П.Оюу-Эрдэнэ: Одоо \”Жинжиймаа” киногоо үзэх болгондоо уйлчихаад байдаг

 \”Жинжиймаа” Монголын уран сайхны
кино 16 жилийн өмнө үзэгчдийн хүртээл болж байсан билээ. \”Жинжиймаа”
уран сайхны кинонд таван настайдаа тоглож байсан П.Оюу-Эрдэнэтэй ярилцлаа. Тэрбээр өдгөө 21 настай, Соёл урлагийн их сургуулийн жүжигчний
ангийн төгсөх курсийн оюутан юм.

-\”Хүн мод” уран сайхны кино нээлтээ
хийгээд удаагүй байна. Та сая энэ кинонд тоглосон. Энэ талаар яриагаа эхэлье?

-Юуны өмнө уншигчиддаа энэ
өдрийн мэндийг хүргэе. Энэ кино маань гэр бүлийн халуун дулаан уур амьсгал, ах, эгч, дүү нар ямар
харилцаатай байх ёстой, эцэг, эхээ алдсан хүүхдүүдийн зан ааш нь яаж өөрчлөгдөж
амьдрал дээрээ алдах нь их байна уу, онох нь их байна уу гэдгийг харуулсан ийм
л кино. Би энэ кинонд Энэрэл гэдэг эмэгтэйн дүрийг бүтээсэн. Миний дүр
сайхан эмэгтэй, сайн эхнэрийг харуулсан эерэг талын дүр. СУИС-ийн жүжигчний
ангийнхан оюутан байх хугацаандаа кино уран бүтээлд
багахан дүр бүтээх тохиолдол элбэг байдаг. Өнгөрсөн жилийн өдийд А.Төгсбаяр
\”Эцсийн хүсэл” киноны нэг хэсэгт Төрийн соёрхолт жүжигчин Ц.Төмөрбаатар гуайтай орж тоглож байсан юм. Тэр үед Төгсөө ах \”Чи их таалагдаж байна. Ах нь дараагийнхаа уран
бүтээл дээр чамтай хамт ажилламаар байна” гэж хэлсэн. Тухайн үед өвөл байсан
болохоор хичээлээ хийгээд л явж байлаа. Гэтэл нэг өдөр \”Киноны зураг авалт эхлэх
гэж байна. Зун зураг авалтад орно шүү” гэж хэлсэн. Ингээд Төгсөө ахын \”Хүн мод”
кинонд гол дүрийн Энэрэл гэх эмэгтэйн дүр дээр тоглохоор болсон. Бас энэ үеэр Ардын жүжигчин
П.Цэрэндагва гуайтай хамтран тоглох ховор аз завшаан тохиосондоо. 

 

Ардын жүжигчин
П.Цэрэндагва гуай бид хоёр их дотно сайхан байдаг

 

 

-Та Ардын
Жүжигчин П.Цэрэндагватай хоёр дахь уран бүтээл дээрээ хамтран ажиллаж, дахин
аав охин хоёрын дүрийг бүтээсэн. П.Цэрэндагва гуайн зүгээс тусламж, зөвлөгөөг хэр өгч байв?

-Миний зураг авалтууд ихэвчлэн наадмын үеэр
авагдсан. Харин тэр үед П.Цэрэндагва гуай завгүй байсан юм билээ. Тэгээд бид хоёр
зураг авалтын үеэр огт тааралдаагүй. Дараа нь наймдугаар сард л хамт зураг авалтанд
орсон доо. Ардын жүжигчин П.Цэрэндагва гуай бид хоёр их дотно сайхан байдаг юм. Ийм сайхан хүмүүсийн хэлсэн үг, хийсэн
үйлдэл бүрээс үлгэр дурайлал авч байдагтаа баярлаж явдаг.

-Таван настай байхдаа \”Жинжиймаа”
уран сайхны кинонд тоглож байсан гэсэн. Тэр үеэ дурсахгүй юу?

-Тийм ээ. Таван настайдаа \”Жинжиймаа” уран сайхны кинонд тоглож
байсан. Одоогоос 16 жилийн өмнө.. Тухайн үед их даарч ядарч байсан. Тийм учраас  киногоо их сайн
санадаг юм. Кино зураг авалтад ээж маань хамт явж байсан.

-Энэ киног үзсэн хүн бүхэн уйлдаг.
Ээжийнхээ араас дагаад уйлдаг, гэр шатдаг хэсгийн зураг авалтуудыг санадаг уу?

-Би хөдөө очоод зураг авалтын эхний
өдрүүдэд их сэргэлэн байсан гэдэг. Зарим жүжигчдийн үгийг нь цээжилчихсэн
\”Ингэж хэл л дээ, тэгж хэл л дээ” гээд л. Сүүлдээ киноны хүнд зураг авалтууд
эхэлсэн чинь ээждээ \”Би кинонд тоглохгүй. Хоёулаа гэртээ харъя” гэж шалаад
эхэлсэн гэсэн. Ээж маань ярихдаа \”Тэр үед 500 мянган төгрөгөөр гэр худалдаж,
аваад жинхэнээсээ шатаасан” гэдэг. Намайг ядраад унтах үеэр гэр дотор нь
үлдээгээд, гаднаас нь гал тавьж маш хурдан зураг авалтыг хийсэн гэдэг. Унтаж
байхдаа хүртэл кинонд тоглосон гэж кино багийн ах, эгч нар маань намайг
өхөөрдөж хошигнодог байсан гэж ээж маань ярьдаг. Харин ээжийгээ хот руу
эмчилгээнд явах үед араас нь дагаад уйлдаг хэсгийг яаж авсан бэ, чамайг
загнасаар байгаад уйлуулсан уу гэж хүмүүс дандаа асуудаг юм. Тухайн үед
Н.Батцэцэг эгчтэй олон хоног хамт байсан учраас дасчихсан байсан. Тэгээд нэг
өдөр Н.Батцэцэг эгч гэнэт \”Би хот руу явлаа. Чи эндээ үлд” гэж хэлсэн. Тэгээд л
би \”Битгий яв л даа” гээд араас дагаж уйлсан. Тэр үед л зураг авч байсан юм
билээ. 

-Жил бүрийн цагаан сараар \”Жинжиймаа” гардаг.
Киног үзэхэд ямар сэтгэгдэл төрдөг вэ?

-\”Жинжиймаа” уран сайхны кино цагаан сарын
баяраар их гардаг шүү дээ. Тэгээд л ойр дотны хүмүүс маань \”Чиний тоглосон кино
гарч байна” гэж хэлдэг. Жил бүр л \”Жинжиймаа” киногоо үздэг. Одоо ч хүмүүс
намайг \”Жинжиймаа” дүрийн минь нэрээр их дууддаг. Таван настай байхдаа
нээлтийн өдөр нь киногоо үзчихээд \”Та нар намайг яасан их зовоосон юм бэ” гээд
ихэр татаж уйлаад л байсан гэсэн. Одоо Жинжиймаа” киногоо үзэх болгондоо уйлчихаад байдаг юм.
Надад энэ дүрийнхээ нэрээр дуудуулах сайхан санагддаг. \”Жинжиймаа” кинонд
тоглохдоо өмсөж байсан ногоон дээл, лоовуузон малгай, киноны нээлтийн өдөр
өмссөн даашинз, Хүүхдийн ордны \”Эрдэм алтан медаль” бүгдийг нь хадгалдаг.
Хүүхэдтэй болохоороо өмсүүлнэ гэж боддог. Хааяа гаргаж ирээд үнэрлэхэд нэг л
дотно сайхан байдаг юм.

-Яагаад жүжигчин
мэргэжлийг сонгож, суралцах болов. Жинжиймаагийн Хонгорзулын дүр мэргэжлийг
сонгоход нөлөөлсөн үү. Эсвэл өөрийн хүсэл сонирхолоор сонгож суралцсан уу?

-Манай гэр бүлийнхэн урлагийн салбарт
ажилладаггүй ч гэсэн урлагт их хайртай. \”Жинжиймаа” киноны Хонгорзулын дүр
гэсэн тодорхой хэмжээнд нөлөөсөн байх. Би арван жилийн сургуулиа төгсөөд СИУС-д
шалгалт өгөөд тэнцээгүй. Энэ сургуульд орох хүсэл мөрөөдөлтэй байсан учраас
дараа жил нь дахин шалгалт өгөөд тэнцэж орсон доо.

Багш шигээ жүжигчин болно доо

 

-Одоо төгсөх гээд дипломын ажил гээд завгүй байгаа байх. Дипломын
ажилдаа орсон уу?

–Дипломын ажилдаа орчихсон завгүй гүйж байна. Жүжигчин хүний сэтгэл зүйн
талаар дипломын бичиж байгаа.

-Удахгүй сургуулиа
төгсөх гэж байна. Цаашид ямар чиглэлээр ажиллах вэ?

-Эхний ээлжид сургуулиа
амжилттай төгсөх хэрэгтэй. Бодож төлөвлөсөн зүйл зөндөө байгаа. Манай оюутнууд
сургуулиа төгсөөд өөрсдөө сонголтоо хийгээд явдаг. Хошин урлаг, Драмын театр
гээд өөрсдийнхөө сонирхсон чиглэлээр ажилладаг. Миний хувьд кино урлагийн
чиглэлээр явна. Одоо би С.Сарантуяа багшийн удирдлага дор суралцаж байгаа. Би
багшийгаа төгс хүн гэж бодож явдаг. Иймээс багш шигээ жүжигчин болно доо.

-Чи нэлээд эрх юм шиг
санагдлаа. Гэр бүлээ танилцуулахгүй юу?

-Манайх ам бүл тавуулаа.
Би дүүгээ төрөөгүй байхдаа эрх байсан. Одоо тийм их эрх биш ээ. /Инээв/

-Найз залуутай юу?

-Найз залуу байгаа.
Манай сургуулийн оюутан.

-Ирээдүйн зорилго,
мөрөөдлөө бидэнтэй хуваалцахгүй юу?

-Ард түмэндээ үнэлэгдсэн
мундаг жүжигчин болох мөрөөдөлтэй. Мөн эх орныхоо нэрийг өндөрт өргөж, дэлхийн
кино урлагт хүчээ сорихыг хүсч, мөрөөддөг. Холливудад нэрээ дуурсгасан мундаг
жүжигчин болохыг хүсдэг. Мэдээж ийм хэмжээний амжилтад хүрэхийн тулд маш их
хөдөлмөрлөх ёстой, тиймээс хичээж, зүтгэж байгаа.

Н.Алтанцэцэг