АН УИХ-ыг тараах хүртэл тэмцлээ үргэлжлүүлнэ

 

    АН-аас өнөөдөр хэвлэлийн хурал хийлээ. Тус намаас УИХ, Засгийн газарт
татварын нэмэлтийг эргэн харж, агаарын бохирдлыг бууруулах арга хэмжээг
яаралтай шийдвэрлэхийг  шаардсан
мэдэгдлийг хүргүүлхээр болсон байна. Тус намын дарга С.Эрдэнэ хэлэхдээ  \”2017 оны 9-р сард Монгол улсын гадаад өр 24.9 тэрбум ам долларт тэнцэж байсан. Монгол улсын гадаад өр нэг жилийн дотор 2.4 тэрбум доллараар нэмэгдсэн байгаа. Энэ
их мөнгө хаачив? Энэ мөнгийг юунд зарцуулав?  Чингис бондыг нугалсан хэмжээний ам долларын
өр тавигдсан байна. Энэ их мөнгө хаашаа гарсан бэ?  Монгол банк 2.4 тэрбум долларын валютын
нөөцтэй болсон гээд гайхаад шагшраад магтаад байдаг. Эдийн засгийн өсөлт 5.3
хувь хүрлээ гээд Засгийн газар мэдэгдээд байна. Яг бодит амьдрал дээр ард
иргэдийн амьдралд орж байгаа бодит орлогийн өсөлт ерөөсөө байхгүй байна. Ард иргэдийн
халаасанд орсон мөнгө байхгүй байгаа. Тийм учраас бид ЗГ-т энэ шаардлагыг тавьж
байна. Ер нь АН өнгөрсөн хугацаанд энэ асуудлаар ямар ч мэдэгдлийг огт
хийгээгүй явж ирсэн. Бид өнөөдөр монголын ард түмний сонголтыг хүндэтгэж тэдэнд
ажиллах бололцоог нь гаргаж өгсөн. Аливаа юманд хэмжээ хязгаар байдаг. Үнэхээр
эрх баригчид  дэндүү даварч байгаа. Тэд өнөөдөр
Монголын ард түмнийг хамгаалах өмгөөлөх хүнгүй юм шиг ямар ч татвараар
дарамталж болно гэдэг ийм даварсан сэтгэхүйгээр асуудалд хандаж байгаа учраас
АН дуугүй суух эрхгүй болоод энэ мэдэгдлийг хийж байна. Тийм учраас бид ард
түмнийхээ талд зогсож тэднийг өмгөөлж хамгаалах үгээ хэлэх ёстой гэж үзсэн учир
энэнхүү шаардлагыг тавьж байна.

 

Эрдэнэтийн 49 хувийг төр авна гэж Засгийн газар саяхан
мэдэгдсэн.  Энэ тал дээр АН ямар байрь
суурьтай байгаа вэ? Д.Мурат гишүүний талаар тайлбар хийнэ үү?

 

Өнөөдөр шүүхийн
шийдвэрийг Засгийн газар нь үгүйсгээд хувийн өмчид дур мэдэн халддаг практик
Монголд тогтчихоод байна. Эрдэнэтийн 49 хувиас гадна 51 хувийн асуудал нь бас тун
бүрхэг байгаа. Тэр 51 хувь нь өмнөх Засгийн газрын алдаатай бодлогын улмаас
өнөөдөр Өмнөд Африкийн \”Стандарт банк”-ны барьцаанд байгаа нь тодорхой болсон.  Мөн Эрдэнэт дээр өнөөдөр 130 сая орчим  ам долларын өр авлага үүсчихээд явж байна.
Бидний үзэж байгаагаар эрх баригчид ямар нэгэн аргаар Эрдэнэтийн 49 хувийг нийгмийн
анхааралд хандуулаад үлдсэн 51 хувийг нь нууж хаацайлах гэсэн ийм бодлого хийгээд
 байна уу даа гэж харж байна. Шаардлага
гарвал бид энэ асуудал дээр тодорхой ажлын хэсэг гаргаж оролцох болно. Өнөөдөр
У.Хүрэлсүхийн Засгийн газар олигтой үйл ажиллагаа явуулж чадахгүй байна. Эрх
баригчид нийгмийн уур бухимдлыг зохиомлоор зогсоож, худлаа хий хоосон нүд
хуурсан шийдвэрүүд гаргаж байгааг олон түмэн харж байгаа. Бид У. Хүрэлсүхийн Засгийн
газар сайн ажиллаж байвал дэмжинэ. Харин муу ажиллаж байвал хариуцлага тооцно. МАН
өмнөх сонгуулиар амласан амлалтаа ерөөсөө биелүүлэх сонирхолгүй байна. Шаардлагатай
бол бид өнөөгийн УИХ-ыг тараахын төлөө   явах болно гэв. Тэд шаардлагынхаа хариуг ирэх
хоёрдугаар сарын 1-ний дотор авах бөгөөд хэрвээ шаардлагыг хүлээж авахгүй бол
тэмцлийн хурц хэлбэрт шилжинэ гэдгээ онцолсон юм. Д.Мурат гишүүний хувьд удахгүй тайлбар хийх бодолтой байгаа. Үүнээс өөр зүйл хэлж чадахгүй нь.  

 

 

Ж.Батдорж