![\"\"](http://undesten.mn/wp-content/uploads/2018/01/1514780957_tax-hike-copy.jpg "\\"\\"")
Өнөөдрөөс буюу 2018 оны нэгдүгээр сарын 1-нээс гурван төрлийн татвар нэмэгдэж буй. Ямар, ямар татвар нэмэгдэж байгааг танд хүргэе.
-Өнөөдрөөс эхлэн 3 хүртлэх насны хүүхдээ асарч гэртээ суугаа эхчүүдэд сар бүр 50 мянган төгрөгийн цалин олгоно. Мөн 3 болон түүнээс дээш хүүхэдтэй өрх улиралд нэг удаа 240 мянган төгрөгийн тэтгэмж авах юм. Ээжүүдийн нийгмийн даатгалын шимтгэл төлсөн хугацаа төрүүлсэн хүүхдийнхээ тоогоор 1.5 жилээр нэмж тооцогдоно. Энэ хууль тэтгэвэрт гарах гэж байгаа ээжүүдэд мөн өнөөдрөөс үйлчилж эхлэх юм.
-Тэтгэврийн насны үечлэл мөн өнөөдрөөс хэрэгжиж эхэлнэ. Өмнө нь эрэгтэй 60 настай тэтгэвэрт гардаг байсан бол өнөөдрөөс эхлэн хэрэгжиж байгаа шинэ хуулиар 60 нас 6 сартайгаас тэтгэвэрт суух эрх үүснэ. Харин эмэгтэй 55 нас 6 сар, 50 нас 6 сартайгаас тус тус тэтгэвэрт гарах эрх үүсч байна. Ийнхүү тэтгэврийн нас 2037 оныг хүртэл 6 сараар нэмэгдсээр, эрэгтэй, эмэгтэй хүмүүс 65 насандаа тэтгэвэрт суух эрх үүсэх юм байна.
-Мөн өнөөдрөөс эхлэн малчдын тэтгэврийн нас 5 жилээр наашилж байна.
-Өнөөдрөөс эхлэн Монголбанк алт худалдан авахдаа Лондоны Үнэт Металлын Зах дээр хамгийн сүүлд тогтоосон үнээс 2 ам.долларыг хасч тооцно. Өнгөрсөн онд тус банк 117 аж ахуйн нэгжээс 7.2 тонн буюу 37 хувь, 216 иргэнээс 12.4 тонн буюу 63 хувь, нийт 19.6 тонн алт худалдан авчээ. Үүнээс 19.4 тонн алтыг цэвэршүүлж, 692 сая америк доллараар гадаад валютын нөөцийг нэмэгдүүлжээ.
-\”Олон улсын валютын сан”-тай харилцан тохиролцсоны дагуу төсвийн орлогыг нэмэгдүүлэх үүднээс өнөөдрөөс эхлэн 3 төрлийн татварын орчинд өөрчлөлт орж байна.
Архи, тамхины онцгой албан татвар:
Архи, тамхи, согтууруулах ундааны онцгой албан татвар 10 хувиар нэмэгдэж байна. Мөн шатахуун, дизель түлшний онцгой албан татвар нэмэгдэж байна.
Хувь хүний орлогын албан татвар:
Хувь хүний орлогын албан татварын шатлалыг цалин хөдөлмөрийн хөлс болон түүнтэй адилтгах хөдөлмөр эрхлэлтийн орлогод 2018 оны нэгдүгээр сарын 1-ний өдрөөс эхлэн 10-25 хувиар 4 шатлал бүхий татвар ногдуулна. Ингэснээр өндөр орлоготой иргэдийн татварын ачаалал нэмэгдэхээр байна. Тухайлбал, сарын 2.5 сая төгрөгийн орлогод 11.2 хувиар, сарын дөрвөн сая төгрөгийн орлогод 15.1 хувиар татвар ногдож байна. Одоогоор 900 мянга орчим татвар төлөгч бүртгэлтэй байгаа бөгөөд нийт татвар төлөгчдийн 92 орчим хувь нь 10 хувиас бага татвар төлөхөөр, үлдэх 8 гаруй хувь нь татварын шатлалд хамрагдаж 10 хувиас их татвар төлөхөөр байгааг Сангийн сайд мэдээлсэн.Тус татвараас төсвийн орлого 2018 онд 51.5 тэрбум төгрөгөөр нэмэгдэх ажээ.
Түүнчлэн, хувь хүний орлогын албан татварын хөнгөлөлт одоогийн хуулиар 84 мянган төгрөг байгааг 2018 онд 120 мянган төгрөг, 2019 онд 160 мянган төгрөг, 2020 онд 200 мянган төгрөг, 2021 онд 240 мянган төгрөг болгон хөдөлмөрийн хөлсний доод хэмжээтэй уялдуулан үе шаттай нэмэгдүүлэхээр болсон. Хувь хүний орлогын албан татварын хөнгөлөлтийн хэмжээг 240 мянган төгрөг болгож нэмэгдүүлснээр сарын 1.8 сая төгрөгийн цалин болон түүнтэй адилтгах орлоготой иргэдийн татварын ачаалал буурах бөгөөд хөдөлмөрийн хөлсний доод хэмжээгээр цалинжиж байгаа иргэд татвар төлөхгүй юм байна.
Нийгмийн даатгалын сангийн шимтгэлийг нэмэгдүүлэх:
Нийгмийн даатгалын сангийн шимтгэл нэг хувиар нэмэгдэж, нийтдээ 8 хувь болж байна. Түүнчлэн авч байгаа цалингийн шатлалаас хамаарч, хувь орлогын албан татвар 10-25 хувиар нэмэгдэж байна.
