\”Эрдэнэс-Тавантолгой\”-н удирдлагуудад эрүүгийн хэрэг үүсгэжээ

 

\”Эрдэнэс Тавантолгой\” компанийн ажилтан, Үйлдвэрчний эвлэлийн тэргүүлэгч С.Эрдэнэд цагдаагийн байгууллагаас эрүүгийн хэрэг үүсгэн шалгаж эхэлсэн талаар зарим хэвлэл мэдээллийн хэрэгслээр цацагдсан.  Тодруулбал, түүнийг санаатайгаар амиа хорлох гэж оролдсон, ил гал гаргахыг хориглосон газар гал гаргасан гэсэн үндэслэлээр эрүүгийн хэрэгт татан шалгаж эхэлсэн хэмээсэн байв. Харин энэхүү мэдээллийг цагдаагийн байгууллагаас үгүйсгэж байна. ЦЕГ-ын хэвлэл мэдээллийн төвийн ахмад Ё.Лхагвасүрэнгээс дараах зүйлсийг тодрууллаа.

 

-Энэ асуудалд Сүхбаатар дүүргийн цагдаагийн нэгдүгээр хэлтэст эрүүгийн хэрэг үүсгэн шалгаж байгаа нь үнэн. Харин С.Эрдэнийг хохирогчоор татсан.

-Амиа хорлохыг завдсан гэж С.Эрдэнэд эрүүгийн хэрэг үүсгэсэн гэдэг худлаа юу?

-Тийм зүйл байхгүй. Монгол Улсын Эрүүгийн хуулинд амиа хорлохыг завдах гэдэг зүйл анги байдаггүй.

-Тэгвэл ямар зүйл ангиар эрүүгийн хэрэг үүүсгэсэн юм бэ?

-Монгол Улсын Эрүүгийн хуулийн 95.1-д зааснаар С.Эрдэнийг хохирогчоор тооцон, мөрдөн байцаалтын ажиллагаа үргэлжилж байна. Эрүүгийн хуулийн  95 дугаар зүйл. Бусдыг амиа хорлоход хүргэх гэсэн заалт бий.  95.1-д \”Эд хөрөнгө, албан тушаалын болон өөр байдлаар эрхшээлдээ байгаа болон өөр бусад хүмүүстэй харгис хэрцгий харьцсан буюу нэр төр, алдар хүндийг нь байнга гутаан доромжилсны улмаас хохирогч амиа хорлосон бол хоёроос таван жил хүртэл хугацаагаар хорих ял шийтгэнэ.” гэж заасан байна.

-Тэгэхээр Эрдэнэс тавантолгойн удирдлагуудад эрүүгийн хэрэг үүсгэсэн гэсэн үг үү?

-Тухайн хэрэгт холбогдох \”Эрдэнэс тавантолгой” компанийн албан тушаалтнуудыг шалгах ажиллагаа хийгдэж байна. Гэхдээ тухайн албан тушаалтнуудыг шууд гэм буруутай гэж ойлгож болохгүй.  Гэм буруутайг шүүх байгууллага тогтоодог.

Б.ЦЭЛМЭГ