![\"\"](http://undesten.mn/wp-content/uploads/2017/12/1514337446_p.jpg "\\"\\"")
Японы мэргэжлийн сумо бөхийн холбооноос өнөөдөр нэгдүгээр сард Токио хотноо болох Хацү башёгийн банцүкэг гаргажээ.Хацү башё ирэх 2018 оны нэгдүгээр сарын 14-нд Кокүгикан ордонд болно. \”Харүмафүжи болон Таканоива” асуудлын улмаас Их аварга /ёкозүна/ Харүмафүжи зодог тайлснаар \”Дөрвөн ёкозүнагийн үе” жил хүрэлгүй дуусгавар болов. Энэ хооронд аваргууд дөрвүүлээ нэгэн зэрэг тэмцээнд оролцсон удаа нэг ч гараагүй юм.
Харүмафүжи зодог тайлсан бол харин өнгөрсөн башёд зодоглоогүй хохирогч Таканоива маэгаширагийн 8-аас жюүрёогийн 3 хүртэл унасан байна. 21 настай залуу бөх Такакэйшёо Комүсүби цол хүртэж, өрсөлдөгч Ооношёотой цол зэрэгцлээ. Тэрбээр, Таканохана дэвжээний анхны санякү болж байгаа юм. Хэвлэлийн хурал дээр Таканохана ояката ирээгүй тул Такакэйшёо ганцаараа сэтгүүлчдийн өмнө гарч ирсэн. \”Дараагийн зорилго сэкивакэ цол. Нэг нэг алхмаар дээш ахина. Санякүд дэвшээд үнэхээр баяртай байна. Сүмоч болгон энэ цолыг авахыг хүсдэг” гэж ярилаа. Шинэ банцүкэгээр Озэки асан Тэрүнофүжи маэгаширагийн 10 хүртэл буусан бол Тамаваши 3 башёгийн дараа сэкивакэ цолоо эргүүлэн авлаа.
\”Хацү башёгийн банцүкэг Их аварга Хакүхо манлайлсан. Ирэх тэмцээн бол түүний хувьд ёкозүна цолтой барилдах 63 дахь башё нь бөгөөд Ёкозүна Китаноүмитэй зэрэгцэх юм. Харин дараагийн тэмцээнээс эхлээд энэ тоо 64 болж, их аварга Хакүхо мэргэжлийн сумо бөхийн бас нэг рекордыг эзэмших болж байна. Энэ хоёр Их аваргын араас Чиёонофүжи 59, Тайхо 58, Таканохана 49 башё ёкозүна цолтой барилдсан амжилтаар жагсаж байгаа юм. Аби, Рюүдэн нар дээд зиндаанд анх удаагаа дэвшиж, Соококүрай, Ишиүра, Ютакаяма нар макүүчид буцан ирнэ. Миторюү Б.Төрболд жюүрёод дэвшсэн нь энэ банцүкэгийн бас нэгэн онцлог болов. Миторюү \”Нишикидо” дэвжээний анхны цолтой бөх, Монголоос төрсөн 33 дахь сэкитори болж байна. Эхний өдрүүдэд зиндаандаа дасаад ирвэл сайн барилдаж, жюүрёог хэдхэн башёд туулах боломж түүнд бүрэн бий. Дайшёохо Р.Шижирбаяр ч дахин жюүрёод дэвшсэн тул энэ зиндаанд манай 6 бөх барилдана. Буур Жамьяан аваргын удам, Монгол Улсын харцага Г.Батбаярын хүү Б.Анхбаярын нэр анх удаагаа банцүкэд гарлаа. Тэр жонокүчигийн 18-аас барилдана” хэмээн спортын сэтгүүлч M.Сугар-Эрдэнэ онцолж байна.
![\"\"](http://undesten.mn/wp-content/uploads/2017/12/1514337802_1505959308_1505438315_21691060_1921722674762477_912024591_n.jpg "\\"\\"")
