Бизнесийнхний увайгүй өрсөлдөөн хүний аминд хүртлээ задгайрсан уу

 

 

Монголд өнөөдөр төрд
байгаанууд нь бие биенээсээ илүү \”идэх” гэж ухаанаа уралдуулж, бизнесийнхэн нь
нэгнийгээ дампууруулан байж ашиг олохыг боддог увайгүй өрсөлдөөн бий болжээ.

Ганцхан бизнесийн салбарыг онцлон харахад шинийг сэтгэж, баялаг бүтээхээсээ
илүү эрсдэлгүй багатай амар аргаар мөнгө олох гэсэн үйл ажиллагаа явуулдаг
болж. Үүний илрэл нь зочид буудал, баар, караоке ажиллуулах болон худалдааны
төв барьж түрээслүүлэх. Нэг хэсэг орон сууцны үнэ хөөсөрч байхад мөнгөтэй
хүмүүс шинээр ашиглалтад орсон барилгаас нэг, хоёр байр битгий хэл орцоор нь
худалдан авч цааш нь дамлан зардаг байв. Ингэж л амар хялбар аргаар мөнгөө
өсгөдөг болсон манайд эрсдэлтэй бизнест хуруу дүрэх бизнесмэнүүд тун цөөн
байна. Нөгөө талаас эрсдэл өндөр ч олох ашиг өндөр бизнест манайхан оролцохгүй
байгаа нь мэдлэг тун хомс байгаатай холбоотой.

Дотооддоо ширхэг зүү
үйлдвэрлэсэн ч тэр нь Монголын баялаг болж, гадаадаас зүү худалдан авахдаа
зарцуулдаг мөнгийг Монголд үлдээнэ. Тэгвэл амар хялбар аргаар худалдааны төв
барин түрээслэсэн шигээ суудаг манай бизнесийн томчууд энэ бизнес нь ахицгүй
болж, цөөхөн хэдэн хүн ам нь хэдэн том худалдааны төвд шингэсэнтэй холбогдуулан
тэдгээр худалдааны төвүүдийг овоо хараандаа авч, анан сууж, басхүү \”хорлон
сүйтгэх” тохиромжтой мөчийг хүлээдэг болсон гэнэ.

Санаж байгаа бол Бөмбөгөр
худалдааны төвд гал гарснаас хойш дандаа нэр хүнд бүхий томоохон худалдааны
төвүүдэд гал гарсныг. Нарантуул шатлаа, Сандей Плазаг шатаах гэж хэд хэдэн удаа
оролдлоо. Мэдээж задгай талбай бүхий Нарантуулаас ганц шатаах боломжтой зүйл нь
Хүнсний зах байсан гэдгийг хүмүүс хэлдэг юм. Нөгөө талаас Нарантуулийг нүүлгэж,
томоохон хэмжээний газарт нь барилга барихаар улайрсан хүмүүс олон байгаа юм. Нийслэлийн
зүгээс ч Нарантуулийг задгай байна, битүүлэх хэрэгтэй гэх мэт янз бүрийн
шалтгаанаар нүүлгэхийг оролдсон.

Түүнчлэн хүнсний захыг нь шатсаны дараа
нүүлгэх гэж нэлээд хүчилсэн. Харин үүний хариуд Нарантуул захын удирдлагууд
шатсан хүнсний захын оронд өндөр барилга барьж, нэг, хоёр давхрыг нь шатсан
хүнсний захад лангуу түрээсэлж байсан хүмүүст насан туршид нь өмчлүүлнэ гэж
хэлж мэхийг мэхээр гэгч юм болсон. Нарантуулийн газрыг Ш.Сайхансамбууд өмчилж
аваагүй бөгөөд зүгээр эзэмшдэг гэнэ. Нөгөө талаас эзэмших хугацаа нь дуусч, басхүү
шатсан хүнсний захын оронд өндөр барилга барихыг эсэргүүцэж байсан нийслэлийн
удирдлагуудаас Ш.Сайхансамбуу Нарантуулын газраа эзэмших эрхээ 25 жилээр сунгасан
гэнэ. Тиймдээ ч барилгаа бариад эхэлсэн болов уу. Юутай ч, ингэж нэгнийнхээ
бизнесийг унагах энэ бүгдийн ард бизнесийнхний увайгүй өрсөлдөөн явагдаж байдаг
ба дээрх бүх галууд гаднын нөлөөнөөс гарч, өөрөө шатсан мэтээр харуулах гэсэн
оролдлого байсныг бизнесийн томчууд нь өөрсдөө хүлээн зөвшөөрдөг юм билээ.

Сандей Плазаг зургаан давхар дахь хоолны газраар нь далимдуулан \”шатаах” гээд
бүтэлгүйтсэний дараа доороос нь шатаах \”оролдлого” гарсан бөгөөд өнгөрөгч 10
сарын дундуур гарсан энэ явдлын үеэр подваль /B1 давхар/-т тус худалдааны төвийн 20 гаруй насны нэгэн хамгаалагч залуу нас барсан
гэнэ. Мөн энэ хэргийг ихэд нууцалж байгаа гэнэ. Хэрвээ өнгөрөгч 10 дугаар сарын
галын үеэр үнэхээр хамгаалагч залуу амиа алдсан бол тэрбээр магадгүй B1 давхрыг галдаж байсан гэмт этгээдүүдийг илрүүлсний улмаас
амь эрсэдсэн болов уу. Түүнээс биш тийм ч амархан угаартчихгүй л байх даа.

Ингээд бодохоор бизнесийнхэн нэгнийгээ дампууруулж, өөрийнхөө бизнесийг
цэцэглүүлэхийн тулд хүний амийг ч юман чимээ тоохоо больсон юм шигээ.

 

Нинж