Д.Болд: Автобуснууд 22.30 цагт үйлчилгээнээс буух ёстой

 

Нийслэлийн тээврийн газрын Олон нийттэй харилцах ажилтан Д.Болдоос нийтийн тээврийн үйлчилгээний талаар зарим зүйлийг тодрууллаа.

 

– Шаргаморьт, Шадивлан, Зунжингийн чиглэлийн автобус өглөөд товлосон цагтаа үйлчилгээнд гарахгүй иргэдийг чирэгдүүлж байна гэх гомдол их байна. Хэт хүйтэрснээс автобус асахгүй байгаа гэх юм. Энэ бодитой юу?

 

-Дээрх чиглэлд \”Эрдэм транс”, \”Тэнүүн огоо”, \”Тэнүүн дэлгэр” ХХК-ий автобус үйлчилгээнд явдаг. \”Эрдэмтранс”, \”Тэнүүн дэлгэр” ХХК-ийн бааз нь Сонгино-хайрхан дүүрэгт байрладаг. Энэ хоёр компанийн автобус иргэдэд үйлчлэх цагаасаа хоцорч болох ч хүлээсэн үүргийнхээ дагуу 06.45 цагаас явах ёстой. Харин \”Тэнүүн огоо” компанийн гуравдугаар бааз Зунжинд байрладаг учир тийм хүндрэл гарах учиргүй. Өглөө автобус асахгүй байна гэх асуудал гаргах ёсгүй. Учир нь бааз бүр дулаан гарааштай. Харин үйлчилгээнд гарсны дараа хөлдөж хаалга нь хаагдахгүй болох хүндрэл гардаг. Тийм хүндрэл гарсан тохиолдолд тухайн компаниас нөөц автобус гаргаж, үйлчилгээнд явуулах зарчимтай.

 

– Нийтийн тээврийнхэн 22.30 цаг хүртэл иргэдэд үйлчлэх учиртай. Гэтэл 21.00 цаг гэхэд олонх чиглэлийн автобус зогсчихдог. Үүнийг хэрхэн зохицуулах ёстой вэ?

 

-22.30 цаг гэхэд авто буснууд үйлчилгээнээс буух ёстой. Гэхдээ түгжрэлээс шалтгаалан замын дундаас буух нь бий. Автобуснууд заримдаа нэг талдаа гарчихдаг юм. Хэрвээ 21.00 цаг гэхэд ямар ч автобус үйлчилгээнд явахгүй байгаа бол нийслэлийн Тээврийн газрын 323176, 326352 дугаарын утсанд холбогдож, санал гомдлоо мэдүүлэх боломжтой.

 

-Одоогоор хэчнээн иргэн Улаанбаатар смарт картаар үйлчлүүлж байна вэ. Картгүй бол 700 төгрөгөөр үйлчлүүлнэ гэсэн. Гэтэл иргэд 500 төгрөгөөр зорчсоор л байна. Энэ ямар учиртай юм бэ?

 

-Өнөөдрийн байдлаар 530 орчим мянган хүн карт авсан. Нийтийн тээврийн хэрэгслээр үйлчлүүлэхдээ 700 төгрөгөөр явах шийдвэр гаргаагүй.

 

-Автобусны чиглэлийг өөрчлөөд нэлээд хугацаа өнгөрлөө. Зарим чиглэлийн автобус цөөн. Харин Таваншар-Офицеруудын ордны чиглэлийн автобус 10 минутад 4-5 удаа явах юм ?

 

-Нийтийн тээвэр гэдэг иргэдэд зориулсан үйлчилгээ. Тэгэхээр төлөвлөлтийг санаагаараа хийчихдэг зүйл биш. Олон жилийн судалгаа бий. Мөн энэ төрлийн судалгаа хийдэг хэлтэс байдаг. Нарийн судалгааны үндсэн дээр л чиглэлийг гаргаж байгаа шүү дээ.

 

С.Хорлоо