Намгүй сум, дүүрэг хөдөлгөөн өрнүүлнэ гэв

$\"\"$

Намын хийрхлээс ангижрах зорилготой байгуулагдсан гэх \”Намгүй нам, дүүрэг хөдөлгөөн\”-өөс хэвлэлийн бага хурал хийсэн юм.

Тус хөдөлгөөнийхөн олон намуудын талцал хуваагдлаас болж ард түмний амьдрал элгээрээ хэвтсэн, намуудын тахал дэгдсэн учир энэ тахлын вакциныг танилцуулахаар уг хурлыг хийж байгаа гэдгээ хурлын эхэнд дурдлаа.

Тодруулбал, орон даяар хийрхсэн намчирхал орон нутгийн иргэдийг ахуй амьдралаас нь хөндийрүүлж байгаа тул үүнийг зогсооход чиглэсэн зохицуулалтуудыг Үндсэн хууль, Улс төрийн намын тухай хууль, Сонгуулийн тухай хуульд оруулж, орон нутгийн сонгуульд нам оролцдоггүй болгох нь тус байгууллагын зорилго гэв.

Улс төрийн үзэл бодол төлөвшөөгүй сургуулийн сурагчдыг хүртэл намуудад хувааснаар цөөхөн хүн амтай орон нутагт сонгуулийн эрх чөлөө хумигдаж, итгэл үнэмшлээрээ бус намын гишүүнчлэлээр сонгуульд санал өгдөг болсон гэдгийг дурдаад хөдөлгөөн өрнүүлэх болсон шалтгаанаа тайлбарлалаа.

Үүнд:

-Намаар талцаж хуваагддаг.

-Албан тушаал, шагнал, урамшуулал, төсөл хөтөлбөр, халамж, дэмжлэг бүгд намын харъяаллаар шийдэгддэг,

-Залуу хүмүүс намгүйгээр хөгжиж дэмжих ямар ч боломжгүй.

-Намын нүсэр бүтцийг санхүүжүүлэх нэрээр төрийн албыг тойрсон авилгын сүлжээ.

-Орон нутгийн хөгжлийн бодлого байнга өөрчлөгддөг.

-Нам дагасан, дарга дагасан тохиолдлын шинжтэй бэлтгэгдээгүй хүмүүс төрийн албанд шургалдаг.

-Эрх баригч хүчнийг харлуулах нэрээр хийх улс төржилт нь төрийн нэр хүндийг унагадаг.

-Сонгуулийн дараах халаа сэлгээ,

-Залуучууд болон нам бусчууд сонгуулийн идэвх байхгүй.

-Сонгогчдын гишүүнчлэлдээ баригдан саналаа чөлөөтэй өгч чадахгүй байна.

-Ялагдсан намд сонгуульд ажилласан хүний бизнес шахалт хавчлагад өртдөг.

-Ялсан намын эсрэг ажилласан хүн ажлаасаа халагддаг.

-Иргэний нийгмийн байгууллага, мэргэжлийн холбоод нам дагаж өөрчлөгддөг гэв.

Тэгвэл тус хөдөлгөөний зүгээс үүнээс гарах гарцаар дараах арга замыг тодорхойлсон аж. Тэд \”Үндсэн хуулинд – Улс төрийн нам орон нутгийн сонгуульд оролцож үл болно. Улс төрийн намын тухай хуулинд – Сум, дүүрэгт улс төрийн намын салбар нэгж байгуулж үл болно гэсэн заалтуудыг нэмж хуульчлах нь зөв гарц\” хэмээн үзжээ.

Хөдөлгөөнийг орон даяар өрнүүлж, Улс төрийн намын тухай болон Сонгуулийн тухай хуулиудад нутгийн өөрөө удирдах ёсны байгууллагын сонгуульд намууд оролцдоггүй болгож, сум, дүүрэгт нам байгуулахыг хязгаарласнаар:

-Улс төрийн намуудын санхүүгийн хэрэгцээ багасна.

-Хөрөнгө чинээтэй хүмүүсээс хамаарах хамааралгүй болно.

-Төрийн албаар дамжин санхүүжилт босгох шаардлага хумигдана.

-Иргэдийн сонгуулийн эрх чөлөө хангагдана.

-Орон нутгийн хөгжлийн бодлого тогтвортой, залгамж чанартай болно.

-Төв суурин газар руу дайжилт багасч, хөдөө, хотын тэнцвэртэй хөгжлийн суурь бий болно.

-Төрийн албан хаагчдын ажлын байр баталгаажиж, мэргэжлээрээ мэргэших, хөгжих боломж бололцоо нэмэгдэнэ.

-Халаа сэлгээ бага болсноор төрийн алба тогтвор суурьшилтай, чадварлаг боловсон хүчнээр хангагдана.

-Нутгийн өөрөө удирдах ёсны байгууллагад тухайн орон нутгийн шилдэг хүмүүс өөрсдөө нэрээ дэвшүүлж оролцох, сонгогдох бололцоо бий болно гэсэн юм.

$\"\"$