Монголын барилгын салбарын мэргэжлийн төрийн бус байгууллагууд нэгдэн нийлж, хамтран сургалт явуулах, зэрэг дэв тогтоох, тусгай зөвшөөрөл олгох зэрэг Төрийн байгууллагын зохион байгуулах зарим чиг үүргийг хэрэгжүүлэхээр болсонтой холбоотойгоор салбарын гол төлөөлөл болсон мэргэжлийн холбоод хэвлэлийн бага хурлаар дамжуулан олон нийтэд мэдээлэл өгсөн юм.
Тэд, Засгийн газраас мэргэжлийн төрийн бус байгууллагуудыг чадавхжуулах, дэмжих, төрийн захиргааны байгууллагуудын үйл ажиллагааг ил тод, нээлттэй болгох, төрийн захиргааны төвлөрлийг сааруулах зорилгоор төрийн зарим чиг үүргийг мэргэжлийн төрийн бус байгууллагуудад шилжүүлэх арга хэмжээг авч хэрэгжүүлж байгаа нь дэлхий нийтийн чиг хандлагад нийцсэн, цаг үеэ олсон арга хэмжээ болж байна гэдгийг мэдээлэл өгөхдөө онцолж байлаа.
Цаашлаад, барилгын салбарын төрийн чиг үүргийг мэргэжлийн төрийн бус байгууллагуудаар хэрэгжүүлэх тухай Засгийн газрын холбогдох шийдвэр, УИХ-аас хууль гарсан ч тус ажлыг зохион байгуулах, шилжүүлэх үйл ажиллагаа удаашралтай байсаар ирсэн. Харин шинээр томилогдсон УИХ-ын Гишүүн, Барилга, хот байгуулалтын сайд Х.Баделхан тус асуудлыг даруй шийдвэрлэж бодитой ажил хэрэг болгож буйд барилгын салбарын төрийн бус байгууллагууд талархалтай байгаагаа илэрхийлсэн юм.
Дээрх асуудлаар Монгол Улсын Барилга, хот байгуулалтын яамнаас энэ оны 12 дугаар сарын нэгний өдөр холбогдох хууль, тогтоомжийн дагуу барилгын салбарын Төрийн зарим зохион байгуулах чиг үүргийг хэрэгжүүлэх мэргэжлийн төрийн бус байгууллагыг сонгон шалгаруулах Сонгон шалгаруулалтыг зарласан билээ.
Хэвлэлийн бага хуралд оролцсон ТББ-уудын төлөөллийн мэдэгдлээс хүргэвэл,
Монголын барилгачдын нэгдсэн холбооны ерөнхийлөгч М.Батбаатар: Барилгын салбарын төрийн бус байгууллагууд, мэргэжлийн холбоодод төрийн захиргааны зарим чиг үүргийг шилжүүлэн өгөх тухай олон жил яригдсан асуудлыг шийдэхээр харилцан ярилцлаа. Бид нэгдсэн эв нэгдэлтэй, нэг зорилготой, нэг зохион байгуулалттайгаар асуудлыг шийдэж, Барлга, хот байгуулалтын яамны саяхан зарласан сонгон шалгаруулалтын хүрээнд хамтарч ажиллахаар болсныг олон нийтэд албан ёсоор мэдэгдэж байна. Энэхүү хуралд ТББ-ын гол төлөөлөл Монголын барилгын үндэсний ассоциаци, Монголын барилгачдын нэгдсэн холбоо, Монголын барилгын инженерүүдийн холбоо, Монголын барилгын гүйцэтгэгч байгууллагуудын холбоо, Барилгын төсөвчдийн холбоо, Барилгын зураг төсөл зохиогчдын холбоо, Барилгын инженер-геологичдын холбооны тэргүүд хүрэлцэн ирж, ийнхүү мэдээлэл өгч байна.
Монголын барилгын үндэсний ассоциацийн гүйцэтгэх захирал Г.Нэмэхбаатар: Засгийн газраас улс орны эдийн засгийн тулгамдсан гол асуудлуудад нэлээд анхаарал хандуулж, бодитой шийдвэр гарган ажиллаж байгаад нь манай барилгын салбарынхан баяртай байна. Шинэ он гаргаад нийслэл хотын Төв цэвэрлэх байгууламжийн асуудлыг шийдвэрлэх, ипотекийн зээл олголтыг үргэлжлүүлэхэд салбарынхантайгаа уялдаа холбоотой ажиллах, гэр хорооллын дахин төлөвлөлтийн дэд бүтцийн төслийг гадны хөнгөлөлттэй зээлээр хэрэгжүүлэх гээд хэд хэдэн чухал ажлыг эхлүүлж байна. Эдгээрээс гадна Төрийн захиргааны байгууллагын зарим чиг үүргийг ТББ-уудад шилжүүлэх нэг чухал ажил байсан. Өөрөөр хэлбэл, барилга угсралтын ажил гүйцэтгэх, зураг төсөв хийх, өргөн тээвэрлэх машин механизм ашиглах тусгай зөвшөөрлийг төрийн байгууллага хариуцаж, өнгөрсөн хугацаанд нэлээд асуудал дагуулсаар ирснийг шийдэхээр ажиллаж байгаа юм. Үүний хүрээнд Барилгын тухай хуулийн дагуу мэргэжлийн ТББ-уудын дунд сонгон шалгаруулалт зарлаж байгаа.
Манай улсад ерээд оноос хойш салбарынхныгаа нэгтгэж, тогтвортой ажиллаж ирсэн Монголын барилгачдын нэгдсэн холбоо, нөгөө талаас барилга бүтээн байгуулалтын ажлын 80 гаруй хувийг гүйцэтгэж буй компаниудын нэгтгэл болсон Монголын барилгын үндэсний ассоциаци, Монголын барилгын инженерүүдийн холбоо, Монголын барилгын гүйцэтгэгч байгууллагуудын холбоо, Барилгын төсөвчдийн холбоо, Барилгын зураг төсөл зохиогчдын холбоо нэгдэж, чиглэл тус бүрээрээ зохион байгуулагдаж мэргэжлийн ТББ-уудад тэрхүү чиг үүргийг шилжүүлэн өгөхөд БХБЯ-ны удирдлагуудтай хамтран ажиллах шийдэлд хүрч байна. Бид энэ ажлыг төрийн өмнөөс салбарынхныхаа үйл ажиллагаатай уялдуулж, ил тод нээлттэй, шуурхай, эмх цэгцтэйгээр зохион байгуулж ажиллах болно гэдэгтээ итгэлтэй байна.
Монголын барилгачдын нэгдсэн холбооны ерөнхийлөгч М.Батбаатар: Барилгын салбарын төрийн чиг үүргийг мэргэжлийн холбоодод ийнхүү шилжүүлэн өгч байгаагаас томоохон байр суурь эзэлж байгаа сургалт, мэргэжил дээшлүүлэх, зэрэг дэв олгох, ажилтнуудын асуудлыг хамтын хүчээр нэгдсэн зохион байгуулалттайгаар, эв нэгдэлтэйгээр Барилгын хөгжлийн төвийн одоогийн бүтцийг задлахгүйгээр хамтран ажиллах зарчимд тулгуурлан үе шаттайгаар шийдэж ажиллахаар болж байна.
Барилгын зураг төсөл зохиогчдын холбооны ерөнхийлөгч Н.Дорж: Барилгын салбарын тусгай зөвшөөрөл олгох үйл ажиллагаа, мэргэжил дээшлүүлэх, зэрэг дэв олгох сургалтыг ТББ-ууд гэрээгээр гүйцэтгэх шийдэл гарах гэж байна. Тусгай зөвшөөрөл олгох үйл ажиллагаа нэлээд асуудал, шүүмжлэл дагуулж байсан. Манай холбооны зүгээс тусгай зөвшөөрөл барилгын салбарт хангалттай олон байна, үүнийг чанаржуулахад анхаарах нь зүйтэй гэж үзээд бусад холбоодтойгоо хамтран ажиллаж чадвал тодорхой үр дүнд хүрч чадна. Түүнчлэн одоо барилгын салбарт тулгараад буй хямрал нь бидэнд асуудалд бодит дүгнэлт хийх, илүүдэл зардлаа танах, салбарын хөгжилд ямар өөрчлөлт хийх шаардлага тулгарч байгааг бодож үзэх боломж гэж сайн талаас нь харах хэрэгтэй. Ер нь аливаа улс орны хөгжил хүний хөгжлөөс хамаардаг. Тэгэхээр барилгын салбарт мэргэжилтэй ажиллах хүчин, инженер техникийн ажилтнууд ихээхэн чухал байр суурь эзэлдэг учраас мэргэжил дээшлүүлэх, зэрэг дэв олгох сургалтууд бол салбарын хөгжлийн үндсэн хөгжлийн түлхүүр юм. Салбартаа дор хаяж 30 жил ажиллачихсан туршлагатай, мэргэжлийн өндөр ур чадвартай инженерүүд, хувь хүмүүс, албан байгууллагууд, компаниуд бий. Тэднийг салбарын тулгамдсан асуудлуудыг шийдвэрлэхэд татан оролцуулъя гэж олон жилийн турш яригдсан асуудлыг шийдвэрлэж байгаад талархаж байна. Бид бүгд гар нийлэн нэг баг болж, хамтран ажиллаж байж энэ хямралыг даван туулж, цаашид салбараа хөгжүүлж чадна гэсэн байр суурьтай байна.
Барилгын төсөвчдийн холбооны УЗ-ийн гишүүн Д.Санж: Өнөөдөр барилгын төсвийн үнэ бодлого нэлээд учир дутагдалтай, эмх замбараагаа алдсан талаар удаа дараа ярьж байгаа. Барилгын тухай хуулинд энэ чиглэлийг тусгайлан бүлэг болгон оруулж цэгцлэх шаардлага тулгарсны дагуу сургалт, төсөвчдийн ерөнхий техник тогтоох ажлыг мэргэжлийн ТББ-д шилжүүлж байна. Энэ асуудлыг хуулийн хүрээнд бодлого зохицуулалтыг нь барьж, төсөвчдийнхөө итгэл найдварыг алдахгүй ажиллана гэдэгтээ итгэж байна. Компанийн биш, хувь хүчний гишүүнчлэлтэй байгууллага учраас манай холбоо нэгдсэн удирдлагагүй байсан байдал цэгцэрч, одоо эмх цэгцэндээ орох байх.
Манай улсын хувьд өмнө нь Зам тээврийн яам, Байгаль орчин, аялал жуулчлалын яамнаас өөрсдийн зарим чиг үүргийг салбарын мэргэжлийн төрийн бус байгууллагад гэрээний үндсэн дээр шилжүүлж, амжилттай хэрэгжүүлж байгаа туршлага байгаа билээ. Харин Барилга, хот байгуулалтын салбарын хувьд мэргэжлийн нарийн төвөгтэй олон үйл ажиллагаа шаардлагатай байдгаас гадна тухайн чиглэлээр үйл ажиллагаа явуулдаг олон мэргэжлийн төрийн бус байгууллагууд байдгаараа өвөрмөц онцлогтой юм.
Тийм ч учраас барилгын салбарын мэргэжлийн төрийн бус байгууллагууд Барилга, хот байгуулалтын яамнаас зарласан энэхүү сонгон шалгаруулалтын үйл ажиллагаанд нэгдсэн бодлогын дор нэгдэж, харилцан нэг нэгнээ дэмжиж хамтран оролцож байгаа нь яамнаас баримталж буй чиг хандлага, бодлоготой ч нийцэж байгааг хэвлэлийн бага хуралд оролцсон төлөөллүүд онцолсон юм.
Барилгын салбарын мэргэжлийн төрийн бус байгууллагууд төрийн чиг үүргийг хамтран хэрэгжүүлэх гэж буй нь Монгол Улсын хэмжээнд энэ чиглэлийн төрийн чиг үүргийг мэргэжлийн төрийн бус байгууллагууд хамтран хэрэгжүүлж байгаа анхны тохиолдол болох гэж байгаа бөгөөд тухайн чиг үүргийг мэргэжлийн өндөр түвшинд амжилттай хэрэгжүүлэх боломж бүрдэж байгаа. Түүнчлэн ийнхүү Монгол Улсын Засгийн газар, холбогдох яамдаас өөрсдийн хэрэгжүүлдэг төрийн чиг үүргийг салбарын мэргэжлийн төрийн бус байгууллагуудад шилжүүлэх гэж байгаа нь тухайн төрийн үйлчилгээг ард иргэд, аж ахуйн нэгжүүдэд түргэн шуурхай, хүндрэл чирэгдэлгүй хүртээх, мэргэжлийн төрийн бус байгууллагуудыг чадвахжуулах, төрийн захиргааны зүгээс салбарын бодлого, төлөвлөгөөг оновчтой тодорхойлох зэрэг боломжуудыг тус тус бүрдүүлэх болно гэдгийг тэд мэдэгдлээ.
Эх сурвалж: Барилга.мн
