\”ХҮН\” хүний төлөө ажиллаж чадах уу

Нүүрс тараах, ахмадуудыг шинэ
жилдүүлэх, найман хувийн хүүтэй орон сууцны зээлийг зогсоох, Голомт банкны
ноцтой баримтуудыг дэлгэх, 17 жилийн өмнөх С.Зориг агсны хэргийг талийгаач
Ш.Отгонбилэгтэй холбох гээд ойрын хугацаанд өрнөж буй бүхий л үйл явц улс
төрийн шинжтэй, сонгуулийн үнэртэй болоод явчихлаа. Саяхан Худалдаа хөгжлийн
банканд гарсан дээрмийг хүртэл сонгуулийн сурталчилгаандаа ашиглаж зарим нэг
хүн Монгол Улсыг цаазын ялгүй болгосонтой холбоотой хэмээн тайлбарлахыг оролдох
болов.

Ер нь сонгуулийн жил дөхөхөөр улс
орны бүхий л салбар нэгж дээр улс төрийн уур амьсгал идэвхждэг хойно, нэг их
асуудал өгч, өөрсдийгөө бухимдуулаад ч яахав. Илүү зан биз.

Харин гэнэт гарч ирчихээд ард түмэнд
учиргүй их хайр зарлаад байгаа нэгэн намын тухай л өнөөдөр багахан асуудал
хөндөхийг хүсэв.

Энэ нам ХҮН гэх товчлолтой
Хөдөлмөрийн үндэсний нам юм. ХҮН нам нь дөрвөн жилийн өмнө буюу 2011 онд Улсын
Дээд шүүхэд бүртгүүлж, байгуулагдаж байж. Гэвч 2012 оны сонгуульд өрсөлдсөнгүй.
Харин 2016 оны сонгуульд \”хүчирхэг өрсөлдөгч” болохоор орон нутагт салбар,
хороогоо байгуулан, хүрээгээ тэлсээр байна.

Ард түмнээ хайрлая, Монгол хүний
төлөө гэх мэт намуудыг бодвол боловсон хүчин, үзэл баримтлал, мөрийн хөтөлбөр
зэргийг нь иргэд ташаагаад байгаа.

Гэвч ХҮН бас л бусад намууд шигээ
хийсвэр мөрөөдөл бүхий зорилготой. Нөгөө л АН, МАН-ын дэвшүүлдэг, ард түмнийхээ
төлөө ажилладаг төрийн байгууллагыг бий болгоно, хорт утаагүй, цэвэр орчин амьдруулна,
эрх зүйн эрүүл орчинг бий болгоно, баялгийг шударга, зөв хуваарилна, баялаг
бүтээгчдийг дэмжинэ … гэх мэтчилэнгийн жижүүрийн хэдэн зорилгыг ХҮН ч бас
дэвшүүлжээ.

Хоёр нам ээлжлэн төр бариад дээрх
зорилгуудыг 25 жилд биелүүлж чадсангүй. Энэ удаад ч дахин дээрх зорилгоо
хэлсээр л нэр дэвших биз. Гэтэл залуу, шинэ соргог байх болов уу гэсэн ХҮНам ч
хууччууд дээр нэмэгдэх бололтой юм шиг байна.

Хүн шиг амьдруулж, Улс шиг хөгжүүлнэ
гэсэн АН-ын мөрийн хөтөлбөр, иргэд нь аз жаргалтай, улс нь өндөр хөгжилтэй
болох ХҮН-ын зорилгод нэг их ялгаа ажиглагдахгүй байгаа биз.

Тэгэхээр эндээс ХҮН нь бусдаасаа
огтхон ч ялгаагүй юм байна гэх жижигхэн дүгнэлт хийчхэж болж байна.

ХҮН-ыг ерөнхийд нь Монголын
Үйлдвэрчний эвлэлийн нам гээд ойлгочиход буруутахгүй. Харин намын ард талд
УИХ-ын гишүүн С.Ганбаатар тэргүүтэн байдаг гэдэг. С.Ганбаатарыг яагаад энэ
намтай хамаатуулав гэхээр түүний туслах, зөвлөхөөр ажиллаж байсан С.Зоригтбаатар
нь энэ намыг үүсгэн байгуулж, Улсын Дээд шүүхэд бүртгүүлсэн тухай мэдээллүүд
байдаг. Одоо тэрээр намын нарийн бичгийн даргын
албан тушаалыг хашч байгаа.

С.Зоригтбаатарын хувьд С.Ганбаатарын
үзэл баримтлалыг дагадаг гэдгээ ярилцлага бүртээ л дурдсан байдаг. \”Жимс
модныхоо ойролцоо унадаг” гэдэгтээ адил хэмээн үүнийгээ тайлбарладаг. Энэ
бүгдээс л С.Ганбаатар ХҮН-ын ард байна гэж хардаад байгаа юм.

Тэгвэл ХҮН хэний эрх ашгийг
хамгаалах вэ. Дэвшүүлж буй зорилго нь ард түмнийг хамгаалах, тэдний эрх ашгийг
дээдлэх. Гэвч үйл ажиллагаа, дэмжлэг, гишүүдийн хамрах хүрээг харвал Монголын
Үйлдвэрчний эвлэлийн эрх ашигт нийцүүлэн ажиллах нь гэж хардахаар. Ер нь хүний төлөө ажиллах нам мөн үү гээд
дахиад асуугаад үзье.

Орон нутаг, аж ахуйн нэгжид байх
үйлдвэрчний эвлэлээр баазаа бэхжүүлж, сонгуульд оролцох, улмаар өндөр санал
авах гэсэн зорилго нь хийж хэрэгжүүлж буй үйлдлүүдээс нь харагдсаар байгаа.Гэвч тэдний саналыг авч гарч ирээд Монголы Үйлдвэрчний эвлэл /МҮЭ/ шиг дэмий
лоозогноод байвал хэнд ч хэрэггүй. Яагаав МҮЭ жил бүр уламжлал болсон уриагаа
дэвшүүлж, хямралтай байхад цалин нэм гэж баахан сүржигнээгүй юу. МҮЭ-ийн хувьд Төрийн
ордон дотор Засгийн газар, Ажил олгогчидтой гэрээ байгуулж, гарын үсэг
зурчихаад гадаа нь гарч ирээд \”цалин нэмэхгүй байна, Засгийн газрыг огцрохыг шаардаж
байна” гэхчлэнгээр жүжиг тоглодог л байгууллага болж хувираад байгаа.

Тэгвэл ХҮН-ын үйл ажиллагаа ч бас
энүүхнээс хэтрэхгүй байх вий дээ. Үйлдвэрчний эвлэлийн томоохон баазыг ашиглаж,
төрд сонгогдчихоод ах нар шигээ худлаа лоозогнож, \”суудал бөглөх” юм биш биз.

Амар