Ардчиллын анхны удирдагчдын нэг Санжаасүрэнгийн Зориг агсны төрсөн өдөр жил бүрийн дөрөвдүгээр сарын 20-ны өдөр тохиодог. АН-аас жилд хоёр удаа С.Зориг агсны хөшөөнд хүндэтгэл үзүүлж цэцэг өргөдөг уламжлалтай. Өнөөдрийн цэцэг өргөх ёслолд АН, АН-аас сонгогдсон УИХ-ын гишүүд, АН-ын дэргэдэх олон нийтийн байгууллагууд оролцож, хүндэтгэл үзүүллээ.
С.Зориг агсны дүү С.Оюун “Гурван шатны шүүхийн талаар манай гэр бүл тодорхой байр сууриа илэрхийлсэн. Шүүх хурлыг нээлттэй саналыг тавьсан ч хаалттай болсон. Хэргийн материалыг нээлттэй болгох шийдвэрийг Засгийн газраас гаргасан ч одоо болтол ажил хэрэг болоогүй. Алдсан хүн арван тамтай. Тэр материалууд ил болж байж эргэлзээг тайлна. Гурван шатны шүүхээр шийдсэн хэрэгт бид эргэлзсэн хэвээр байгаа учраас зөв, бурууд санаа зовж байна. Захиалагч нь олдоосой. Жинхэнэ хийсэн хүмүүс ял битгий завшаасай. Хэрэг хийгээгүй хүмүүс битгий хэлмэгдээсэй гэж санаа зовж байна” гэсэн юм.
АН-ын дарга С.Эрдэнэ энэ үеэр хэлсэн үгэндээ “Өнөөдөр С.Зориг агсан маань амьд сэрүүн байсан бол 56 нас хүрч байх ёстой. Энэ бол эр хүний хувьд ихийг сэдэж, улс орондоо хийж бүтээх ид үедээ байх нас. Харамсалтай нь цаг бусаар хорвоогийн мөнх бусыг үзүүлсэн. Гэхдээ Монголдоо С.Зоригийн эхлүүлсэн ардчилал, шударга ёс, хүний эрх, эрх чөлөө, нийгмийн сайн сайхан үйл хэргийн эхлэл нь биеллээ олоод явж байгаа нь бахархууштай. 1989, 1990 оны Ардчилсан хувьсгалын жавар тачигнасан хүйтэн өдрүүдэд Монголын ард түмнийг зоригжуулж, уриалж, нийгмийн өөрчлөлтийн төлөө асар их үүрэг гүйцэтгэсэн хүн бол С.Зориг агсан юм. ” гэлээ.
Энэ үеэр ИЗНН-ын дарга асан, Зориг сангийн тэргүүн С.Оюун АН-ын дарга С.Эрдэнэд талархал илэрхийлээд “Ажлын хэсэг байгуулсан. Тэрэн дээр нь сайн анхаараарай.” хэмээн жич захиж байлаа.
