Өчигдөр буюу дөрөвдүгээр сарын 17-ны өдөр “Алтжин” группийн захирал Г.Алтангийн хүү Эдуард Сүрэнгийн нэхэмжлэхтэй холбоотой шүүх хурал Баянзүрх дүүргийн иргэний хэргийн анхан шатны шүүхэд болсон билээ.
Энэхүү нэхэмжлэл нь Төрийн банк “Жаст групп” ХХК-ийн ерөнхий захирал Ш.Батхүү нь иргэн Э.Сүрэнгээс 2010 онд зээлсэн 32 сая 855 мянган америк доллар буюу тухайн үеийн ханшаар 51 тэрбум төгрөгийн зээлийн төлбөрийг төлөх асуудал байлаа. Тухайн үед “Жаст” групп иргэн Э.Сүрэнгээс 32 сая 855 мянган америк долларыг нэг сарын 2,5 хувийн хүүтэй зээлсэн бөгөөд “Хадгаламж” банк зээлийн эрсдэлийг даах баталгааг Э.Сүрэнд олгожээ. Өөрөөр хэлбэл, зээл төлөгдөхгүй тохиолдолд тус банк зээлийг Э.Сүрэнд төлнө гэсэн үг юм. Гэвч “Хадгаламж” банк 2013 онд дампуурч, хадгаламж эзэмшигчдийн хохирлыг төрөөс барагдуулж, тус банкыг “Төрийн банк”-нд шилжүүлсэн билээ.
Э.Сүрэн “Хадгаламж” банкны дээрх баталгаагаар 2013 онд Сүхбаатар дүүргийн шүүхэд хандсанаар Төрийн банк зээлийг төлөх шийдвэрийг шүүх гаргаж байжээ. “Жаст групп”-ийн Ш.Батхүү нь иргэн Э.Сүрэнд зээлийн хүүгийн төлбөр 24 тэрбумыг энэ хугацаанд төлсөн боловч үндсэн зээлээсээ нэг ч төгрөг төлөөгүй байна. Өчигдөр Баянзүрх дүүргийн иргэний анхан шатны шүүхээр Төрийн банктай холбоотой асуудлыг авч хэлэлцсэн юм.
Харин энэ асуудлаар Төрийн банкны Ерөнхий захирал Д.Баярсайхан өнөөдөр мэдээлэл хийлээ. Тэрээр “Энэ асуудал хууль хяналтын байгууллагаар эцэслэн шийдэгдээгүй байна. Тиймээс товч мэдээлэл өгье. Төрийн банктай холбогдсон Ш.Батхүүгийн асуудлыг Эрдэнэтийн Стандарт банктай холбогдсон хэрэгтэй хамт шалгагдаад явж байна. Төрийн банкны зүгээс холбогдох байгууллагуудад хандаж энэ хэргийг тусад нь шалгаж өгөөч ээ гэж хүсэж байгаа. Төрийн банк төлбөр төлөх ямар ч асуудал байхгүй. Төрийн банк төлбөрт унаагүй гэдгийг хэлмээр байна.
Төрийн банкны зүгээс гурван шатны шүүхэд хандаж явсаар 2018 оны хоёрдугаар сарын 5-ны өдөр Дээд шүүх дээр шийдвэр гарсан. Энэ шийдвэрээр эхний ээлжинд “Жаст” группийн төлбөр төлөх чадвартай эсэхийг тогтоо, дараагийнхд нь “Жаст” групп дампуураагүй байгаа учраас Төрийн банканд шүүхийн шийдвэр гүйцэтгэх ажиллагаа явуулах нь хууль бус гэдгийг тогтоосон байгаа. Өнөөдрийн байдлаар Төрийн банк ямар нэгэн төлбөр төлөх тухай шийдвэр гараагүй.
Тухайн үеийн Хадгаламж банк тусгай зөвшөөрөлгүй байж “Жаст” группт баталгаа гаргаж өгсөн байдаг. Дээд шүүхийн шийдвэр эцсийн шийдвэр учраас “Жаст” групп дээр л шүүхийн шийдвэр гүйцэтгэх ажиллагаа явагдана. Хамгийн гол нь Төрийн банк аваагүй зүйлийнхээ төлөө хариуцлага хүлээхгүй. Шударга ёс гэж байдаг бол бид хариуцлага хүлээхгүй гэдэгт итгэлтэй байгаа” гэлээ.
