Өмгөөлөгч О.Алтангэрэл нэгэн ноцтой хэргийн талаар мэдээллээ

Сүүлийн үед Монгол төрийн түшиг тулгуур болсон УИХ-ын гишүүд янз бүрийн ноцтой асуудлуудад нэр холбогдох болоод уджээ. Эхний хэргүүд нь шийдэгдэж амжаагүй байхад дараагийн хэргүүд нь шил шилээ даран  гарч ирсээр байна. Эдгээр хэргүүдийн нэгнийх нь талаар өмгөөлөгч О.Алтангэрэл өөрийн фейсбүүк хуудсаар дамжуулан ийн бичжээ.

Түүний яриад буй хэрэгт холбоотой эрэгтэй нь УИХ-ын хэн гэдэг гишүүн эмэгтэйн нөхөр бэ гэдэг талаар олон таамаг яриа гараад байгаа юм байна. 

Ингээд түүний бичсэн зүйлийг хүргэе. 

Өнгөрсөн онд нэгэн бүсгүй, өмгөөлөгчтэйгээ ирж уулзан, зөвлөгөө авсан юм.

Тэрээр нэг компанид ажиллаж байхад нь захирал нь байнга бэлгийн дарамт үзүүлсээр эцэст нь бэлгийн харьцаанд оржээ.

Захиралынх нь эхнэр нэгэн УИХ-ын эмэгтэй гишүүний (МАН-ын) дүү бөгөөд тэрхүү гишүүний нөхөр нь хүртэл бэлгийн дарамт үзүүлж байсан аж.

Эрхэм гишүүний дүү нөхөр болон бүсгүй хоёрын харьцааг мэдээд бүсгүйг компанид эд хөрөнгийн хохирол учруулсан гэж баримт бүрдүүлэн цагдаад өгч, эрүү үүсгүүлэн гишүүн эгч нь бас захиа даалгавар өгснөөр 20 гаруй сая төгрөгийн хохирол учруулсан гэж 8 жилийн ял авах гэж байгаа талаараа учирлаж ярьсан юм.

Тухайн үед асуудлаа хуулийн дагуу шийдвэрлэх боломжын талаар зөвлөөд явуулсан, шүүх хэргийг нь мөрдөн байцаалтад буцаасан юм билээ.

Гэтэл өчигдөр дахиад ирлээ, юу болов гэтэл өнөөх цагдаа, прокурор нь хэргийг яг хуучнаар нь боогоод яллах дүгнэлт үйлдсэн, эрхэм гишүүний захиас болохоор тэр муу \”завхай\” бүсгүйг заавал шийтгэнэ гэнэ!

Зоригтой бай, шаардлагатай бол хэвлэл мэдээллийн хэрэгсэлд ханд, өөрийн буруутай үйлдлээсээ давсан хариуцлага, ял шийтгэлийг хэрхэвч зөвшөөрч болохгүй, бүх талаар тусална гээд явууллаа…