Нэрт гэрэл зурагчин Луис Хайны архиваас 24 гэрэл зураг нь Нью-Йорк хотноо дуудлага худалдаагаар зарагдлаа. Тэрхүү ховорхон хэвлэмэл гэрэл зургуудыг хожим Нью-Йоркийн гэрэл зурагчин Изадор Си Сайдмен цуглуулгаас авчээ. Америкийн социологич Хайн нь 20-р зууны хамгийн чадварлаг баримтат гэрэл зурагчдын нэг байсан юм. Тухайн цаг үед фото сэтгүүлзүй, баримтат киноны тухай ойлголт байгаагүй учир тэрээр итгэл үнэмшлийнхээ төлөө зураг болон үгсийг ашиглан өөрийн төслүүдийг “фото түүхүүд” хэмээн нэрлэж байжээ. Эдгээр зургууд нь Хайны нэр хүнд болон түүний төслүүдийн нэлээдийг алдаршуулж, Каролин, Нью-Йорк, Питтсбург дэх ядуу зүдүү хэсгийнхэнд олны анхаарлыг хандуулж чадсан аж. Тэрээр энэрэл нигүүлсэл болоод субъектийнхээ бахархлыг тусган харуулсан гэрэл зургуудыг авч, олон тооны төсөл бүтээхэд нэлээд хугацааг зарцуулсан байна.
1904 онд Хайн Эллис арал дээр хүрэлцэн ирж, цагаачдын баримтат зургуудыг авч эхэлжээ. Түүний зорилго нь Нью-Йоркчуудтай нүүр тулахаас айж байсан шинэхэн цагаач гэр бүлүүдтэй уулзах явдал байжээ. Тэрээр хүмүүсээс зөвшөөрөл авсныхаа дараа чанга дуу чимээ гарган хар утаа гаргаж байгаад зургаа авч, нунтаг зүйл асааж байжээ. Хайн нь нийгмийн халамжийн агентлагууд, хэвлэлийн газрууд, корпорациудын даалгаснаар гэрэл зурган түүхүүдийг бүтээж байсан аж. Түүний алдартай зургуудын нэг нь “Импайр стэйт бьюлдинг” дээр ажиллаж буй ажилчдын зураг юм.
1908 онд Үндэсний хүүхдийн хөдөлмөрийн хорооны гэрэл зурагчин болох үедээ тэр хүүхдийн хөдөлмөрийн мөлжлөгийг нуун дарагдуулж байсан баримтуудыг ил болгож, үйлдвэр, тээрэм болон дархны газруудын бодит байдлыг харуулж чаджээ. Тэрээр хүүхдүүдийн айдас хүйдсийг төрүүлж байдаг тэдгээр үйлдвэр, тээрэм, дархны газрын эздийг үзэн яддаг байсан гэнэ. Үүнээс болж маш олон хүн түүнийг заналхийлж байжээ. Гэвч Хайны авсан эдгээр гэрэл зургуудын ачаар АНУ-д Хүүхдийн хөдөлмөрийн тухай хуулинд эрс эргэлт гарсан байна. Түүнчлэн түүний гэрэл зургууд 20-р зууны эхэн үеийн цагаачид, энгийн ажилчин иргэдийн амьдрал ахуйг харуулсан гайхалтай баримтат бүтээлүүд болон үлджээ.
- 1921 оны үед. Эрчим хүчний цахилгаан станцад Уурын насос дээр ажиллаж буй механикч. Энэхүү зураг 80 мянган доллараар зарагджээ.
- 1908 он. Нью-Йоркийн Ийст Сайд дүүрэг дэх нэгэн халуун өдөр.
- 1907 он. Эх, охин хоёр, Эллис арал
- 1905 он. Ачааны өрөөн дэх Итали гэр бүл, Эллис арал
- 1912 он. Ийст Сайд үйлдвэрийн дүүрэгт, үд дундын үед
- 1907 он. Словак цагаач, Эллис арал
- 1930-1931 он. Импайр стэйт бьюлдингийн холбогч дээр зогсож буй ажилчин
- 1908 он. Каролины хөвөнгийн үйлдвэрт ажиллаж байсан охидын нэг
- 1912 он. Нью-Йорк хот, хиймэл цэцэг
- 1912 он. Пенсильванийн нүүрс олборлогч хөвгүүд
