
БНСУ-ын Боловсролын газрын дарга Чу Хи Ёнь төлөөлөгчдийг хүлээн авч уулзаад санал бодлоо солилцон, цаашид илүү өргөн хүрээнд хамтран ажиллахаар тохиролцлоо. Төлөөлөгчид Сөүл хотын Боловсролын газрын номын сангаар айлчиллаа. Номын санд орон орны ном, сурах бичиг байсан ба нийслэлийн Засаг даргын Нийгмийн хөгжлийн асуудал хариуцсан орлогч Ш.Анхмаа тус хотод суралцдаг монгол хүүхдүүддээ зориулж ерөнхий боловсролын бага ангийн сурах бичгийн багцыг номын санд хандивлахаар болсон.
Түүнчлэн Сөүл хот дахь Монгол сургуулийн үйл ажиллагаатай танилцаж, тус сургуулийн захирал И Ган Э-д талархлаа илэрхийллээ. Тус улсад ажиллаж амьдарч байгаа монголчуудын тулгамдсан асуудлын нэг нь хүүхдүүдийн боловсролын талаарх асуудал байдаг. Энэ тал дээр харамгүй сэтгэл гаргаж, тусалж байгаад талархаад хүүхдүүдэд сурлагын өндөр амжилт хүссэн юм.
Мөн энэ үеэр нийслэлийн Боловсролын газраас санаачлан Сөүл хотын Самюк эрүүл мэндийн их сургууль, Ёжү хотын их сургуультай хамтын ажиллагааны хүрээнд ерөнхий боловсролын сургуулийн 37 удирдах ажилтныг мэргэжил дээшлүүлэх сургалтыг БНСУ-д зохион байгууллаа. Сургалтад хамрагдсан удирдах ажилтнууд хөтөлбөрийн дагуу БНСУ-ын боловсролын тогтолцоо болон боловсролын салбарт гарч буй ололт амжилт, шилдэг туршлагатай танилцах танхимын сургалтад хамрагдахаас гадна БНСУ-ын тэргүүний сургууль, цэцэрлэгүүдээр зочилж үйл ажиллагаатай нь газар дээр нь танилцлаа. Мөн Монгол Солонгосын боловсролын байгууллагуудын хооронд шууд харилцаа хамтын ажиллагаа тогтоох бүтээлч ярилцлагууд өрнөж байлаа гэж нийслэлийн Боловсролын газраас мэдээллээ.
