Г.Өсөхбаяр тэргүүтэй уулчид Өмнөд Америкийн ноён оргил Аконкагуаг зорилоо

Өмнөд Америкийн ноён оргил Аконкагуагийн ноён оргилд гарахаар гавьяат тамирчин Г.Өсөхбаяр тэргүүтэй таван уулчин өнөөдөр эх орноосоо мордлоо. Тус багийнхан энэ удаагийн авиралтыг гурван долоо хоногийн хугацаанд үргэлжлүүлнэ гэж тооцоолжээ. Дэлхийн дээвэр Эверестийн оргилд хэдэнтээ гарсан туршлагатай уулчин Г.Өсөхбаяр Аргентины нутаг, Андийн нурууны ноён оргил Аконкагуад жилийн өмнө буюу 2017 оны хоёрдугаар сарын 10-нд авирч байсан юм. Энэ удаагийн авиралт өнгөрсөн жилийн адил К2 ууланд /8611 метр/ авирах бэлтгэл болно гэж гавьяат тамирчин онцолж байгаа юм байна. Г.Өсөхбаяр гавьяат өнгөрсөн зун \”Алуурчин уул” гэгддэг К2-т авирахаар явсан ч цаг агаарын болон хөтөчийн асуудлаас болж 6450 метрт хүрсэн хэдий ч авиралтаа зогсоож байсан билээ. Тэрбээр энэ жил даагаа нэхэхээр шийдэж, дэлхийн хамгийн эрсдэлтэй оргилд авирах бэлтгэлдээ ийнхүү гарлаа.