БНСУ-ын Ерөнхийлөгч Мүн Жэ Ин өнөөдөр Монгол Улсын Ерөнхий сайд У.Хүрэлсүхтэй хоёр талын харилцааг бэхжүүлэх асуудлаар хэлэлцээ хийнэ гэж Өмнөд Солонгосын Ерөнхийлөгчийн Тамгын газар буюу Хөх ордноос мэдэгдсэнийг тус улсын \”Ёнхап” агентлаг мэдээлэв.
Монгол Улсын Ерөнхий сайд У.Хүрэлсүх өнөө өглөө БНСУ-д гурван өдрийн айлчлал хийхээр хүрэлцэн ирсэн бөгөөд айлчлалын үеэр тэрбээр хоёр улсын бизнесийн форумд оролцохоос гадна тус улсад ажиллаж амьдарч буй монголчуудын төлөөлөлтэй уулзах ажээ.
Мүн Жэ Ин, У.Хүрэлсүх нарын уулзалт өнөөдөр үдээс хойш Хөх ордонд болно гэж Хөх Ордноос гаргасан мэдэгдэлд дурдсан байна. Уг уулзалтад Ерөний сайд У.Хүрэлсүхээс гадна түүнийг дагалдан яваа Монгол Улсын Гадаад харилцааны сайд Д.Цогтбаатар болон бусад албаны бусад хүмүүс оролцох юм байна.
Өнгөрсөн оны есдүгээр сард ОХУ-ын Владивосток хотноо болсон бүс нутгийн эдийн засгийн чуулга уулзалтын үеэр Мүн Жэ Ин Монгол улсын Ерөнхийлөгч Х.Баттулгатай хоёр талын дээд хэмжээний уулзалт хийж байсан бөгөөд үүний дараа дөрвөн сар орчмын дараа У.Хүрэлсүхтэй хэлэлцээ хийх гэж байна.БНСУ болон Монгол улс нь 1990 онд дипломат харилцаа тогтоожээ.
Ж.Бат
![\"\"](http://undesten.mn/wp-content/uploads/2018/01/1515983686_undesten-site-logo.png "\\"\\""){kind=logo}
