Найруулагч Н.Наранбаатар: Энэ жүжгийг барьж аваад тайзнаа амилуулах зориг гаргасандаа маш их баяртай байна

Улсын Драмын эрдмийн театрын үүсэн байгуулагдсаны 85  жилийн ойн баяр энэ жил тохиож байна.  Драмын театрынхан намар цагийн нээлтийн тоглолтоо мянга мянган жилийн турш хүн төрөлхтөнд чин үнэнч, агуу хайрын үнэ цэнийг мэдрүүлсэн алдарт У.Шекспирийн \”Ромео Жульетта” жүжгийг орчин цагийн цоо шинэ дэг тавилтаар их тайзнаа дахин амилууллаа. 20 гаруй жилийн өмнө тайзнаа тавигдаж байсан \”Ромео Жульетта” жүжиг энэ удаа их онцлогтой. Залуу жүжигчдээс бүрдсэн, жүжгийг өнөө цагт тохируулан хийсэн, жүжгийн найруулга, тавилт, хувцас, тайз, хөгжим, гэрэлтүүлэг гээд бүхий л талаараа урьд өмнө байгаагүй өвөрмөц шийдэлтэй байж чадлаа хэмээн үзэгчид хэлж байлаа.

-Жүжгийн нээлтийн үер найруулагч Н.Наранбаатарын сэтгэгдэлээс хуваалцсан юм.

–\”Ромео Жульетта” жүжиг монголын тайзнаа гурав дахь удаагаа тавигдаж байна. Энэ удаагийн жүжгийг та найруулж олонд хүргэх гэж байна шүү дээ. Сэтгэгдэлээ хуваалцахгүй юу?

-Аливаа уран бүтээлийг цоо шинээр нь үзэгчдэд хүргэх бол нэг асуудал. Тийм учраас энэ жүжгийг барьж аваад тайзнаа амилуулах зориг гаргасандаа маш их баяртай байна.  Ариун үнэнч хайрын түүх хэмээх энэхүү бүтээлийг өөрийн гэсэн өнгө тусгалаар залуучууддаа хүргэх гэж байгаадаа итгэлтэй байна. Агуу У.Шекспирийн хайрын жүжгээс хайрыг мэдэрч, та бүхэн амьдралын үнэтэй зүйлсийг хайраар мэдэрч яваарай л гэж хүсэж байна.

-Энэ удаагийн \”Ромео Жульетта” жүжгийн онцлог юу вэ? Орчин цагийн залууст зориулсан гэв үү?

-Тиймээ. Бид 21-р зууны залуус. Ер нь орчин үеийн тавилт гэж юуг хэлээд байна  вэ гэхээр нийгэм дэх өөрчлөлт, хүмүүсийн зан ааш, аливаа юманд хандах хандлага өөрчлөгдөж байгааг бид соргогоор хүлээн авч тэрийг уран бүтээлдээ тусгахыг орчин үеийн гэж хэлж байгаа. Гагцхүү үзэх л хэрэгтэй. Үзээд дүгнээрэй.

-Найруулагчийн зүгээс жүжигчдийн сонголтыг хэрхэн хийсэн бэ?

-Найруулагч хүн аливаа бүтээлийг хийхийнхээ өмнө зохиолоо сонгоно. Дараа нь хамгийн том ажил дүрээ сонгох хэрэгтэй. Дүрээ зөв сонголоо гэж үзвэл жүжгийн гуч дөчөөд хувийг хийсэн гэж тооцоорой гэсэн том том найруулагч нарын туршлага байдаг. Дүр сонголтыг хийх маш чухал. Хамгийн гол нь энэ жүжигт манай театрын залуу жүжигчид бултаараа оролцож байгаад утга учир оршиж байна. Бид театрыг үүрч явах ачааг, бяр бядыг сургаж байгаа гэдэгтээ туйлын их баяртай байна.

–Таны дараагийн төлөвлөж буй ажил?

-Театрыг би бол том дальтай хангарьд шувуу гэж боддог. Нэг том даль нь дэлхийн сонгодог байх ёстой. Дэлхийтэй хөл нийлүүлэх ёстой нөгөө даль нь үндэсний маань бахархалт сонгодогууд байх ёстой. Мэдээж найруулагч хүнд олон бүтээл хийх хүсэл байна. Ойрын хүсэл гэвэл \”Бурхан багш Шагжамун”-ы намтарын тухай уран бүтээл хийхээр төлөвлөж байна. Алдарт Гёте, Фаустыг үзэгч түмэндээ хүргэнэ ээ.