Талийгаачийн хэргийг өөр зорилгоор ашиглаад байгаа юм биш биз

Байгаль хамгаалагч Т.Лхагвасүмбэрэл гэх залуугийн үхэл олон
нийтийн анхаарлыг маш ихээр татаж байна. Гэвч түүнийг амь насыг хохироосон уу,
эсвэл талийгаач өөрийнхөө амийг хорлосон уу гэдэг нь одоо ч тодорхойгүй байсаар
байгаа. Харин Цагдаагийн байгууллага уг хэргийг шалгах ажлын
хэсэг гаргаж, асуудлуудыг нэгтгэн шалгаж байгаа гэдгээ мэдэгдлээ. Өөрөөр хэлбэл
талийгаачийн амь насаа алдсан асуудлыг тодруулахаар ажиллаж байгаа юм.

Гэтэл хуулийн байгууллагын өмнүүр орж, шалгаж байгаа
асуудлыг төвөгтэй болгох, хэргийн сэжүүр, нотлох баримтыг баллах, мөрдлөгийн
чиглэлийг өөрчлөх, талийгаачийн үхлээр өөр асуудлыг дарагдуулах сонирхол байна
уу гэж хувь хүний зүгээс бодогдох боллоо.

ЦЕГ-ын хэвлэл мэдээллийн төвийн дарга Б.Баатархүү \”Ирвэс
хамгаалах сангийн ажилтан залуугийн амь насаа алдсан хэрэг дээр Цагдаагийн
байгууллага онцгой анхаарч ажиллаж байгаа. ЦЕГ-ын даргын тушаалаар Мөрдөн
байцаах газрын дэд даргаар ахлуулсан ажлын хэсэг гарсан. Өмнөговь, Хөвсгөл
аймагт газар дээр нь очиж шалгалт хийсэн. Мөн талийгаачийн урьд нь цагдаад
хандаж байсан асуудлуудыг нэгтгэн шалгаж байгаа. Мөрдөн байцаалт үргэлжилж
байна” гэсэн мэдээллийг хэвлэлийнхэн өгчээ.

 

Эндээс олон нийтэд тараад байгаа шиг хуулийн байгууллага
ирвэс хамгаалагч залуугийн үхэлтэй холбоотой асуудлыг ор тас орхигдуулаад
байгаа зүйл огт алга байна. Харин ч онцгой анхаарч ажиллаж байгаа гэдгийг
Б.Баатархүүгийн мэдэгдлээс анзаарагдлаа.

 

Ер нь хүний амь настай холбоотой хэргийг хууль хяналтын
байгууллага мартаж, орхигдуулна гэж баймааргүй юм. Гэвч тийм мэтээр мэдээллэх
сонирхолтой хэсэг бүлэг хүмүүс байх шиг байна. Үүнээс болоод л олон нийт \”цагдаа
авлига авч, ирвэс хамгаалдаг залуу бусдын гарт амь насаа алдаа” гэсэн хийсвэр
мэдээлэл дунд шигдчихээд байх шиг байна.

Сүүлдээ Хууль зүйн сайд нь талийгаачийг \”сэтгэцийн өвчтэй”
хэмээн яриад явж байсан мэтээр мэдээлж, олон нийтийн анхаарал төвлөрсөн асуудлаар
улс төр хийхээр оролдоод ч байх шиг. Ямартай ч Хууль зүйн сайд Д.Дорлигжав өрнөж буй асуудалд \”Би талийгаачийг өвчтэй гэж
хэлээгүй. Цагдаагийнхан шалгаж байгаа гэсэн дээ” хэмээн өөрийн цахим хуудсаар
дамжуулан тайлбар хийжээ.

А.Аюуш