“Эрдэнэт үйлдвэр”-ийг барьцаалж их хэмжээний зээл авсан гэх “Жаст групп” ХХК-ийн ерөнхийлөгч асан Ш.Батхүүг цагдан хориод нэг сар өнгөрчээ. Энэ хугацаанд түүний сахарын өвчин нь хүндэрч бие нь эрс муудсан бөгөөд эрчимт эмчилгээг цаг алдалгүй яаралтай хийхгүй бол амь насанд нь аюул учирч болзошгүй хэмээн эх сурвалжууд мэдээлж байгаа билээ. Харин түүний талаар нэгэн сонирхолтой яриа гарсан нь Ш.Батхүүгийн цагдан хорионы хугацаа өнгөрсөн шөнийн 00 цагт дуусчихаад байхад, түүнийг хууль бусаар үргэлжүүлэн хорьсоор байна хэмээн өмгөөлөгч нь мэдэгдсэн явдал боллоо. Энэ талаар Ш.Батхүүгийн өмгөөлөгч ШШГЕГ-ын харъяа 461 дүгээр ангийн удирдлагад хандаж шаардлага хүргүүлжээ. Уг шаардлагыг сийрүүлбэл, Сүхбаатар дүүргийн Эрүүгийн хэргийн анхан шатны шүүхийн шүүгчийн 2018 оны гуравдугаар сарын 12-ны өдрийн 67/9 дугаартай захирамжаар иргэн Ш.Батхүүд цагдан хорих таслан сэргийлэх арга хэмжээ авсан. Дээрх захирамжийн захирамжлах хэсгийн 1-т “Яллагдагч Ламдан овогтой Шаравламдангийн Батхүүг 2018 оны 03 дугаар сарын 12-ны өдрөөс эхлэн яллагдагчаар 1 /нэг/ сарын хугацаатай цагдан хорих таслан сэргийлэх арга хэмжээ авсугай” гэж шийдвэрлэсэн. Эрүүгийн хэрэг хянан шийдвэрлэх тухай хуулийн 11.1 дүгээр зүйлийн 5-т “Хугацааг сараар тоолоход сүүлийн сарын мөн өдөр хугацаа дуусна…” гэж хуульчилсан. Шүүгчийн захирамжид заасны дагуу 2018 оны 03 дугаар сарын 12-ны өдрөөс эхлэн Ш.Батхүүд цагдан хорих таслан сэргийлэх арга хэмжээ авсан бөгөөд 1 /нэг/ сарын дээд тал нь 31 хоногтой гэж тооцож хүснэлтээр үзүүлэв. Эндээс харахад Ш.Батхүү нь 32 хоногтоо цагдан хоригдаж байх бөгөөд хуанлийн сараар тодорхойлбол нэг сард хамгийн дээд тал нь 31 хоног байх тул 2018 оны дөрөвдүгээр сарын 12-ны өдрийн 08 цаг 30 минутын байдлаар Ш.Батхүүг 8 цаг 30 минут хууль бусаар цагдан хорьж байна….
Иймд Монгол улсын Үндсэн хууль болон сэжигтэн, яллагдагчийг баривчлах, цагдан хорих шийдвэрийг биелүүлэх тухай хуулийн 44 дүгээр зүйлийн 44.3-т заасныг тус тус баримтлан Ш.Батхүүг нэн даруй суллахыг шаардаж байна” гэжээ. Ш.Батхүүг Улсын мөрдөн байцаах газрын Эдийн засгийн гэмт хэрэгтэй тэмцэх хэлтсээс 2013 онд шалгаж эхэлсэн байдаг бөгөөд тэрээр тухайн үед хоригдож байцаагдсан ч эрүүл мэндийн шалтгаанаар улсын эмнэлэгт хэвтэн эмчлүүлэх зэргээр сүүлдээ батлан даалтад гарч байсан ажээ. Гэвч өнөөдөр тэрээр урьдчилан хорих төвд хоригдож байгаа ч мөн л элдэв янзын бааш гаргаж хэзээ мөдгүй үхэх нь байна хэмээн олон амьтнаар өрөвдүүлэх алхам хийж байгаа нь яавч жирийн бус хэрэг шиг санагдахгүй байна. Угтаа бол Монголын Засгийн газрыг өрөнд оруулсан тэр эрхэмийг өнөөдөр шалгаж байцаах, эд хөрөнгийг нь хураан авах нь зүй ёсны асуудал бөгөөд харамсалтай нь тэрээр өнөөх л сурсан зангаараа элдэв арга саам хайж шоронгоос гарахаар тэмүүлж байгаа бололтой.
Түүнийг “Эрдэнэт” үйлдвэрийг барьцаалж зээл авч байсан 2009 оны тэр үед С.Баяр Ерөнхий сайдаар ажиллаж байсан ба сөрөг хүчин болох АН-ын Засгийн газрын үед Х.Тэмүүжин сайд ч уг асуудлыг шийдэж, гэмт хэрэгтнүүдэд хариуцлага хүлээлгэж чадаагүй нь үнэн юм. Тэр утгаараа эрх баригч МАН өнөөдөр өөрийн намын угшилтай эдгээр хүмүүст хариуцлага хүлээлгэнэ гэж итгэхэд нэн бэрх бөгөөд харин ч тэдний зарим нь төрийн өндөр албан тушаал хашиж Үндсэн хуулийн цэцийн гишүүнээр сонгогдон, халдашгүй хамгаалалтад орчихсон яваа нь үнэхээр хачирхалтай. Үндсэн хуулийн цэцийн гишүүн Д.Сугар гэгч энэ этгээдийг 2013 онд шалгаж байцаах шаардлага хуулийнханд гарч байсан ч тэрээр халдашгүй эрх ямбынхаа хүчинд хуулийнхнаас мултарч чадсан бөгөөд эдүгээ Монголын төр, хууль хүчний байгууллагынхан эдгээр албан тушаалтнуудын өмнө хүчин мөхөстөж байгаа нь туйлаас харамсалтай байгаа билээ.
