О.Чулуунцэцэг: Г.Номуундарь охин мансууруулах бодис хэрэглэдэггүй нь тогтоогдсон

Г.Номуундарь өөрийн
фэйсбүүк хуудсаараа дамжуулан эрх бүхий албан тушаалтны хүүхдүүд хар тамхи
хэрэглэдэг тухай болон өөрийгөө хүчирхийлэлд өртсөн гэх мэдээлэл тарааж, энэ асуудал олны анхаарлын төвд ороод байгаа билээ.
Харин энэ хэргийн талаар Г.Намуундарь охины өмгөөлөгч Р. Булгамаа, О.Чулуунцэцэг нар өнөөдөр мэдээлэл хийсэн юм.
Энэ үеэр өмгөөлөгч О.Чулуунцэцэгтэй
ярилцлаа.

-Г.Намуундарь өөрийн цахим хуудсаар хийсэн мэдээлэлтэй
холбоотой янз бүрийн мэдээллүүд нэлээд гарч байна. Прокурорын
байгууллага ч гэсэн албаны ёсны мэдээллээ өгсөн. Өмгөөлөгчөөр ажиллаж байгаа таны
хувьд ямар байр суурьтай байна вэ?

-Монголын нийгэмд үүсээд байгаа өсвөр насны хүүхдийн
хүчирхийлэл болон гэмт хэргийн нөхцөл байдал нэлээд асуудалтай
байна. Өсвөр насны охидтой холбоотой хэргийн талаар Г.Намуундарь өнгөрсөн арваннэгдүгээр сарын
30-ны өдөр өөрийн цахим хуудсаар дамжуулж мэдээлэл хийсэн. Түүний энэ үйлдэл нь өөрийн болон гэр бүлийнхээ нэр төрийг эрсдэлд оруулсан
зоригтой алхам болсон юм. Энэ охин худлаа хэлсэн үү, эсвэл үнэн зүйл ярьсан
уу гэсэн асуулт нийгэмд хариултаа хүлээж байна.

Өмгөөлөгч Баасандоржоор ахлуулсан хуулийн баг охины
хэрэг дээр ажиллаж байгаа. Охины хууль ёсны эрхийг хамгаалж түүний аав нь арванхоёрдугаар сард
цагдаа, хуулийн байгууллагад хандсан. Гэтэл Монгол Улсын хууль хяналтын байгууллагаас гэмт
хэргийн талаар өөрсдийнхөө дүгнэлтийг хийж олон
нийтэд мэдээлсэн. Ер нь гэмт хэргийн нөхцөл байдал тогтоогдоогүй
байхад нэг талыг барьсан мэдээллийг олон нийтэд хүргэсэн. Тухайлбал, УЕП-ын
хяналтын прокурор н.Өлзийжаргал мөрдөн байцаах ажиллагааны нууцыг
задруулсан. Хэтэрхий нэг талыг барьсан мэдээллийг олон
нийтэд хүргэсэн. Мөн мэдэгдэлдээ шууд гүтгэх гэдгийг ашиглаж, манай
үйлчлүүлэгчийг буруутгасан. Тухайн гэмт хэргийн нөхцөл байдлыг бүрэн
шалгаж дуусаагүй байхад олон нийтэд мэдээлэл цацаж, төөрөгдлийг бий
болгосон. УЕП-ын прокурорын ёс зүйн дүрмийн 3.1, 3.4, 3.7 дахь
заалтуудыг болон прокурор тухайн хэрэг маргааныг эцэслэн шийдвэрлэгдээгүй
байхад хэрэг материалын талаар урьдчилан дүгнэлт гаргах, хэвлэл
мэдээллийн хэрэгслээр олон нийтэд мэдээлэхгүй байх, хэт нэг талыг барьж асуудал
хандахгүй байх гэх заалтуудыг зөрчсөн. Иймээс хууль зөрчиж ёс зүйн алдаа
гаргасан прокурорыг ёс зүйн зөвлөлд хариуцлага тооцох
асуудлыг өгсөн байгаа.

-Одоо цагдаагийн байгууллагаас шалгаж байгаа биз дээ?

-Гэмт хэрэгтэй холбоотой асуудал дээр цагдаагийн
байгууллагаас ажлын хэсэг гараад ажиллаж байгаа. Гэтэл хэргийг шалгаж
байгаа ажлын хэсгийн цагдаагийн зарим алба хаагч гэрчүүдийг байцаахдаа
Эрүүгийн хэрэг хянан шийдвэрлэх тухай хуулийн 5.1, 2.5-д \”…өмгөөлөгч нь
өмгөөлж байгаа сэжигтэн, хохирогч, яллагдагч, шүүгдэгч, ялтны, эсхүл өөрийнхөө
хүсэлтээр хийгдэж байгаа мөрдөн шалгах ажиллагаанд байлцаж, аль ч үед асуулт
тавих, хүсэлт гаргах эрхтэй” гэж заасныг зөрчин, өрөөндөө байсан боловч байхгүй
гэж жижүүр цагдаагаар худлаа хэлүүлж, утсаа унтрааж байгаад гэрчүүдийг
байцаасан хууль бус үйлдэл гаргасан. Иймд гэрчүүдийг хуулийн дагуу, үнэн зөв мэдүүлэг авсан
эсэхэд эргэлзээ төрж байна. Хууль зөрчин, өмгөөлөгчийг байлцуулахгүйгээр гэрчүүдийг
байцаасан уг албан тушаалтанд хариуцлага тооцуулахаар ЦЕГ-ын Дотоод
хяналт шалгалт, аюулгүй байдлын хэлтэст гомдол гаргаж шалгуулах хүсэлт гаргасан.

-Саяхан Г.Намуударь эрүүгийн хэрэг үүсгэсэн гэдэг мэдээлэл
гарсан. Энэ талаар?

-Г.Намуундарь охинд холбогдох хэргийг хоёр газар буюу Хан-Уул дүүргийн цагдаагийн нэгдүгээр хэлтэс
болон Улсын мөрдөн байцаах газар дээр шалгаж байна. Одоогийн байдлаар хэд
хэдэн гэрчүүд байцаалт өгсөн байгаа. Өмгөөлөгчдийн зүгээс
гэрчүүдийг асуулгах хүсэлтийг гаргасан. Гэвч зарим нэг
гэрч дээр биднийг байлцуулахгүйгээр байцаалт авсан.
Ер нь гэрчүүдийн өгсөн мэдүүлгээр Г.Номуундарийн
бичлэгт гаргасан цаг хугацаа, тухайн орон байр, бичлэгт дурдсан нэр бүхий этгээдүүд болон хэрэгт
холбогдсон хоёр этгээд байсан гэдэг нь тогтоогдож байгаа. Хүчирхийллийн
хэрэгт холбогдсон хоёр этгээдээс өнөөдрийг хүртэл цагдаагийн байгууллагад ямар
ч мэдүүлэг аваагүй байна. Холбогдох төрийн байгууллага хилийн хориг
тавиагүйгээс гэмт этгээдүүд оргон зайлсан байж болзошгүй байна. Дээр нь энэ
этгээдүүдийг эрэн сурвалжлах үйл ажиллагаа хийгдээгүй байна.

Хэрэгт холбогдсон этгээдүүд өнөөг хүртэл Монгол Улсын хилээр
орж ирээгүй гэж бодож байна. Цагдаа болон прокурорын байгууллагаас гэмт хэрэг
үйлдсэн этгээдүүдийг эрэн сурвалжилж, авчирч байцаалт авч, эрүүгийн хэрэг
үүсгэж, уг хэргийг мөнгөний болон бусад нөлөөнд авталгүйгээр шударгаар, хуулийн
дагуу шалгаж, гэмт хэрэг үйлдсэн этгээдүүдэд хариуцлага хүлээлгэхийг хүсэж
байна.

-Энэ хэрэгтэй холбоотой таван хүний нэр цахим ертөнцөд
гарсан байгаа. Эдгээрээс хэд нь энэ хэрэгт холбогдоод
байгаа вэ?

-Намуундарь бичлэгтээ хоёр өөр асуудал ярьж
байгаа. Нэг нь  хүчингийн гэмт хэрэг болон хар тамхины асуудал. Бидний хувьд хар тамхины асуудал дээр өмгөөлөл үзүүлэхгүй байгаа учраас
бидэнд ямар нэгэн мэдээлэл байхгүй байна. 

-Хэрэгт холбогдсон этгээд монгол байхгүй гэж байна.
Монголд авч ирэх боломж бий юу?

-Хуулийн хүрээнд авч ирэх боломжтой. Одоо энэ хэрэг
бүртгэлийн шатандаа явж байгаа. Уг нь гэрчүүд болон хохирогч өөрөө мэдээлж
байгаа учраас эрүүгийн хэрэг үүсгэх бүрэн боломжтой. Эрүүгийн хэрэг үүсгээд
эдгээр хоёр этгээдийг Монголд авч ирж үнэнийг тогтоох хэрэгтэй.

-Шүүх эмнэлгийнхэн хамаатны дүүгээс нь шинжилгээ авсан гэсэн. Энэ талаар мэдээлэл өгөхгүй юу?

-Хамаатны дүүгээс нь шинжилгээ авсан гэдэг
асуудлаар Улсын ерөнхий прокурорын хяналтын прокурор н.Өлзийжаргал гэдэг хүн хариуцлагагүй
мэдээлэл хийсэн. Иймээс н.Өлзийжаргалыг бид шалгадаг газар нь өгсөн
байгаа. Бид н.Номинзул гэдэг охины өмгөөлөгч биш учраас энэ талаар
мэдээлэл өгөх боломжгүй.

-Г.Номуундарь байцаалт өгч байгаа юу? Япон
улсад байгаа гэсэн. Энэ үнэн үү?

-Г.Номуундарь Монголд байгаа.
Удахгүй өөрийнхөө хийсэн бичлэгийн талаар мэдээлэл хийнэ. 

-Охиныг сэтгэцийн эрүүл мэндийн үндэсний төвийн
хяналтад байдаг гэсэн. Энэ үнэн үү?

-Г.Номуундарь охин сэтгэцийн хувьд эрүүл. ЭЕШ-даа
маш өндөр оноо авч, их дээд сургуульд орсон байсан. Охиныг бичлэг хийсний
дараа шинжилгээ хийсэн. Шинжилгээгээр охин ямар нэгэн мансууруулах бодис
хэрэглэдэггүй нь тогтоогдсон.

Н.Алтанцэцэг