Калифорнийн хос хүүхдүүдээ хорьж цагдаж байгаагүй гэжээ

$\"\"$

Калифорни
дахь гэртээ 13 хүүхдээ хорьж цагдаж байсан хэрэгт буруутгагдаж буй эхнэр, нөхөр
хоёр өөрсдийгөө буруугүй хэмээн мэдүүлжээ. 56 настай Дэвид Турпин, 49 настай
Луйз Турпин нар хүүхдүүдээ эрүүдэн шүүж, хүчирхийлэл дор хорьж байсан хэрэгт
буруутгагдаад байгаа юм.

Гэрээсээ
амжиж зугтаж чадсан нэг охин нь цагдаа дуудсанаар ийнхүү эцэг, эхийг нь
баривчилж, орноос гинжилж хорьсон ах, эгч, дүү нарыг нь олсон байна. Прокурорууд
тэдний эсрэг аймшигтай үйлдэл, баримтуудыг нь дэлгэсний дараа шүүх танхимд
хэдэн цагийн турш хуралджээ.

Риверсайд
тойргийн хуульч Майк Хэстриний хэлснээр уг хос хүүхдүүдээ шийтгэн анхандаа уяа,
олсоор хүлдэг байсан бол дараа нь орноос нь гинжилж, гавладаг болсон байна. Тийнхүү
шийтгэлийн хугацаа нь хэдэн долоо хоног, хэдэн сараар үргэлжилж, заримдаа
чангаланд ч хорьдог байжээ. Түүнчлэн бие засах өрөө орохдоо ч хүүхдүүдийг
гинжнээс сулладаггүй байсан нь нотлогджээ.

Харин
гэрээсээ зугтаж дуудлага өгсөн охины хэлж буйгаар түүний ах, эгч нар хоёр
жилийн турш эцэг, эхээсээ зугтаж оргохоор бэлдэж байгаад баригдсан аж. Пүрэв
гаригт болсон хэвлэлийн бага хурал дээр тэрхүү эцэг, эхийн үйлдэж байсан
аймшигт үйлдлүүдийг илчилжээ. Тэдгээрийг дурдвал:

·
Байнга зодуулж байсны улмаас хүүхдүүд нь сэтгэл санааны
цочролд орсон.

·
Хүүхдүүдээ жилд ганцхан удаа усанд орохыг зөвшөөрдөг
байсан.

·
Тэднийг өглөөний 4-5 цаг хүртэл сэрүүн байлгаж байгаад
өдрийн турш унтуулдаг байсан.

·
Ямар ч тоглоомоор тоглохыг зөвшөөрдөггүй байсан ч гэрт
хайрцаг савнаас нь гаргаагүй олон тооны тоглоом олдсон.

·
Хүүхдүүд гараа угаахдаа бугуй хүртлээ угаавал усаар
тоглосон хэмээн шийтгүүлдэг.

·
Тэдэнд өдөрт ганц удаа хоол өгдөг байсан ч заримдаа хоол
хүнс, хулуу хэлбэрт бялуу худалдан авч хүүхдүүдэд өгөхгүйгээр нүдэнд нь харагдах
газар ил тавьдаг байжээ.

·
Хүүхдүүд шүдний эмч дээр хэзээ ч очиж байгаагүй, хамгийн
сүүлд дөрвөн жилийн өмнө эмчид үзүүлж байсан гэнэ.

·
Тэд амьдралын ердийн зүйлсийн талаар үндсэн мэдлэг
тааруу, цагдаагийн офицер гэж хэн болохыг ч мэддэггүй аж.

Цаашлаад хоёроос
29 хүртэлх насны тэдгээр хүүхэд залуусын сэтгэц, бие махбодын эрүүл мэндийн
талаар олон ноцтой мэдэгдлийг сөхөн танилцуулжээ. Эндээс харахад хоёр настнаас
бусад нь бүгд хэвийн бус жинтэй, хэт туранхай байсан аж. Тухайлбал, 12 настай
хүүхэд нь дундаж долоон настай хүүхэд шиг биетэй, 29 настай нь ердөө 37 кг
жинтэй байжээ. Тэднийг өнгөрөгч Даваа гаригаас хойш эмнэлэгт хэвтүүлэн эмчлүүлж
байгаа аж.