МАХН-ын зарим гишүүд болон О.Баасанхүүд хариуцлага тооцохоо мэдэгдлээ

Монгол Улсын Дээд Шүүх өнөөдөр МАХН-ын даргаар О.Баасанхүүг бүртгэхээс татгалзсан талаар бид мэдээлсэн билээ. Тэгвэл МАХН-аас мөн үүнтэй холбогдуулан байр сууриа илэрхийлж мэдээлэл хийсэн юм. Тэд О.Баасанхүүг МАХН-аас уучлалт гуйхыг шаардахын сацуу түүнд хуулийн хариуцлага хүлээлгэхээ мэдэгдлээ.

МАХН-ын гишүүн, УИХ-ын гишүүн асан Ц.Оюунбаатар \”Улсын дээд шүүх шийдвэрээ гаргалаа. О.Баасанхүү мэтийн нөхөд улстөрийн захиалгаар хууль бус хурал зохион байгуулж, намын, төрийн эрхийг авахыг санаархсан. МАХН-ын хууль дүрмийг зөрчсөн. Харин Улсын дээд шүүх шийдвэрээ үнэн зөв гаргалаа. Энэ бол эцсийн бөгөөд түүхэн шийдвэр. Төрийн эрх мэдлийг хууль бусаар авахыг зөвшөөрөхгүй. Бид бүхнийг төлөөлөх эрхгүй хүмүүс хуйвалдаж, намыг маань булааж авах гэж байсныг таслан зогсоолоо. Улс төрийн намыг бутаргах оролдлого цаашид гарахгүй байх бололцоо нөхцөл бүрдлээ гэж бодож байна. Хэн нэгэн этгээд намын, тэр ч байтугай төрийн тогтвортой байдлыг хууль бусаар авах агэсэн оролдлого цаашид гарахгүй байх гэж харж байгаа\” гэлээ. 

МАХН-ын Ерөнхий нарийн бичгийн дарга Э.Эрдэнэжамъян хэлсэн үгэндээ \”УИХ-ын гишүүн О.Баасанхүү МАХН-ыг төдийгүй Улсын Дээд шүүхийг доромжиллоо. Бид түүнийг МАХН-аас уучлалт гуйхыг шаардаж байна. Өнөөдөр Улсын Дээд шүүхийн шийдвэр бол эцсийн шийдвэр. Тиймээс түүний гэмт үйлдэлд хуулийн хариуцлага хүлээлгэнэ. Монгол Улсын Дээд шүүхийн шийдвэр улстөрийн намууд болон төрийн түшээдийн үйл ажиллагаа хуулийн хүрээнд байх ёстой гэдгийг хэлж өглөө.” гэв.

Мөн УИХ-ын гишүүн О.Баасанхүүтэй нийлж хууль бус Их хурлыг зохион байгуулсан намынхаа гишүүдэд ч хариуцлага тооцож, тэднийг намаасаа хөөх болон сануулах арга хэмжээг авахаа мэдэгдлээ. Харин алдаагаа ухамсарлаж, уучлалт гуйвал намын гишүүн хэвээр үлдэх боломжтой гэнэ.