Төрийн өндөрлөгүүдийн мэндчилгээ

Өвөг дээдсээс өвлүүлж үлдээсэн
уудам сайхан нутгийнхаа өнцөг булан бүрт суугаа эх орон нэгт монголчууд
аа

Өргөн эх дэлхийн дөрвөн зүг найман зовхист
амьдран суугаа элэг нэгт Монгол ахан дүүс ээ.

Та бүхэндээ XVII жарны \”Тийн унжлагат” хэмээх Шороон нохой жилийн сар шинийн
мэндийг өргөн дэвшүүлье.

 Цагаан сар бол монголчууд
бидний үндэстний өв соёлоо өвлүүлэх, удам судар, ураг төрлөө мэдэлцэх, эв эеийг
эрхэмлэн дээдлэх, төрт ёс, тусгаар тогтнолын дархлаа болсон уламжлалт сайхан
баяр юм. Цагаан сарын шинийн нэгний өглөө тэнгэр хангай, уул
усандаа сүслэн мөргөж, хийморь сүлдээ сэргээн, ахас дээдсээ
хүндэтгэн, үгийн сайныг хэлэлцэн, үйлсийн сайныг ярилцан, эвдрэлцсэн нэгнээ
уучлан өршөөж, ухаарал нигүүлслийн сэтгэлээр ураг төрлөөрөө учран
золгодог билээ.

Улиран одож буй тахиа жилд төрийн тулгуур, улсын үндэс болсон айл өрхүүд
маань 70 гаруй мянган үр хүүхдээр ам бүлээ нэмж, монголчууд бид 3 сая 200
мянгуулаа боллоо. \”Хүн нэмбэл хүнс нэмнэ” гэж та
бидний билэгшээдгээр буянт мал сүрэг өсөж 66 саяд хүрлээ.

Улсын эдийн засаг тогтворжих замдаа орлоо. Тогтоон барьсан эдийн засгаа
томруулан өсгөж, айл өрх бүрийн авдранд, иргэн бүрийн ирээдүйд хүртээх нь
Монгол Улсын Засгийн газрын гол бодлого байх болно. Монголчууд бид эдийн засгаа
дөрвөн хувиар өсгөж чадлаа. Энэ бол манай улсын эдийн засаг
сэргэж эхэлсний бодит нотолгоо юм. Гадаад валютын нөөц нэг жилийн
дотор 2,5 дахин нэмэгдэж 3,2 тэрбум доллар боллоо. Экспорт анх удаа зургаан тэрбум
долларт хүрч өслөө. Гадаадын шууд хөрөнгө оруулалт 1.1 тэрбум долларт хүрлээ. \”Чингис
бонд”-ын 500 сая ам.долларын төлбөрийг Засгийн газар цаг хугацаанд нь төллөө.
Ингэснээр олон улсын хөрөнгө оруулагчдын итгэлийг сэргээж, манай
улсын зээлжих зэрэглэлийг дэлхийн голлох үнэлгээний агентлагууд нэг
шат ахиулан, Монгол Улс тогтвортой гэсэн ангилалд орлоо. Төсвийн сахилга батыг
сайжруулснаар төсвийн алдагдлыг өмнөх жилтэй харьцуулахад хоёр дахин
бууруулж, ДНБ-ий есөн хувьд хүргэлээ.​ Төсвийн орлого 580 тэрбум төгрөгөөр давж
биеллээ.

Энэ бүгд нь монголчууд бидний хувьд Тахиа жилд гаргасан чамлахааргүй
амжилт юм.

Монгол ахан дүүс ээ,

 Урин
цагийн амар мэндийг угтсан билэгт энэ сайхан өдөр Монгол Улсын Засгийн газар
хийж бүтээх ажлаа ард түмэндээ хэлж, зорилгоо нэгтгэхийг эрхэм болголоо.

Айлчлан ирж буй \”Тийн унжлагат” хэмээх Шороон нохой жилд улсаа
хүнсний орон болгох, эрчим хүчний хэрэгцээгээ бүрэн хангах, газрын тосыг
дотооддоо боловсруулах, агаар орчны бохирдлыг бууруулах, хөдөө аж ахуй, газар тариалан,
хөнгөн үйлдвэрлэл зэрэг гол ажлаа эрчимжүүлэх болно.

Түүнчлэн ард түмнийхээ бодит орлогыг өсгөх, ажлын байрыг нэмэгдүүлэх,
сургууль, цэцэрлэгээр хангах, тэтгэвэр тэтгэмжийг нэмэгдүүлэх, авто зам,
төв цэвэрлэх байгууламжийг шинэчлэх зэрэг дэд бүтэц, бүтээн байгуулалтын
томоохон ажлыг хэрэгжүүлж, газрын доорх баялгийн иргэдэд оногдох
өгөөжийг нэмэгдүүлэх болно.

Нэг ёсондоо ажил ундарч, амьдрал өрнөсөн он жил байх болно.

Засгийн газрын дээрх шийдвэрүүдийг бодитой ажил хэрэг болгох гол
хөдөлгөгч хүч нь Монголын ард түмэн та бүхний минь чин зориг, итгэл үнэмшил,
тууштай дэмжлэгт оршиж байгаа юм шүү.

 Монгол
хүн бүрийн зүрх сэтгэлд мөнхөд оршдог, эв нэгдэл, их ухаан, эрч хүч хайрладаг
аугаа үнэт зүйл бол туурга тусгаар Монгол эх орон минь юм. Энэ сайхан эх
орондоо монгол хүн бүр эрүүл энх, аз жаргалтай, элбэг хангалуун амьдрах нөхцөл
боломжийг бүрдүүлэхийн төлөө Монгол Улсын Засгийн газар, Монгол Ардын Нам
хичээн зүтгэх болно.

Хөвсгөлийн хөвч тайгаас Өмнийн их говийг өртөөлөн, Алтайн өндөр уулсаас
Мэнэнгийн шар тал хүртэл уудам Монгол нутагт минь урин хавар морилон ирлээ.

Ирж буй XVII жарны \”Тийн унжлагат” хэмээх Шороон нохой жилдээ иргэн
бүр эрүүл саруул, энх амгалан, алсдаа уужуу, холдоо зорилготой, хоймортоо
сүлдтэй, хотондоо ашиг шимтэй байх болтугай. Айл өрх бүрийн амьдрал ахуй өөдлөн
дэвжиж, төр улсаараа элбэг дэлбэг, түмэн олноороо тэнүүн жаргалтай амьдрахын
ерөөл өргөн дэвшүүлье.

 

Сар шинэдээ сайхан
шинэлээрэй

МОНГОЛ УЛСЫН ИХ ХУРЛЫН ДАРГА М.ЭНХБОЛДЫН МЭНДЧИЛГЭЭ

Дэлгэр сайхан
эх орондоо болон дэлхий дахины өнцөг булан бүрд ажиллаж амьдарч буй элэг нэгт Монгол ахан дүүс
ээ,

Та бүхэндээ Арвандолдугаар жарны \”Тийн унжлагат\” хэмээх шороон нохой жилийн Сар шинийн баярын мэндийг дэвшүүлж эрүүл энх, аз жаргал, эв найрамдал, эрхэм сайхан бүхнийг хүсэн
ерөөе.

Улиран одож буй Гал
тахиа жил Монгол Улс, монгол
түмэнд минь үр өгөөж, буян хишгээ хайрласан сайхан
жил болж өндөрлөж байна.

2017
оны жилийн эцсийн хүн амын тооллогоор монголчууд бид 3 сая 200 мянгуулаа болжээ. Эрдэнэт мал сүрэг маань өсөн үржиж, 66.2 саяд хүрлээ.

Газрын шимийг тэтгэгч тариаланчид маань 223 мянган тонн үр тариа,
үүнээс 216.2 мянган тонн улаанбуудай, 113.9 мянган тонн төмс, 75.8 мянган тонн
хүнсний ногоо хураан авч хүн амынхаа хүнсний хэрэгцээг хангахад жинтэй хувь нэмэр орууллаа.

Бизнес эрхлэгчдийн бүтээлч хөдөлмөрийн үр дүнд барилга, уул
уурхай, аж
үйлдвэр, үйлчилгээний салбаруудад нааштай, өсөлттэй олон ахиц
өөрчлөлт гарлаа.

Улсын эдийн засаг өрийн дарамтад туйлдаж, аж ахуйн нэгжүүдийн
ашигт ажиллагаа хумигдсан, ард түмний аж амьдрал доройтон, улсаараа төлбөрийн
чадваргүйд тооцогдох хэмжээнд хүрээд байсан хүнд цаг
үеийг бид туулан давж чадлаа.

Хасах үзүүлэлттэй
байсан эдийн засгийн өсөлт 2017 оны гүйцэтгэлээр 5.1 хувьд хүрч өсөв. Нэгдсэн төсвийн орлого 660.0 тэрбум
төгрөгөөр давж биеллээ. Гадаад валютын нөөц 2016 оныхоос 2.3 дахин нэмэгдэж,
3.0 тэрбум долларт хүрчээ.

Улс гэрээ өөд
татахын төлөөх төр, засгийн зөв тууштай бодлого, нийт иргэдийн хамтын хүчин
чармайлтын үрээр 1.1 тэрбум доллар буюу 2.6 их наяд төгрөгийн өрийг төлж
барагдуулснаар өр, зээлийн дарамтаас гарч чадлаа.

Ийнхүү дотоодод
сэргэлт бий болж, гадаадад улсын маань нэр хүнд өсөж, хөрөнгө оруулагчдын итгэл
идэвхжин, зээлжих зэрэглэл нэмэгдэж байна.

Уруудал доройтлоос
ямар ч байсан гарч чадсанаар авч хэрэгжүүлэхээс өөр аргагүйд хүрсэн амаргүй
шийдвэрүүдээ эргэн харж, өөрчлөн засах боломж бүрдэж байна. Үүний нэгэн жишээ
нь УИХ-аас холбогдох хуулиудад өөрчлөлт оруулж хувь хүний орлогын албан татварын
хувь хэмжээг хуучин хэвд нь оруулан, тэтгэвэрт гарах насыг сонголттой болгосон
явдал юм.

Өсөлт дэвшил,
орлого хуримтлал болгон монгол хүн, монгол айл гэрийн амьдралд үр ашиг, эерэг
нөлөөний тусгал болж байх учиртай гэсэн зарчмыг бид цаашид ч тууштай баримтлах
болно.

Угтан золгож буй
нохой жилд хариуцлага сахилгыг эрхэмлэн, үргүй зардал, үрэлгэн байдлаас
бүрмөсөн татгалзаж, зөвшилцөл ойлголцлоор аливаа асуудлыг хамтран шийдэх замаар
эдийн засгийн тогтвортой өсөлтийн нөхцөл, эргэлт буцалтгүй хөгжлийн суурийг
тавьж чадна гэдэгтээ эргэлзэхгүй байна.

Эвдрэл талцал,
ганцаарчилсан тоглолт, дүрэмгүй улстөржилт бидэнд сайныг авч ирэхгүй.
Монголоороо нэгэн сэтгэлтэй, Монголоороо нэгэн зүгт харж, бурууд нүд хурц, зөвд
итгэл хамт байж чадах аваас Та бид гэрэлт сайхан ирээдүйгээ бүтээж чадна.

Эрхэм хүндэт монголчууд аа,

Манай ард түмэн үндэсний уламжлалт Цагаан
сараар гэр бүл, ахан дүүсээрээ хуран цуглаж, амар мэндээ айлтган мэдэлцэж, хийж
бүтээснээ дүгнэн цэгнэж, ирж буй жилийн өнгийг аз жаргал,
амжилт бүтээлээр бэлгэшээдэг сайхан заншилтай
билээ.

Тийн унжлагат
нохой жил ахмадуудад урт нас, ая тухтай амьдрал, өсвөр багачуудад эрүүл энх, инээд хөөр, залууст эрдэм боловсрол, ирээдүйг бүтээх эрмэлзэл, энэ цагийн
ачааны хүндийг үүрэгч дунд үеийнхэнд эрч хүч, золбоо хийморийг авчрах болутгай.

Монгол эх орон минь даяарт цуурайтаж, сэргэн мандаг ээ.

Сар шинэдээ сайхан шинэлээрэй.

МОНГОЛ УЛСЫН ИХ

ХУРЛЫН ДАРГА МИЕЭГОМБЫН
ЭНХБОЛД