Бид ярилцлагын танхимынхаа өнөөдрийн зочноор бяцхан загвар өмсөгч, мисс, мөн дуучин Мөнхбатын Ануг урьж, уншигч олондоо танилцуулж байна.
-Өдрийн мэнд хүргэе. Юуны өмнө өөрийгөө товч танилцуулаач.
-Өдрийн мэнд. Намайг зочноор урьсан та бүхэнд бас баярлалаа. Намайг Ану гэдэг. Би 4-р ангид сурдаг.
-Анх хэдэн настай байхдаа загварын тайзан дээр алхаж үзсэн бэ? Анхны алхамынхаа талаар сонирхуулахгүй юу?
-Би анх 3 настай байхдаа “Говь” компанийн нүүр царай болж анхныхаа загварын зургаа авахуулж байсан. Тэгээд дараа нь 5 настайдаа Ч.Содтуяа багшийн шавь болж одоог хүртэл “Азийн модел” агентлагт загвар өмсч байгаа.
-Ямар мундаг юм бэ. Их багаасаа загвар өмссөн юм байна шүү дээ. Монгол улсаас өөр ямар ямар улсад загвар өмсч байв. Олон амжилт гаргаж байсан байх?
-Би Хөх хотод зохион байгуулагдсан “Хүүхдийн азийн модел” шалгаруулах тэмцээнд оролцож 300 гаруй хүүхдээс шилдэг 30 хүүхдэд шалгарч, Шанхай хотод болох “Олон улсын хүүхдийн модел” шалгаруулах тэмцээний эрх авсан. 2016 оны наймдугаар сард Шанхай хотод болсон “Олон улсын хүүхдийн загвар”-ын тэмцээнд амжилттай оролцсон. Дараа нь 2016 оны аравдугаар сард Английн Элчин сайдын яамнаас анх удаа надаас гадна 4 хүүхдэд “Олон улсын хүүхдийн модел” гэсэн сертификат ирсэн.
-Чи тэгвэл олон улсын тайзан дээр загвар өмсөх эрхтэй юм байна гэж ойлгож болох уу. Монголдоо ямар амжилт гаргаж байсан бэ?
-Тийм ээ. Би 1-р ангидаа сургуулийнхаа оны тэргүүний сурагч, 2 болон 3-р ангидаа оны авьяаслаг сурагч, мөн Сүхбаатар дүүргийн тэргүүний сурагч, 4-р ангидаа Сурагчдын холбооны Оны тэгрүүний сурагч болж байсан. Харин загварын тал дээр 2014 оны “Барби мисс” , 2015 онд Wonder baby тэмцээний “Шилдэг загвар өмсөгч”, бас Азийн модел агентлагийн “Шилдэг загвар өмсөгч” болж байсан.
-Үнэхээр их амжилт гаргажээ. Ану маань бас олон төрлийн авьяастай гэсэн. Дууны уран бүтээлийнхээ талаар яриач.
-Миний анхны уран бүтээл “Аавдаа” гэдэг дуу байгаа. Тэр дууныхаа клипийг өнгөрсөн 2017 оны арваннэгдүгээр сард хийлгэсэн. Тэрний дараа “Миний дуу” нэртэй хүүхдийн хүчирхийллийн эсрэг дуу гаргасан. Одоо харин гурав дахь уран бүтээл болох ээжийн тухай дууныхаа бэлтгэлийг хийж байгаа.
-Чиний эргэн тойрны багачууд Анугаас их үлгэр дуриалал, бас их урам зориг авдаг болов уу гэж бодож байна. Ямар хоббитой вэ. Энэ их хөдөлмөрийн дундуур гарах зав чөлөө тун бага байдаг байх. Ер нь чөлөөт цагаараа юу хийдэг вэ?
-Би хичээлээсээ бусад цагаар дууныхаа бэлтгэлийг бас загварынхаа бэлтгэлийг хийдэг. Заримдаа чөлөөт цаг гарсан үед би ном уншдаг. Би одоо дэлхийн хүүхдийн сонгодог зохиолын цувралуудыг уншиж байгаа. Харин хобби гэвэл би аав, ээжтэйгээ хамт монгол орныхоо үзэсгэлэнт байгалиар аялах дуртай.
-Ямар дуучдын дууг сонсох дуртай вэ?
-Монгол дуучдаас дуучин Ану эгчийн дууг сонсдог. Харин гадаад дуучдаас JoJo Siwa-гийн дуунд их дуртай.
-Мэдээж ийм хөдөлмөрч, авьяаслаг хүүхдийн хүсэл мөрөөдөл заавал биелнэ гэдэгт итгэлтэй байна. Бид хоёрын ярицлага ийнхүү өндөрлөж байна. Манай уншигчдад, ялангуяа уншигч үеийн найзууддаа хандаад юу гэж хэлмээр байна?
-Яг юу хүсч, юунд зорьж байна, түүнийхээ төлөө тууштай байж чадвал мөрөөдөл биелдэг юм. Хэзээ ч залхуурч болохгүй шүү. Хэрвээ залхуураад байвал мөрөөдөлдөө хэзээ ч хүрч чадахгүй шүү гэж хэлмээр байна даа.
-За баярлалаа. Маш сайхан үг хэллээ. Ингээд цаашдын уран бүтээлд нь өндрөөс өндөр ажилтыг хүсье.
-Та бүхэнд бас баярлалаа.
